2 MAKORINTIYO 2

1Ha izo, hanguju tsirenge satua amba nasumuregeyeni naja namutriani huzuni raha. 2Mana neka nisuja nimutriyeni huzuni, mbani ɗe atsonifurahishao neka tsi ɗe wanyu namutriani huzuni? 3Tsiangiha namuna ile, pare namowaswili oho, nasutrilwe huzuni na wao walazimu wanifurahishe. Tsiyakinisha ha wanyu piyanyu amba ifuraha yangu, iyo yanyu piyanyu. 4Mana v̄umoja na utungu muɓole, usikitifu wa roho, tsena na matsozi ha uwengi ɗe namuangishiani, wala tsi ha umutriani huzuni, ɓadi ile mujuwe uzidifu wa umuv̄endzani nilionawo.

Swamaha ya umukosefu hari mwa iDjama Ndziwaminifu

5Neka v̄wa mutru atria huzuni, kanitria huzuni ɗe wami, ɓadi ɗe wanyu piyanyu, au nusu yanyu anga, ile nasutupe mupaka. 6Shifungo mutru uwo av̄olwayo na idjama, itosho, 7ha namuna amba ya ɓorwa mumuswamihi na umutrulidza, ile asuje azidishiwa na huzuni yatupa. 8V̄av̄o nisumutriani ɓari mumuonese mahaɓa. 9Madhumuni yangu raha ata namuangishiani, ɗe wami utsaha nidhiɓitishe neka mwa watuĩvu hari mwa piya zitrongo. 10Na uwo mwamuswamihi, wami wajau nisumuswamihi. Namoswamihi, neka amba v̄wa trongo ya wami uswamihi, ɗe ha siɓaɓu ya wanyu mbeli za Kristi, 11ile rasumulishe Shetwani arishindra, mana risujua mipango yahe.

iMana ata Ɓaulusu kahoma Troasi

12Uwaswili yangu Troasi ha siɓaɓu ya iIndjili ya Kristi, tsipara amba tsiɓuliwa mulongo na *Raɓi wa umurumishia. 13Ata ha izo, tsaka natrulia roho yangu, mana tsaka namupara mwananyangu wa shi uaminifu, Titusa. Ɓasi tsilaga watru v̄ale, tsilekedza Makadoniya.

Ushindrifu hari mwa uv̄umoja na Kristi

14Himida naimuendreleye Mungu ariv̄ingao daima hari mwa umusadjadja wa yamasherehi ya ushindrifu wahe, ha uv̄umoja watru na Kristi; na tsena, ha wasi, asuenedza kula v̄ahali iharufu ndzuzuri ya umujulihwano wahe. 15Mana amba haheju Mungu, wasi ɗe iharufu ndzuzuri ya Kristi ha wao wahuyiwao, na wao waangamiao. 16Ha wasalia ra harufu ya ufa iv̄ingao ufa, na ha uwasalia harufu ya uhayati iv̄ingao hari mwa uhayati. Ɓasi v̄av̄o mbani ashindrao trongo mauri ɗe iyo? 17Mana wasi karisi mauri watru wengi wafanyao ɓiashara urongozi wa Mungu; tsi jau, ɓadi ha umo warahara mbeli za Mungu, hari mwa uv̄umoja watru na Kristi, ɗe rilaguao amba watru wav̄elehwa na Mungu.

Currently Selected:

2 MAKORINTIYO 2: swb

Highlight

Copy