MAGALATWIYA 3

iMahususu ɓaina ya iSharia na uaminifu

1He wanyu Magalatwiya mudzifanyao wajinga! Mbani ɗe amugangini? Ne muv̄enuliwa hadhwira matsoni hanyu Insa-Kristi, amba aremwa mizumari hari mwa muri wa pawa. 2Trongo nitsahao nijuwe hanyuju ɗe ini tu: Hali ɗe ha uɗunga iSharia ɗe mwadjaãliwa iRoho Ndzitwaharifu, au ɗe iv̄o mwakia ihaɓari ya uaminifu? 3V̄anu kweli amba murendreha wajinga namuna iyo? Ɓaanda mwaandrisa ha iRoho, amba av̄asa musuja mukamilishe ha ushindzi wa shiunadamu wanyu? 4Piya izo mwaziẽshi, amba ɓure-ɓure tu? Neka kweli amba ɓure-ɓure tu! 5Monyewe umudjaãliani iRoho, tsena ahidjirisao midjuza hari mwanyu, hali asuzifanya iv̄o muɗungao iSharia, au ɗe iv̄o mwakia ihaɓari ya uaminifu?

6Mauri ɗe Iɓrahima «amuamini Mungu, na iyo ɗe yafanyishiha muhakisho mbeli zahe#3:6 amuamini Mungu... mbeli zahe: Namuangaliye Mwandro 15:6 na Maromu 4:22..» 7Ɓasi v̄av̄o, namujuwe amba: wao waliona uaminifu ɗe walio «wana wa Iɓrahima». 8Tsena iv̄o uMuangishio Mutwaharifu waona rangu kaɓula amba Mungu atsokuɓali watru tsi Mayahudi ha uaminifu wawo, ɗe wamujudza Iɓrahima ihaɓari ndjema iyo amba: «Piya zinishani zitsoɓarikishiha ha indzia yaho.» 9Ha izo, wao waliona uaminifu waɓarikishiha v̄umoja na Iɓrahima, monyewe uaminifu.

10Kweli amba wao watriao tama zawo hari mwa uɗunga iSharia, wa hari mwa ulaãnifu, mana v̄uangihwa: «Alaãnishiha mutru yotsi alio amba kasuɗunga ha ukamilifu piya zaangihwa moni na ishio ya iSharia, tsena kasuzitsimidza.» 11Na tsena irahara amba kav̄u ahakishao mbeli za Mungu ha ndzia ya iSharia, mana v̄uangihwa: «Monyewe uhakikishiwa ha uaminifu, atsoẽshi.» 12Ɓadi iSharia kaisulawa hari mwa uaminifu. Mana v̄uangihwa: «Monyewe uɗunga trongo zizo, atsoẽshi ha ndzia yazo.» 13Kristi waye arikomboa na ilaãna ya iSharia ha ufanyiha laãna ɓadala yatru. Mana v̄uangihwa: «Alaãnishiha mutru yotsi alembedzewa hari mwa muri.» 14Na iyo pare iɓaraka ya Iɓrahima iwaswili ha zinishani zangina ha ndzia ya Kristi-Insa, amwesa ha uaminifu, ripare iRoho yaka yatolewa wahadi.

iSharia kaivundzu wahadi wa Mungu

15Wananyangu, nisuja nilaguwe ha shiunadamu: mukataɓa wamohisofungwa namuna yastahiki, kav̄usi mutru ajuao auzime, au auengedzeye nuktwa. 16Na v̄anu zinguwahadi zika ziv̄olwa Iɓrahima na shilembwe yahe. uMuangishio kausurongoa amba «na zizilembwe», mauri amba wengi, ɓadi usurongoa moja, «na ishilembwe yaho», na uwo ɗe Kristi. 17Trongo nitsahao niirongowe ɗe ini: Mukataɓa#3:17 Mukataɓa: Namuangaliye Mulawiyo 12:40. wafungwa na Mungu namuna yastahiki, kautsojua wazimwa na iSharia yaja ɓaanda ya maha aruɓamiya wa thalathini, trongo itsoɓuliao uwahadi wa Mungu. 18Na djeli umwaratha uka uja ha uɗunga iSharia, v̄av̄o kaitsoka tsena amba ulawa hari mwa uwahadi. Na v̄anu ha uwahadi ɗe Mungu amudjaãlia Iɓrahima urehema wahe.

iÃzima ya iSharia

19Ɓasi ãzima ya iSharia trini? Ika iengedzewa pare mahosa yav̄enuhe, ata mupaka aje iShilembwe ilio amba ika itolewa uwahadi. iSharia ika iv̄ingwa na malayika, ha umuhono wa muparanisa. 20Na muparanisa uwo, tsi muparanisa wa mutru moja; ɓadi Mungu, waye moja.

21Hali v̄anu iSharia isendra kinyume na zinguwahadi za Mungu? Ata hata! Na djeli v̄uka v̄utolwa Sharia ishindrao iv̄inge uhayati, v̄av̄o umuhakisho ha Mungu watsoja na iSharia. 22Ɓadi uMuangishio urongoa amba ulemengu piya uɓaliwa hari mwa madhambi, ile uwahadi udjaãliwe, ha uaminifu na Insa-Kristi, ha wao waaminio.

23Kaɓula ya uaminifu uja, rika rifungiha hari mwa ugogezi wa iSharia, ata mupaka uaminifu uv̄enulwe. 24Ha izo, iSharia ika mulezi watru ata umujilio wa Kristi, ile rikuɓalishihe ha uaminifu. 25Ata uaminifu uja yawo, karisi tsena utsini na mulezi.

26Mana ha ndzia ya uaminifu, mwa piyanyu wana wa Mungu ha uv̄umoja wanyu na Kristi-Insa. 27Kweli amba piya wanyu mwaɓaĩshiwa hari mwa uv̄umoja na Kristi, mumupindri Kristi. 28Kav̄u tsena Muyahudi wala Mugiriki, au murumwa wala munafasina, kav̄u tsena mutruɓaɓa wala mutrumama, mana wanyu piyanyu mwa moja hari mwa uv̄umoja wanyu na Kristi-Insa. 29Na neka wanyu wa Kristi, v̄av̄o mwa zilembwe za Iɓrahima, tsena mwa mawarithi ha uɗunga uwahadi.

Currently Selected:

MAGALATWIYA 3: swb

Highlight

Copy