2 MONYE 3
3
uMuregeo wa Raɓi
1Wanyu wav̄endzewa, lini av̄asa ɗe liɓarua la v̄ili nimuangishiaoni. Hari mwa yao maili, nisudjereɓu utsotsa fahamu, ile nitsongeshe hanyuju fikira iliona ãkili ndziraharifu, 2pare munahane marongozi yarongolwa rangu kaɓula na yimitrume mitwaharifu, na iãmuri mwajudziwayo na Mav̄ingizi-Risala yanyu, ãmuri ya Uwo alio Raɓi amma Muhuyifu.
3Tu raɓuzi, namujuwe amba hari mwa zisuku za mwiso, v̄utsoja wafudhuli wendza madharau watsendrao ha zingushauku zawo wenyewe. 4Ɓasi watsorongoa: «uWahadi wa mujilio wahe wa hav̄i? Mana rangu mida maɓaɓa yatru yafariki, kula shitru iɓaki mauri ɗe mwandroni mwa ulemengu.» 5Na v̄av̄o wasuɗela ha kusudi amba hale oho, v̄uka mbingu na shiv̄andre ya tsi ilio amba hari-hari na maji, tsena yafanyishiha ha maji, ihea ha urongozi wa Mungu, 6na ha yao raha ɗe lidunia la wakati uwo laangamia, lafinikiwa na maji. 7Na v̄anu ha urongozi ɗe uwo-uwo, ɗe zimbingu na ishiv̄andre ya tsi za av̄asa zahetsiwa ha ulindrilia umoro, zalishwa ya iSuku ya Hukuma, na uangamifu wa waovu.
8Ɓadi v̄wa trongo, wav̄endzewa, ilio amba kayalazimu mwaiɗela, ne ɗe: Ha Raɓi, suku moja mauri maha alifu, na maha alifu mauri suku moja. 9Raɓi kasuhomesa umutsimidzio wa uwahadi, mauri ɗe inamuna ɓaãdhwi waifikirio, ɓadi asusuɓiri mbeli zanyu, mana kasutsaha v̄waka ata moja aangamia, ɓadi piya wandre toɓa.
10iSuku ya Raɓi itsoja mauri mwidzi. Na isuku iyo zimbingu zitsov̄ira v̄umoja na keme ɓole, zitru za ãswili zitsolalusiwa ha moro, na ishiv̄andre ya tsi v̄umoja na zitrendrwa zayo zitsov̄enuha.
11Rangu piya zizo zitsoangamidziwao namuna iyo, ɓasi v̄av̄o mulazimu muke jeje? Ɗe ha muendreleo mutwaharifu v̄umoja na ĩɓada, 12ɗe mwalazimu mulindre na ujisa ha upesi#3:12 upesi: Mutru atsojua aelewe iShigiriki amba isurongoa: v̄av̄o muonao mwaha na iSuku ya Mungu, mufanyao djitihadi ije haraka. iSuku ya Mungu, ilio amba zimbingu zivuao zitsoangamia, na zitru za ãswili zitsolalusiwa ha moro. 13Ɓadi ha uɗunga wahadi wahe, wasi risulindra wingu muv̄ia na shiv̄andre ya tsi pia, v̄ulio amba v̄utsoka uhaki.
14Ha izo wav̄endzewa wangu, iv̄o mulindrao trongo zizo, namufanye djitihadi muparihanihe na waye ɓila pandra wala kosa hari mwa amani. 15Namurenge amba isuɓira ya Raɓi, iyo uhuyifu wanyu#3:15 wanyu: V̄wa zio za Shigiriki zirongoao: watru., mauri ɗe inamuna umwananya muv̄endzewa watru Ɓaulusu amuangishiani wajau, ha ihikima adjaãliwayo. 16Iyo ɗe itrongo airongoao moni na piya maɓarua yalio amba asulagua trongo zizo. Moni v̄wawo v̄usuparihana trongo zilio ndziro za uelewa, zilio amba watru kawaji tsena tsi wahodari ugaudza imana yazo, mauri ɗe inamuna wafanyao wajau na yiMiangishio yasalia, ha uangamifu wawo wenyewe.
17Ɓasi wav̄endzewa wangu, iv̄o madza mujuao trongo zizo rangu kaɓula, namuke hashiri mwasudzilishe mwav̄ingwa ha upotevu wa waovu, mwaja mwalatsishiwa na yakini hodari yanyu. 18Ɓadi namuhuwe hari mwa urehema na ujuzi wa Raɓi watru amma Muhuyifu Insa-Kristi. Utukufu naumuendreleye rangu av̄asa ata idahari. Amina.
Currently Selected:
2 MONYE 3: swb
Highlight
Share
Compare
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
