2 MAKORINTIYO 3

Warumishi wa Mukataɓa Muv̄ia

1Hali v̄av̄o risuandrisa tsena udzisifu wasi wenyewe? Au paka rike mauri ɓaãdhwi amba na maɓarua ya uriaminisha hanyuju, au yalawa hanyu? 2Wanyu ɗe mulio ɓarua latru, laangihwa rohoni hatru, lijulihwanao, tsena lisomwao na piya watru. 3Iv̄enuha amba wanyu mwa ɓarua lalawa ha Kristi, ladhwaminishiwa urumishi watru; ɓarua lilio amba kalaangihwa ha nyongo, ɓadi ha iRoho ya Mungu alio hayi, wala kalaangihwa hari mwa maɓao ya mawe#3:3 maɓao ya mawe: Musa uv̄olwa yahe ziSharia mahususu hari mwa umulima mutwaharifu, zika ziangihwa hari mwa maɓao ya mawe., ɓadi hari mwa maɓao ya mwili, hari mwa ziroho.

4Uwo ɗe utumainivu rilionawo mbeli za Mungu ha ndzia ya Kristi. 5Ɓila tsi amba ha iwasi yatru ɗe rishindrao ridzihetsiye itsokao yotsi amba yalawa ha wasi wenyewe, ɓadi ushindzi watru ulawa ha Mungu. 6Waye ɗe ariv̄a ushindzi wa uka warumishi wa mukataɓa muv̄ia; tsi mukataɓa waangihwa, ɓadi wa iRoho. Mana ule waangihwa#3:6 ule waangihwa: Iyo isurongoa umukataɓa wa handra, ne ɗe iSharia ya Musa. uv̄inga hari mwa ufa, ɓadi iRoho uv̄inga hari mwa uhayati.

Utukufu wa uMukataɓa Muv̄ia

7Na neka urumishi wahusu ile iv̄ingao hari mwa ufa, shitru ilio amba ziharufu zayo zika ziangihwa hari mwa maɓao ya mawe, yakoja na utukufu ha namuna amba Maisraila kawakoshindra wahetsi matso yawo hari mwa isura ya Musa ha siɓaɓu ya utukufu wayo, wala ukana amba uka shitru muv̄ira, 8ha namuna jeje urumishi wahusu iRoho kautsozidi utukufu? 9Ɓasi neka urumishi uv̄ingao hari mwa zifungo ukana utukufu, ha mara ngav̄i zaidi urumishi uv̄ingao muhakikisho wazidi utukufu? 10Kweli amba ile yakana utukufu, kayakana utukufu yamofanisiwa na utukufu muɓole unu kauna mufano. 11Na neka iyo yakov̄ira na ndzia ika ija na utukufu, ha mara ngav̄i zaidi iyo iɓakio daima itsokao hari mwa utukufu?

12Ɓasi ha iv̄o riliona utumainivu mauri ɗe uwo, rina uhodari wa kusudi. 13Wasi karisufanya mauri ɗe Musa akofinikia isura yahe ha shitamba, ile yaMaisraila wasuangaliye umumalidzio wa ile yakov̄ira. 14Ɓadi ãkili yawo ifanyiha ndziro. Mana ata leo uMukataɓa wa Hale wamosomwa, na ishitamba wiyo ile uka. Kayatolwa, mana iyo kailawa neka tsi hari mwa uv̄umoja na Kristi. 15Ata upara leo, iSharia ya Musa yamosomwa, shitamba ufinikia roho zawo. 16Ɓadi mutru amogauha ha Raɓi, ishitamba utolwa. 17Na Raɓi, waye ɗe iRoho, tsena v̄ahali iRoho ya Raɓi ilio, ɗe v̄ukao unafasi. 18V̄av̄o wasi piya sura zafunukulwa, risuv̄enua mauri hari mwa shiɗo utukufu wa Raɓi. Risugaudziwa rike mufano ɗe uwo-uwo, rikane utukufu ju la utukufu, trongo ifanyiwao na Raɓi, alio amba waye ɗe iRoho.

Currently Selected:

2 MAKORINTIYO 3: swb

Highlight

Copy