1 TIMUTAUSU 3
3
Masharuti ya uka dhwamana wa Djama Ndziwaminifu
1Urongozi unu kweli: neka mutru asutsashia uka dhwamana hari mwa Djama Ndziwaminifu, v̄av̄o asutsaha urumishi mwema. 2Ɓasi ilazimu dhwamana uwo ake ɓila tuhuma, mutrumume wa mutrumushe moja, ashindrodziziao, muekevu, mwendza hishima na mukariɓisa, tsena ashindre asomedze. 3Kalazimu aka mulevi, wala mumani, ɓadi makini, asuke muguguru, wala muv̄endza-marike. 4Alazimu aendrese ha uzuri muraɓa wahe, tsena ike amba wana wahe wa watuĩvu wendza mastaha yakamilishiha. 5Mana neka mutru kasushindra aendresa muraɓa wahe, ha namuna jeje atsoshindrao ahudumu iDjama Ndziwaminifu ya Mungu? 6Yasuke amba waye muv̄ia hari mwa uaminifu wahe na Kristi, ile asuje adziona, ata apuliha hari mwa mahukuma mauri ɗe ya Iɓilisa. 7Alazimu tsena akane sifa ndzuzuri ha watru wa v̄ondze, ile asuje apuliha hari mwa tuhuma, na hari mwa marambwe ya Iɓilisa.
Masharuti ya uka musaidizi wa Djama Ndziwaminifu
8uWasaidizi wa Djama Ndziwaminifu wajau walazimu wake watru wakasidi, wendza kauli moja, tsi walevi, wala wadziparia ha namuna kayalazimu. 9Walazimu wasike mihono mili iãdjaɓu ya uaminifu, ha roho ndziraharifu. 10Ilazimu watundwe raɓuzi neka kawasina tuhuma, iv̄o warumishihe hari mwa usaidizi.
11Na watruwashe wajau, walazimu wake watru wakasidi, ike amba wao kawatefwa, washindre wadziziye, wake waaminifu hari mwa kula trongo.
12Wasaidizi walazimu wake amba kula mutrumume na mutrumushe wahe, tsena walele ha uzuri wana wawo, na uendresa ha uzuri muraɓa wawo. 13Mana wao walio amba warumishia ha uzuri, wao udziparia ɓandza dzuzuri, na yakini yaswafishiha hari mwa uaminifu na Kristi-Insa.
Uɓole wa iÃdjaɓu ya shiUngu
14Nisuhuangishia zizo v̄umoja na itama amba tsi hale nitsoja nihuone. 15Ɓadi neka nisuhoma, itsoka amba ha zini usujua inamuna ya udziv̄inga moni na idjama ya Mungu, ilio iDjama Ndziwaminifu ya Mungu alio hayi, ilio raha amba ɗe ingidzo na umusingi wa ukweli. 16Ilazimu rikuɓali amba iãdjaɓu ya ĩɓada, iyo ɓole:
Waye av̄enuha ha mwili wa mwanadamu,
adhiɓitishiwa na iRoho, aonehwa na zimalayika,
ajudziwa hari mwa zinishani, aaminiwa ulemenguni,
ahedzewa hari mwa utukufu.
Currently Selected:
1 TIMUTAUSU 3: swb
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
