1 TIMUTAUSU 2
2
Misomo yahusu mamilio
1Kaɓula ya kula trongo, nisutsaha v̄uv̄elehwe ha Mungu hadja, mamilio, mirayilio, v̄umoja na himida ya wanadamu piya. 2Nazifanyiwe ha yamafalume na ha piya wendza ɓandza la yezi, ile riẽshi ha utrulivu na unafasi, ha trisidzo la Mungu v̄umoja na kula staha. 3Iyo ndzuzuri tsena umujiv̄idza Mungu Muhuyifu watru, 4atsahao amba piya wanadamu wahuyiwe, tsena wapare ujuzi wa ukweli. 5Mana v̄wa Mungu moja tu, tsena muparanisa moja ɓaina ya Mungu na wanadamu, ne ɗe Kristi-Insa, mwanadamu, 6adziv̄a waye-waye ake shiliv̄o ya ukombofu wa piya. Uwo ɗe ushahidifu watolewa wakati wawo wahetsiwa. 7Ushahidifu ulio amba wami tsifanyiha mujudzizi na Muv̄ingizi-Risala wawo, nisurongoa kweli ɓadi tsi trambo, tsena musomedza ha watru wa nishani zangina yahusu uaminifu na ukweli.
8Nisutsaha ɓasi amba hari mwa kula v̄ahanu, watruwaume wafanye mamilio ha uhedza mihono mitwaharifu, ɓila hadhaɓu wala mashindrano.
9Ɗe namuna iyo wajau amba watruwashe wapindre namuna yastahiki, ha mastaha na usitirifu. Wadzistawidze tsi amba ha ufanya musuko namuna kayastahiki, wala udziɗayidza ha dhahaɓu na lulu, au vao lendza thamani, 10ɓadi nawadzistawidze ha zitrendro ndjema zistahikio watruwashe wadzihetsio amba watru wahishimuo Mungu.
11Mutrumushe nasome ha ustamiyivu, na utuĩvu mukamilifu. 12Wami tsisuruhusu mutrumushe usomedza, ɓila utawalia mutrumume; nadzilishe mutrulivu. 13Mana Adamu ɗe aumbwa kadimu, iv̄o Hawa. 14Na Adamu tsi ɗe adanganyiwa, ɓadi umutrumushe, ɓaanda adanganyiwa, ɗe arendreha mukosefu. 15Ɓadi atsohuyiwa ha yamadzazi#2:15 yamadzazi: iShigiriki isurongoa v̄anu: ha udza yawo; au mutru atsojua aelewe tsena: ha umudzalio wa umwana., neka aɓaki hari mwa uaminifu, uv̄endza na utwaharifu, v̄umoja na uwekevu.
Currently Selected:
1 TIMUTAUSU 2: swb
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
