2 MATESALONIKA 3
3
Ɓaulusu asutsaha mamilio ha Matesalonika
1Yaɓaki v̄anu wananya wa shi uaminifu, namurifanyiye mamilio, ile urongozi wamuhusu Raɓi wendre mbeli amwesa utukuzihe, mauri ɗe inamuna ulio hanyu, 2tsena rikombolwe na watru wapeu tsena waovu; mana tsi piya ɗe waliona uaminifu. 3Ɓadi Raɓi, waye muaminifu, atsomuhodarishani na umuhifadhwini na uMovu|Movu. 4Ha uv̄umoja watru na Raɓi, risuyakinisha amba musufanya, tsena mutsofanya raha izo ramuambianizo. 5Raɓi naendrese roho zanyu hari mwa uv̄endza wa Mungu na ustahamilivu wa Kristi.
Ndjema mutru ufanya hazi
6Risumusariɓiani wananyatru ha lidzina la Raɓi Insa-Kristi, mudziɓause na kula mwananya wa shi uaminifu aliona maẽsha yendza musadjadja, ɓadi tsi ha uɗunga maosio ramuv̄aniwo. 7Wanyu-wanyu musujua inamuna yalazimu mudziv̄inge ha urenga mufano watru, mana karaẽshi v̄umoja na wanyu shi watru wendza musadjadja; 8karaɗya ɓure-ɓure shahula ya mutru atsokao yotsi. Ha kinyume, ridzirumu ha utaãɓifu, rifanya hazi uku na mutsana, ile rasuke djukumani ha mutru atsokao yotsi hari mwanyu. 9Tsi amba karakana ifurswa, ɓadi ritsaha rimuv̄eni hatruju mufano wa utiɓa. 10Mana kweli amba wakati raka v̄umoja na wanyu, rakomuv̄ani sariɓu lini: «Neka mutru kasutsaha afanya hazi, ɓasi v̄av̄o asuɗye».
11Na v̄anu risukia amba v̄wa ɓaãdhwi ya wanyu wasuẽshi ha shimusadjadja, kawasufanya trongo neka tsi ushahiliha na za wanyawo. 12Ɓasi watru wao risuwaãmurisha na uwatria ɓari ha lidzina la Raɓi Insa-Kristi, amba wafanye hazi ha utrulivu na uɗya nguvu za mwili zawo. 13Yahusu wanyu wananya wa shi uaminifu, mwasulemewe ufanya ndjema.
14Neka v̄wa mutru kasutuĩ marongozi yatru hari mwa liɓarua lini, namumutriye ãlama, tsena mwasushahilihe na waye hari mwa itsokao yotsi, pare aone haya. 15Ɓadi mwasumurenge amba ãduwi, ɓe namumurudi mauri mwananya.
Mamilio na masalamu
16Ɓasi Raɓi Monyewe utrulivu namuv̄eni waye-waye utrulivu kula wakati, ha kula namuna. Raɓi nake v̄umoja na wanyu piyanyu.
17Salamu lini nisuliangiha ha umuhono wangu wami Ɓaulusu. Unu ɗe umuhuri wangu hari mwa piya maɓarua yangu, iyo ɗe ihatwi yangu.
18iRehema ya Raɓi watru Insa-Kristi naimuendreleyeni piyanyu.
Currently Selected:
2 MATESALONIKA 3: swb
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
