1 MONYE 1
1
Masalamu
1Wami Monye, Muv̄ingizi-Risala wa Insa-Kristi, ha wao watsahulwa waẽshio shi wadjeni, tsena watsambadziwa hari mwa yimikaɓala ya Pontusu, Galatwiya, Kapadokiya, Aziya na Ɓitiniya. 2Mutsahulwa na Mungu amma Ɓaɓa, ha ulingana na inia akanayo rangu kaɓula, tsena mutwaharishiwa na iRoho, mukane utuĩvu ha Insa-Kristi na urenga fuvu hari mwa umutsambadzio wa idamu yahe: Urehema na amani nazimuendreleyeni ha uwengi.
Tama ilio hayi
3Naɓarikishihe Mungu amma Ɓaɓa wa Raɓi watru Insa-Kristi, alio amba ha urehema muɓole wahe, ariv̄a uhayati muv̄ia ha umuregezeo hayi wa Insa-Kristi ulawa ha uwafu, ile rikane tama ilio hayi, 4mwaratha tsi muangamivu, ɓila pandra, wala unyaivu, mwalishiwawo pev̄oni, 5wanyu mutundwao na ushindzi wa Mungu ha ndzia ya uaminifu, ile mupare uhuyifu ulio tayari uv̄enulwe hari mwa uwakati wa mwiso. 6Namufurahi na trongo iyo, wala ukana av̄asa hari mwa mwana muda, ukiri uka mungiliweni huzuni ha siɓaɓu ya madjereɓio ya namuna na namuna. 7Yao yaja ile yav̄ime ukweli wa uaminifu wanyu, uaminifu uliona faida rahana dhahaɓu ndziangamivu, wala ukana iyo udhiɓitishiwa ha moro. Na uaminifu wanyu uwo ɓaanda wadhiɓitishiwa, ufanyiha siɓaɓu ya sifa, utukufu na hishima wakati wa umuv̄enulio wa Insa-Kristi 8alio amba kamwamuona, ɓadi wanyu umuv̄endza. Na ata av̄asa wala ukana kamusumuona, ne musumuamini, ata musungiliwa na furaha ndzitukufu kaieledzesheha, 9iv̄o muparao ikusudi ya uaminifu wanyu, ne ɗe uhuyifu wa roho zanyu.
10Uhuyifu uwo, yimitrume yakojudza marongozi washukidziwa ju la urehema mwahetsiwa, yiutwalia na uzunguha ikweli yawo. 11Wakozunguha wajuwe amba wakati trini, na ha namuna jeje zitsohidjirio zitrongo zarongolwa na iRoho ya Kristi yaka hawoju, Roho ilio amba ijudza rangu kaɓula matungu ya Kristi na utukufu wakoja uɗunge v̄av̄o. 12Wav̄enuliwa amba kawakodzirumishia wenyewe ɓadi wanyu hari mwa trongo zizo, zilio amba av̄asa mujudziwazo na wao wamutekelezeani iHaɓari Ndjema ha iRoho Ndzitwaharifu yav̄elehwa ulawa pev̄oni, trongo zilio amba ata zimalayika, ne zatsov̄endza zizielewe.
Uẽshi ha utwaharifu
13Ha izo, namuke na fikira zanyu, muke hashiri, tsena muhetsi tama ndzikamilifu yanyu hari mwa irehema itsomujiliaoni wakati wa umuv̄enulio wa Insa-Kristi. 14Mauri wana watuĩvu, mwasudzilishe mwatawaliwa na zingushauku mwakanazo nyumeni hule, wakati raha kamwakana ujuzi. 15Ɓadi mauri ɗe inamuna Uwo amuhirani alio mutwaharifu, wanyu wajau namufanyihe watwaharifu hari mwa piya muendreleo wanyu, 16mana v̄uangihwa: «Mutsoka watwaharifu, mana wami mutwaharifu.»#1:16 Namuangaliye Walawi 11:44,45; 19:2; 20:7.
17Na neka musumumia Mungu ha umuhira Ɓaɓa, Monyewe uhukumu kula mutru na zitrendro zahe ɓila uv̄endzelea, ɓasi namudziv̄inge v̄umoja na trisidzo wakati raha mulio shiv̄andreju mwa tsi. 18Namujuwe amba tsi ha zitru muangamia mauri fedha au dhahaɓu ɗe mwakombolwa hari mwa yamaendreleo kayana mana mwayawarithi ha wadzaɗe wanyu, 19ɓadi ha idamu yendza kima ɓole ya Kristi, mauri ya mwana ɓariɓari kana shifeli wala pandra. 20Atsahulwa rangu kaɓula, raha lidunia kalaka laumbwa, tsena av̄enulwa hari mwa uwakati wa mwiso unu ha faida yanyu, 21mulio amba ha ndzia yahe, musumuamini Mungu, waye amuregeza hayi ulawa ha uwafu, amwesa amuv̄a utukufu, ha namuna amba uaminifu wanyu na itama yanyu za ha Mungu.
22Ɓaanda mwadzitwaharisha ziroho ha utuĩ ikweli, pare mukane huɓa ya shiunanya ɓila unafiki, ɓasi namuv̄endzane wanyu na wanyu ha djitihadi na roho yarahara. 23Kweli amba muv̄olwa uhayati muv̄ia, tsi ha mbeu muangamia, ɓadi ha mbeu tsi muangamia, ha urongozi ulio hayi tsena ulio v̄av̄o wa Mungu. 24Mana v̄uangihwa:
«Kula shiumbe yendza roho, iyo mauri ɗavu,
na kula utukufu wayo, mauri ga la liɗavu.
Ɗavu, lilo uhuma, na liga upuliha,
25ɓadi urongozi wa Mola wa v̄av̄o dahari.»#1:25 Namuangaliye Izaya 40:6-8.
Na urongozi uwo, ɗe iHaɓari Ndjema mwajudziwayo.
Currently Selected:
1 MONYE 1: swb
Highlight
Share
Compare
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
