1 TIMUTAUSU 4

Mifahamisho kinyume na misomo ya trambo

1Na iRoho isurongoa dhwahiri amba hari mwa lidunia la mwiso, ɓaãdhwi watsoɓauha uaminifu, wadzifungamanise na roho ndzidangamanyifu na misomo ya shiushetwani 2yilio amba yiyo uja ha unafiki wa watru wendza marongozi ya trambo, walio amba likoho la unamuzi lawo hari mwa ndjema na mbovu uka mauri livudzwa ha shuma ya moro. 3Wasuɓalidza watru ungia hari mwa ndrolo na uwaãmurisha wasuɗye ɓaãdhwi ya zahula zilio amba Mungu aziumbu ziɗyiwe ha uhimidifu na wao waaminio, tsena wajuao ukweli. 4Kweli amba kula yaumbwa na Mungu, iyo ndjema, tsena kav̄usi ya uhara, neka isurengwa ha uhimidifu, 5mana kula shitru urahatsiha ha urongozi wa Mungu na mamilio.

Maosio ya Ɓaulusu hari mwa urumishi

6Wamoeleha zizo ha uwananya wa shi uaminifu, v̄av̄o utsoka murumishi mwema wa Kristi-Insa alisiwao ha marongozi ya uaminifu na umusomo mwema ulio amba uuɗungu ha uzuri. 7Ɓadi ɓauha mahadisi ya shidunia yao ya shikitaɓi-koko, ne udzishahilise na trongo za shiĩɓada. 8Madjereɓio ya shimwili ukana faida, ɓadi hari mwa trongo shashi, wakati ulio amba ĩɓada, iyo ukana faida hari mwa piya zitrongo, mana ina wahadi wa uhayati wa leo, ata uwo ujao.

9Uwo urongozi wastahiki uaminifu walazimu mukuɓalisho mukamilifu. 10iKusudi ata ridzirumao na udzisonga ɗe uka amba rihetsi tama yatru ha Mungu alio hayi, Muhuyifu wa piya uwanadamu, hususwani wao waaminio.

11Yao ɗe masariɓu yalazimu utowe na usomedza. 12V̄wasuke mutru adharau ushaɓaɓi waho, ɓadi ka ha uwatru waaminio mufano hari mwa marongozi, maendreleo, uv̄endza, uaminifu, na uraharifu. 13Ha ulindrilia niwaswili, dzihetsi usome ha hadhwira yiMiangishio Mitwaharifu, utriye ɓari, tsena usomedze. 14Usurumiye ha ushiɗa ineema ya urehema ilio moni haho, wadjaãliwayo ha marongozi ya shi mutrume yashukidziwa wakati wakadzwa yimihono na uwaɓole wa iDjama Ndziwaminifu.

15Dzihetsi ha ukamilifu hari mwa trongo zizo, udzifungamanise nazo ha kusudi, ile muendreleo-mbeli waho uv̄enuhe ha piya. 16Dzifahamishe iwawe yaho na musomo waho, tsena uendreleye ha djitihadi na trongo zizo. Mana wamorendra namuna iyo, utsohuyi iwawe yaho, na wao wahuvulishiao.

Currently Selected:

1 TIMUTAUSU 4: swb

Highlight

Copy