MAGALATWIYA 5

Unafasi hari mwa uv̄umoja na Kristi

1Ile wasi rikane unafasi, ɗe Kristi arikomboa. Ɓasi v̄av̄o namuhodarishihe, wala musudzilishe mwarudi tsena mwatrika mulandza wa urumwa.

2Wami Ɓaulusu tsami nisumuambiani amba neka musudzilisha mutahiriwe#5:2 mutahiriwe: Yaãni, amba ile mupare muhakisho mbeli za Mungu., Kristi katsomufayidishani na itsokao yotsi. 3Nisuishadidisha tsena ha kula mutru adzilishao atahiriwe: alazimu atuĩ iSharia ha ukamilifu wayo. 4Muɓauhana na Kristi, wanyu mutsahao muhakisho mbeli za Mungu ha ndzia ya iSharia; mulawa hari mwa urehema. 5Wasi hatruju, ɗe ha uv̄ingwa na iRoho ɗe rilindrao, v̄umoja na uaminifu, umuhakisho riutumainiao. 6Mana hari mwa uv̄umoja na Kristi-Insa, tsi ɗe utahiriwa, au tsi utahiriwa ɗe iliona mana, ɓadi ɗe uaminifu urendrehao ha mahaɓa.

7Mwakwendra mbio ha uzuri tu! Mbani ɗe amuziani amba mwasutuĩ ukweli? 8Sariɓu lilo kalisulawa ha Uwo amuhiraoni. 9Lalive shashi ufumua piya umuhare#5:9 Lalive... umuhare: Wasiya unu usurongoa amba uovu mushashi uv̄inga hasara nyengi.. 10Wami yangu, hari mwa uv̄umoja watru na Raɓi, tsina uaminifu na wanyu amba kamutsofikiri namuna yangina. Ɓadi mutru amumenyaoni zifikira, neka ɗe mbani au mbani, atsopara zifungo. 11Na wami uv̄andre wangu wananyangu, na djeli amba nakoĩdhia raha utahiriwa, manatrini ata nitsotreswao raha? V̄av̄o itsoka amba isiɓaɓu ya ukwalisa ilio hari mwaumuri wa pawa|muri wa pawa, kaitsoka tsena. 12Nawandre ata wadzipuwe shiga#5:12 wadzipuwe shiga: iShigiriki isurongoa: nawandre ata wadzifuwe., wao wamuɓaɓanisaoni!

13He wanyu wananyangu, muhiriwa muke hari mwa unafasi. Ɓadi unafasi uwo, usufanyihe amba shisa ya ufanya taɓia ya shiuɓinadamu. Ɗe ha kinyume amba ha uv̄endzana yanyu, namurumishiane wanyu na wanyu. 14Mana piya iSharia itsimidziha hari mwa urongozi moja, ne ɗe unu: «Utsomuv̄endza munyaho mauri ɗe inamuna udziv̄endzao wawe monyewe#5:14 Utsomuv̄endza munyaho... wawe monyewe: Namuangaliye Lukasi 10:27..» 15Ɓadi neka musuremana manyo na uɗyana, namufahamu, musuje mwaangamidziwa wanyu na wanyu.

Uẽshi ha shiRoho, ɓadi tsi ha shiuɓinadamu

16Nisurongoa ɓasi: Namwendre ha uv̄ingwa na iRoho, na v̄av̄o kamutsotsimidza tsena mav̄endzeleo ya shiuɓinadamu. 17Mana shiuɓinadamu una ngushauku kinyume na iRoho, na iRoho ina zilio kinyume na ushiuɓinadamu; zisendra kinyume wizo na wizo, ha namuna amba kamusufanya izo mutsahao. 18Ɓadi neka musuv̄ingwa na iRoho, v̄av̄o kamusi tsena hari mwa utawalizi wa iSharia.

19Na zitrendro za shiuɓinadamu, izo uonehana dhwahiri: uzindzi, utshafi, upeu watupa, 20uãɓudu masanamwe, utsayi, uãduwi, umani, uwivu, hasera, ushifuɓa, mitsapushiano, mifarikishano, 21uwivu, ulevi, uv̄iria uɗya, na trongo zangina zilio mufano wa zile. Nisumufahamishani mauri ɗe inamuna madza naifanya: wao wafanyao trongo mauri ɗe zizo, kawatsowarithi Utawalizi wa Mungu.

22Ɓadi mavuna ya iRoho ɗe: uv̄endza, furaha, amani, suɓira, uwema, roho ndjema, uaminifu, 23utrulivu, na udzizia. Kav̄u Sharia ilio kinyume na trongo mauri ɗe zizo. 24Ɓadi wao walio wa Kristi-Insa waangamidza#5:24 waangamidza: iShigiriki isurongoa: wareme mizumari hari mwa muri wa pawa. ushiuɓinadamu na mav̄endzeleo yayo na ngushauku zayo. 25Iv̄o riẽshio ha iRoho, narendre wajau ha iRoho. 26Rasudzione, nariziye utukizana na uoneana uwivu.

Currently Selected:

MAGALATWIYA 5: swb

Highlight

Copy