1 YUHANI 3

Wasi wana wa Mungu

1Namuone ɓasi uv̄endza jeje Ɓaɓa arineemesha, ata rihiriwe wana wa Mungu. Na iyo ɗe rilio. iMana ata ulemengu kausurijua, ɗe iv̄o kawamujua. 2Wav̄endzewa wangu, av̄asa ra wana wa Mungu, na iyo ritsokao, raha kayav̄enulwa. Ɓadi risujua amba wakati atsov̄enuhao, ritsoka mauri waye, mana ritsomuona hali alio. 3Yotsi aliona tama iyo na Kristi udzitwaharisha, mauri waye namuna alio twahara.

4Yotsi aãswio, uvundza wajau iSharia; na dhambi, lilo uvundzifu wa Sharia. 5Na wanyu musujua amba waye av̄enuha, ile atowe lidhambi. Na kav̄usi dhambi haheju. 6Yotsi akao hari mwa uv̄umoja na waye, waye kaãswi; yotsi aãswio, uwo kamuona, wala kamuji.

7Wana wangu, v̄usuke ata mutru amupotezani. Uwo arendrao uhaki, waye mwendza haki, mauri waye Insa-Kristi, namuna alio wa haki. 8Uwo aãswio, waye wa Iɓilisa, mana Iɓilisa uãswi rangu ãswili. Iyo ɗe imana ata uMwana wa Mungu av̄enuha, ile aangamidze zitrendrwa za Iɓilisa. 9Mutru yotsi adzalishiha shi Mungu waye kaãswi, mana ihali ya Mungu uɓaki moni hahe. Kashindri uãswi iv̄o adzalishiha shi Mungu. 10Ɗe ha izo ɗe v̄ujulihanao uwana wa Mungu, na uwana wa Iɓilisa: yotsi kasurendra uhaki, waye tsi wa Mungu, mauri uwo kav̄endze mwananyahe wa shi uaminifu.

Uv̄endza wa shiunanya

11Tsini ihaɓari mwaikia rangu mwandro: nariv̄endzane. 12Rasuke mauri Kayinu, alio amba aka wa uMovu|Movu, tsena amuula mwananyahe. Na manatrini amuula? Mana zitrendro zahe zika mbovu, na za mwananyahe zika za haki. 13Mwasudzishangidze wananyangu neka amba dunia lisumuengani. 14Wasi risujua amba rilawa ufaju, ringia hari mwa uhayati, rangu riv̄endzao uwananya wa shi uaminifu. Uwo kasuv̄endza, uɓaki ufaju. 15Yotsi aengao munyahe, waye muula, na musujua amba kav̄u muula alio amba uhayati wa daima uka moni hahe.

16Ha zini risujua uv̄endza: ɗe amba waye Insa av̄a uhayati wahe ha faida yatru. Wasi wajau, rilazimu riv̄e uhayati watru ha faida ya uwananya. 17Neka mutru ana zingutadjiri za ulemengu, ne asuona mwananyahe hari mwa usongefu na roho yahe kaisina poreho, ɓasi namuna jeje uv̄endza wa Mungu ukao moni hahe? 18Wana wangu, rasuv̄endze ha urongozi na hanyo tu, ɓadi ha zitrendro na zikweli.

Yakini yatru mbeli za Mungu

19Ha izo ritsojua amba wasi wa ikweli, tsena ritsotrulidza umo watru mbeli zahe. 20Mana neka umo watru usurisingidzia, Mungu muɓole rahana umo watru, tsena waye ujua piya.

21Wav̄endzewa wangu, neka umo watru kausurisingidzia, v̄av̄o rina yakini mbeli za Mungu. 22Yotsi rimiao, wasi uipara na waye, mana risusika ãmuri zahe, amwesa risufanya zimujiv̄iao. 23Na tsini ãmuri yahe: amba riamini ha lidzina la uMwana wahe Insa-Kristi, tsena riv̄endzane wasi na wasi, mauri ɗe inamuna ariãmurisha. 24Uwo aɗungao ãmuri zahe, uka hari mwa uv̄umoja na Mungu, na Mungu na waye. Na wasi ujua amba a hari mwa uv̄umoja na wasi ha iRoho ariv̄ayo.

Currently Selected:

1 YUHANI 3: swb

Highlight

Compare

Copy