1 YUHANI 2
2
1Wanyu wana wa shi uaminifu wangu, nisumuangishiani zini ile pare mwasuãswi. Ɓadi neka mutru aja aãswi, rina mudailizi mbeli za Ɓaɓa, waye Insa-Kristi, alio wa haki. 2Waye-waye ɗe lisadaka liripariao muswamaha madhambi yatru, wala tsi ɗe yatru tu ɓasi, ɓadi wajau na ya ulemengu kamili.
Ãmuri ya hale, tsena ya av̄asa
3Na ha ini ɗe rijuao amba risumujua: ɗe wasi usika ãmuri zahe. 4Monyewe urongoa amba asumujua ɓila usika ãmuri zahe, waye munafiki, na ikweli kaisi haheju. 5Ɓadi mutru asikao urongozi wahe, uv̄endza wa Mungu ha kweli uswafishiha haheju. Ha ini ɗe rijuao amba ra hari mwa uv̄umoja na waye: 6ɗe amba uwo arongoao amba a hari mwa uv̄umoja na waye, alazimu adziv̄inge mauri ɗe inamuna waye adziv̄inga.
7Wanyu wav̄endzewa wangu, ini tsi ãmuri pia ɗe nimuangishiaoni, ɓadi ãmuri ya hale mwakanayo rangu mwandro. Ãmuri ya hale ini ɗe urongozi mwaukia. 8Ata wala ukana, ini ãmuri pia ɗe nimuangishiaoni, trongo ilio kweli haheju, amwesa na hanyu, mana ishidza isulawa, na iheu ya kweli madza isuwala.
9Mutru arongoao amba a heuni, ne asuenga munyahe, v̄av̄o raha a shidzani. 10Mutru av̄endzao munyahe, uɓaki heuni, na haheju kav̄uka siɓaɓu ya umukwalisa. 11Ɓadi mutru aengao munyahe, a shidzani. Asendra hari mwa shidza, tsena kasujua v̄ahanu andrao, mana shidza imuulu yamatso.
Musufunganise roho zanyu na ulemengu
12Nisumuangishiani wana wangu,
mana madhambi yanyu yaswamihiwa ha siɓaɓu ya lidzina lahe.
13Nisumuangishiani wanyu maɓaɓa,
mana musujua uwo alio rangu mwandro.
Nisumuangishiani mashaɓaɓi,
mana mushindri uMovu|Movu.
14Tsimuangishiani wanyu wana,
mana musumujua Ɓaɓa.
Tsimuangishiani wanyu maɓaɓa,
mana musumujua uwo alio rangu mwandro.
Tsimuangishiani mashaɓaɓi,
mana wanyu wahodari,
mana urongozi wa Mungu usuketsi hanyuju,
amwesa mushindri uMovu.
15Mwasuv̄endze lidunia, ɓila zilio duniani. Neka mutru asuv̄endza lidunia, uv̄endza wa Ɓaɓa kauka haheju. 16Mana kula ilio duniani, mauri ngushauku mbovu za shimwili, utumainivu wa matso, na udzifaharisha na mali, izo piya kazilawa ha Ɓaɓa, ɓadi ha lidunia. 17liDunia lisuv̄ira, na ngushauku zalo wajau. Ɓadi monyewe ufanya mav̄endzeleo ya Mungu, waye uɓaki dahari.
Mufahamisho kinyume na Makanyusha-Kristi
18Wana wangu, ini ɗe isa ya mwiso. Mauri ɗe inamuna mwakia amba v̄wa Mukanyusha-Kristi ajao, ɓasi v̄anu v̄uhimi makanyusha-Kristi wengi. V̄av̄o risujua amba ini ɗe isa ya mwiso. 19Walawa hatru, ɓadi kawaka watru watru. Na djeli waka watru watru, itsoka amba waɓaki na wasi. Ɓadi walawa, ile iv̄enuhe amba tsi piyawo walio watru watru.
20Ɓadi wanyu mudjukumisiwa na uMutwaharifu, tsena piyanyu muna ujuzi. 21Tsimuangishiani tsi amba mana kamusujua ukweli, ɓadi mana musuujua, tsena kav̄u trambo ilawao hari mwa ukweli. 22uMunafiki ɗe mbani, neka tsi ɗe uwo aharao amba Insa ɗe Kristi#2:22 Kristi: Yaãni, ɗe uMutsahuliwa wa Mungu.? Uwo ɗe uMukanyusha-Kristi, uwo amuharao Ɓaɓa na uMwana. 23Yotsi aharao uMwana, kasina wajau Ɓaɓa; uwo akuɓalio uMwana, ana wajau Ɓaɓa.
24Yahusu wanyu, ihaɓari mwaikia rangu mwandro, naiɓaki hanyuju. Neka trongo mwaikia rangu mwandro isuɓaki hanyuju, mutsoɓaki wajau hari mwa uv̄umoja na uMwana na Ɓaɓa. 25Na uwahadi ariv̄a ɗe unu, ɗe uhayati wa daima.
26Tsimuangishiani zini husuana na wao watsahao wamupotezeni. 27Yahusu wanyu, umudjukumisio mwaupara ulawa hahe, nauɓaki moni hanyu, tsena tsi paka mutru amusomedzeni; ɓadi rangu umudjukumisio wahe usumusomedzani zitrongo piya, na uwo kweli, wala tsi trambo, namuɓaki hari mwa uv̄umoja na waye, mauri ɗe inamuna uwo wamusomedzani.
28Av̄asav̄anu wana wangu, namuɓaki hari mwa uv̄umoja na waye, ile pare wakati yotsi atsov̄enuhao, rikane yakini, tsena v̄wasuke ata aĩɓu moja yariɓausa na waye suku ya muv̄enulio wahe.
29Neka musujua amba waye mwendza haki, namujuwe amba yotsi arendrao uhaki, uwo adzalishiha shi waye.
Currently Selected:
1 YUHANI 2: swb
Highlight
Share
Compare
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
