1 YUHANI 4

Namutunde ziroho ile mujuwe neka za shi Mungu

1Wav̄endzewa wangu, mwasuamini kula roho, ɓadi namutunde ziroho, ile mujuwe neka za shi Mungu, mana v̄uenea ulemenguni wengi wadzifanyao amba wasujudza marongozi ya shi mutrume washukidziwa. 2Ɗe ha ini ɗe mujuao iRoho ya Mungu: kula roho ikuɓalio amba Insa-Kristi|Insa aja shimwili, iyo ya shi Mungu. 3Na kula roho kaisumukuɓali Insa, iyo tsi ya shi Mungu; iyo ya shi Mukanyusha-Kristi mwakia amba asuja, tsena madza alio ulemenguni.

4Wanyu wana wangu, wanyu wa shi Mungu, tsena mushindri wale, mana Uwo alio moni hanyu, muɓole raha na ule alio moni na ulemengu#4:4 ule alio moni na ulemengu: Urongozi unu usumurongoa Iɓilisa.. 5Wao wa shiulemenguni, iyo ɗe imana ata urongozi wawo wa shiulemenguni, na ulemengu usuwavulishia. 6Wasi wa shi Mungu, na uwo amujuao Mungu, urivulishia; uwo tsi wa shi Mungu karivulishia. Ɗe ha izo ɗe rijuao iRoho ya ikweli, na iroho ya itrambo.

Mungu waye mahaɓa

7Wav̄endzewa wangu, nariv̄endzane, mana uv̄endza ulawa ha Mungu na yotsi av̄endzao udzalwa shi Mungu, tsena umujua Mungu. 8Uwo kasuv̄endza kamuji Mungu, mana Mungu waye mahaɓa. 9Tsini inamuna uv̄endza ya Mungu yav̄enuha hatruju: Mungu av̄eleha Mwana moja-moja wahe ulemenguni, pare rikane uhayati ha waye. 10Na iuv̄endza, iyo tsi amba wasi rimuv̄endze Mungu, ɓadi amba waye ariv̄endze, tsena av̄eleha Mwana wahe ake sadaka liripariao swamaha la madhambi yatru. 11Wav̄endzewa wangu, neka amba Mungu ariv̄endze namuna ini, rilazimu wasi wajau riv̄endzane. 12Kav̄u mutru aparomuona Mungu. Neka risuv̄endzana, Mungu uẽshi moni hatru, na uv̄endza yahe ukamilishiha moni hatru.

13Ha ini risujua amba ra hari mwa uv̄umoja na Mungu, na waye na wasi, ɗe iv̄o ilio amba ariv̄a fuvu hari mwa iRoho yahe. 14Na wasi riono, tsena risulawa ushahidi amba Ɓaɓa av̄eleha uMwana amba Muhuyifu wa ulemengu. 15Uwo akuɓalio amba Insa ɗe uMwana wa Mungu, Mungu uẽshi hari mwa uv̄umoja na waye, na waye hari mwa uv̄umoja na Mungu. 16Na wasi risujua uv̄endza Mungu alionayo na wasi, na wasi riiamini.

Mungu waye mahaɓa. Na uwo aẽshio hari mwa mahaɓa, waye uẽshi hari mwa uv̄umoja na Mungu, na Mungu uẽshi hari mwa uv̄umoja na waye. 17Ha namuna iyo uv̄endza ikamilishiha hatruju, ile rikane yakini iSuku ya Hukuma, mana namuna alio waye, ɗe namuna wasi wajau rilio ulemenguni v̄anu. 18Faza kaika hari mwa uv̄endza, na uv̄endza yakamilishiha utradza ifaza, mana faza uɗungwa na shiv̄ondro; uwo aliona faza, kakamilishiha hari mwa uv̄endza.

19Na wasi risuv̄endza, mana waye ariv̄endze kadimu. 20Neka mutru asurongoa amba asumuv̄endza Mungu, ne asuenga munyahe, waye munafiki. Mana uwo kasuv̄endza munyahe ule amuonao, kashindri uv̄endza Mungu alio amba kasumuona. 21Na wasi rina ãmuri ini yalawa hahe: uwo amuv̄endzao Mungu, nav̄endze munyahe wajau.

Currently Selected:

1 YUHANI 4: swb

Highlight

Compare

Copy