MAGALATWIYA 4

1Trongo niirongoao ɗe ini: piya umuda muarithi alio mwanamutsa, waye katafautisha na murumwa hari mwa itsokao yotsi, wala ukana waye ɗe monyewe wa piya. 2Waye uv̄ingwa na walezi na madhwamana wa imali yahe, ata uwakati wahetsiwa na ɓaɓahe. 3Wasi wajau, wakati raka wanatsa, rika warumwa wa zinguvu ziv̄ingao ulemengu. 4Ɓadi wakati wamokamiliha, Mungu av̄eleha Mwana wahe, adzalwa na mutrumama, tsena hari mwa yamasharutwi ya iSharia, 5ile akombowe wao wakotawaliwa na iSharia, pare rifanyihe wana. 6Na ha iv̄o mulio wana, Mungu av̄eleha rohoni hatru iRoho ya uMwana wahe, ilio amba isurongoa ha nguvu: «Aɓɓa!» yaãni «Ɓaɓa!» 7Ɓasi ha izo, kusi tsena murumwa, ɓadi mwana. Na ha iv̄o ulio mwana, v̄av̄o wa muarithi, trongo yafanyiwa na Mungu.

Hamu za Ɓaulusu na uaminifu wa Magalatwiya

8Nyuma hule iv̄o kamwakomujua Mungu, mwakorumishia mauri warumwa miungu yilio amba ha ihali yayo, kayisi. 9Ɓadi av̄asa, iv̄o mumujuao Mungu, au amba mujulihanao na Mungu, namuna jeje mushindrao murudi raha hari mwa trongo zile kazina ushindzi tsena ndziv̄ungufu, ha utsaha muzirumishiye raha mauri warumwa wazo? 10Mususika hodari masharutwi ya zisuku, yimezi, ziwakati, na yimaha! 11Nisuria amba ihazi namurumishiani, kaina faida.

12Nisumumiani wananyangu, namuke mauri wami, iv̄o nilio mauri wanyu. Kamwanifanyia mbovu itsokao yotsi. 13Musujua amba ɓaanda ya uwaɗe ɗe namujudzani ha mara ya handra iIndjili. 14Wala ukana ihali ya umwili wangu ika ndziro hanyuju ne kamwanionea, wala kamwanirungamia. Ɓadi ha kinyume, munirenge mauri malayika ya Mungu, mauri ɗe Kristi-Insa. 15Ɓasi ifuraha mwaka nayo ya hav̄i? Mana nisumulawiani ushahidi amba na djeli ika trongo mukinishiha, mwatsodzivoɓoa ya matso, ne muniv̄ewo. 16Hali v̄anu tsifanyishiha ãduwi yanyu, mana nisumuambiani zikweli?

17iDjitihadi walionayo na wanyu, kayarahara. Wasutsaha wamuɓauseni [na wasi], pare mukane djitihadi na wao. 18Iyo trongo ndzuzuri ya ukana djitihadi ha nia ndjema, tsena ha daima, ɓadi tsi amba namoka v̄umoja na wanyu tu ɓasi. 19Wana wangu mulio amba tsina utungu wa madzazi raha na wanyu, ata mupaka Kristi afanyishihe moni hanyu! 20Natsov̄endza nike v̄umoja na wanyu av̄asa, ile nipare liji lastahiki, mana tsishanga ha kusudi na wanyu.

Mufano wa Hadjira na Sara

21Namuniambiye ɓasi, wanyu mutsahao muke hari mwa utawalizi wa iSharia, hali kamusukia iSharia? 22Mana v̄uangihwa amba Iɓrahima akana wana watruɓaɓa waili, umoja wa mutrumama murumwa, na umoja wa mutrumama munafasina. 23Ule wa umutrumama murumwa adzalwa ha uɗunga trongo za shiuɓinadamu, na ule wa umutrumama munafasina, adzalwa ha uɗunga uwahadi.

24V̄anu v̄wa fumbo: watruwashe waili wanu isurongoa yimikataɓa mili. uMoja, ule wa uMulima wa Sinayi, udzalia urumwa; na uwo ɗe Hadjira. 25Na Hadjira ɗe uMulima wa Sinayi|Mulima wa Sinayi hari mwa iAraɓiya, na waye asurengwa mauri ɗe iYerusalemu ya leo, mana ya hari mwa urumwa na uwana wayo. 26Ɓadi iYerusalemu ya uju ya hari mwa unafasi, na wiyo ɗe ilio mayatru. 27Mana v̄uangihwa:

«Ka na furaha, wawe mutrumushe kuna ndzao

ulio amba kwadza!

Hedza mishelemedzeo ya furaha,

wawe kwaparopara utungu wa madzazi!

Mana wana wa umutrumushe ajeledzewa,

wao wengi rahana wa ule aliona mutrumume#4:27 Ka na furaha... mutrumume: Namuangaliye Izaya 54:1..»

28Ɓasi yahusu wanyu wananyangu, mauri Isiaka, mwa wana wa uwahadi. 29Na ha inamuna amba ule aka adzalwa ha uɗunga trongo za shiuɓinadamu hale hule akotresa ule aka ha shiRoho, ɗe namuna ilio raha av̄asa. 30Na uMuangishio usurongoa trini? Amba: «Toa umutrumushe murumwa na umwana wahe, mana umwana wa umutrumushe murumwa katsoarithi v̄umoja na umwana wa umutrumushe munafasina.» 31Ha izo wananyangu, wasi karisi wana wa umutrumushe murumwa, ɓadi ra wa umunafasina.

Currently Selected:

MAGALATWIYA 4: swb

Highlight

Copy