1 TIMUTAUSU 1
1
1Wami Ɓaulusu, Muv̄ingizi-Risala wa Kristi-Insa ha ãmuri ya Mungu Muhuyifu watru, na ya Kristi-Insa itama yatru, 2ha Timutausu, mwana wa kweli wangu hari mwa uaminifu: Neema, urehema na amani zilawao ha Mungu amma Ɓaɓa, na Kristi-Insa, Raɓi watru, nazihuendreleye.
Mifahamisho yahusu misomo ya trambo
3Mauri ɗe inamuna nahutafadali ulawa yangu ha uendra Makadoniya, amba uɓaki Efeso, pare usariɓiye ɓaãdhwi ya watru wasusomedze misomo yangina. 4Waambiye tsena wasudzishapise na mahadisi yatrungwa na zingurudhwa kazina mwiso za wadzaɗe, trongo ziv̄ingao hari mwa mashindrano, ɓadi tsi hari mwa umupango wa Mungu uparihanao ha uaminifu. 5iKusudi ya lisariɓu lini, ɗe uv̄endza ulawao ha umo warahara, na nafusi ndziraharifu ɓila tuhuma, v̄umoja na uaminifu wa kweli. 6V̄wa ɓaãdhwi wav̄a mengo trongo zini, wazinga hari mwa mahadisi maruv̄u. 7Wasutsaha wake mataãlamu wa iSharia, ɓila kawasuelewa izo warongoao, wala izo washadidishao.
8Kweli risujua amba iSharia ndjema neka mutru asuirumia namuna yalazimu. 9Risujua raha amba iSharia kayahetsiwa ya watuĩvu, ɓadi ya warendrezi-mbovu na wakaidi, makufari na maãswifu, watru kawastehi dini wala yotsi ya shiungu, maula maɓaɓa na mamama, maangamifu, 10ihetsiwa wajau ha wendza shahawa mbovu, watruɓaɓa waendreleanao, wao wafanyao ɓahazazi za wanadamu, wanafiki, walav̄izi wa trambo, wajau na kula yendrao kinyume na musomo mwema 11walingana na iIndjili ndzitukufu ya Mungu Monyewe ɓaraka, ilio amba tsidhwaminishiwayo.
Ɓaulusu asumuhimidia Mungu na irehema yahe
12Nisumuhimidia Kristi-Insa Raɓi watru, uwo anihodarisha iv̄o aniona muaminifu ha unidjukumisa hari mwa urumishi, 13wami nilio amba hale oho nakokufuru, nakotresa na uruhana. Ɓadi tsidjaãliwa urehema, mana nakorendra ɓila ujuzi, iv̄o tsakana uaminifu. 14Na urehema wa Raɓi watru uzidishiha, v̄umoja na uaminifu na uv̄endza ulio ha Kristi-Insa.
15Urongozi unu kweli, tsena ustahiki ukuɓaliwe ha namuna ndzikamilifu amba: Kristi-Insa aja ulemenguni ile ahuyi maãswifu, walio amba wami ɗe wa handra. 16Ɓadi tsidjaãliwa urehema pare hanguju, wa handra, Kristi-Insa aonese piya suɓira yahe, nike mufano ha wao watsomuaminio ile wapare uhayati mukamilifu. 17Ɓasi ha uMufalume wa daima, tsi mufa, tsi muonehana, Mungu weke wahe, nav̄uke hishima na utukufu daimani aɓada. Amina.
Wasia wa Ɓaulusu ha Timutausu
18liSariɓu nihuv̄aolo mwana wangu Timutausu, ha uɗunga marongozi ya shi mutrume yashukidziwa nyuma oho yahuhusu wawe, ɗe amba ulawana na yao, uwane ikondro ndjema, 19ha usika uaminifu v̄umoja na roho ndziraharifu ɓila tuhuma. V̄wa ɓaãdhwi walio amba wahara uvulishia likoho la unamuzi lawo, na ha izo uaminifu wawo uroro. 20Hari mwawo ɗe Himeni na Alisandrusa, walio amba tsiwajeledzea Shetwani, ile wafundrihe wasukufuru.
Currently Selected:
1 TIMUTAUSU 1: swb
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
