YAKOƁU 5

Mifahamisho ha matadjiri wadhulumuo

1Av̄asa yahusu wanyu matadjiri, namulile na ushelemedza ha siɓaɓu ya maondo yajao yamupareni! 2Utadjirifu wanyu uolo, na nguo zanyu ziv̄etsewa na maɓiɓi. 3iDhahaɓu na ifedha yanyu zingia kutsu. Na kutsu yazo itsolawa ushahidi kinyume na wanyu, itsoɗya yimili yanyu mauri moro. Mudzingulidzia dafine hari mwa zisuku za mwiso. 4Tsini yimiliv̄o kamwayiliv̄a ya watru wa hazi wavuna yimindra yanyu yisushelemedza, na zikeme za wavunizi ziwaswili makioni ha Mola Monyewe Ushindzi. 5Muẽshi shiv̄andreju mwa tsi ha masterehi na mujiv̄idzio. Mudzinyeresa nafusi ha isuku ya utsindzwa. 6Muhukumu na uula mwendza haki, wala kasumulimbiani.

Masariɓu ya mwiso

7Ɓasi wananyangu, namukane suɓira ata umujilio wa Raɓi. Namufikiri tu mulimizi namuna alindrao v̄umoja na suɓira yamavuna yendza faida ya ishiv̄andre ya tsi, rangu vua za handra ata za mwiso. 8Wanyu wajau namukane suɓira, muhodarishe roho zanyu, mana umujilio wa Raɓi ukuruɓia. 9Mwasungurume wanyu na wanyu, wananyangu, pare mwasuhukumulwe. Tsuwo, hakimu ahimi mulongoju.

10Hari mwa trongo ya djondo na suɓira wananyangu, namurenge mufano yimitrume yalagua ha lidzina la Mola. 11Wasi urongoa amba waɓarikishiha wao wastahamili. Mukia amba v̄urongolwa ustahamilifu wa Ayuɓa, tsena muono umwiso Mola amudjaãliawo, kiasi Mola aliona urehema na poreho ha uwengi.

12Hususwani wananyangu, mwasulav̄e, tsi na uwingu, wala ishiv̄andre ya tsi, wala ha namuna ya shilav̄io itsokao yotsi yangina. Ɓadi «ewa» yanyu naike ewa, na «ãhã» yanyu ike ãhã, ile mwasupulihe hari mwa hukuma.

Mamilio yendza uaminifu

13Hali v̄wa mutru mengoni mwanyu alio hari mwa djondo? Nafanye mamilio. Hali v̄wa alio hari mwa furaha? Nahedze utende. 14Hali v̄wa mutru mengoni mwanyu alio muwaɗe? Nahire uwaɓole wa iDjama Ndziwaminifu wamufanyiye mamilio ha umuv̄aha matra ha lidzina la Raɓi. 15Mamilio yendza uaminifu yatsohuyi umuwaɗe, na Mola atsomumidza. Neka afanya madhambi, atsoswamihiwayo. 16Ɓasi namukuɓaliane madhambi yanyu wanyu na wanyu, tsena mumiliane Mungu wanyu na wanyu, ile pare muangale. Mumilio-Mungu wa mutuĩvu, uwo na ushindzi muhodari wa urendra.

17 Eliya aka mwanadamu mauri ɗe wasi. Afanya mamilio ha djitihadi amba v̄wasushuke vua, ɓasi kav̄washuka vua shiv̄andreju mwa tsi muda wa maha miraru na mezi sita. 18Amwesa afanya mamilio ha mara yangina, ɓasi uwingu ushukidza vua, na ishiv̄andre ya tsi itowo mavuna yayo.

19Wananyangu, neka mutru mengoni mwanyu adziɓausa na ikweli, ɓasi amba wangina amuregeza, 20namujuwe amba monyewe uregeza muãswifu v̄ahanu alatsiha, atsomuhuyi iroho na ufa, amwesa atsotsonga muzimio wa wengi wa madhambi.

Currently Selected:

YAKOƁU 5: swb

Highlight

Compare

Copy