1 MAKORINTIYO 3

iSiɓaɓu ya umutsapushiano wa iDjama Ndziwaminifu

1Hanguju wananyangu, tsi mauri ha watru wav̄ingwao na iRoho ɗe nashindra nalagua na wanyu, ɓadi ha watru wadziv̄ingao shiuɓinadamu, mauri ha watru walio wanazaza hari mwa uv̄umoja wawo na Kristi. 2Tsimuv̄ani dzia, ɓadi tsi shahula mangavu, mana kamwatsoshindra, wala ata av̄asa ne kamushindri. 3Mana raha musudziv̄inga shiuɓinadamu. Rangu hari mwanyu v̄ulio uwivu na umani, v̄av̄o kamusi shiuɓinadamu? Hali kamusudziv̄inga ha namuna ya shi ulemengu? 4Moja amorongoa: «Wami wa Ɓaulusu», na wangina: «Wami wa Aɓulusu», hali v̄av̄o kamusi shiuɓinadamu?

5Afa Aɓulusu mwa, uwo mbani? Na Ɓaulusu ɗe mbani? Warumishi walio amba ha indzia yawo ɗe mwaja mwaamini, ha ikiasi Raɓi av̄a kula moja hari mwasi. 6Wami tsitaɓu, Aɓulusu atria maji, ɓadi Mungu ɗe ahudzao. 7Ha izo, tsi ule ataɓuo ɗe alio muhimu, wala tsi ɗe ule atriao maji, ɓadi Mungu ahudzao. 8Ule ataɓuo na ule atriao maji, wao sawa, na kula moja atsopara thawaɓu yahe ulawana na ihazi yahe monyewe. 9Mana wasi washangirizi wa Mungu rifanyao hazi v̄umoja na waye; wanyu ɗe lishamba la Mungu, amma ɗe umuundrio wa Mungu.

10Ha ineema ya Mungu nadjaãliwayo, tsihedza musingi mauri muundrizi mwendza hikima, na wangina asuundra uju mwawo. Ɓadi kula moja nafahamu na inamuna yahe aundrao uju. 11Mana kav̄usi mutru ashindrao ahedze musingi wangina ɓadala ya ule wahedzewa, na uwo ɗe Insa-Kristi. 12Neka mutru asuundra uju na musingi uwo ha dhahaɓu, au fedha, au ha mawe yendza thamani, au miri, au unyasi, au tsaha, 13v̄av̄o hazi ya kula mutru itsoonehana, mana iSuku ya Hukuma itsoionesa. Itsov̄enulwa ha moro, na umoro ɗe utsotoao udhiɓitifu wa inamuna ya ihazi ya kula mutru. 14Neka ihazi mutru aifanya uju na umusingi istahamili, v̄av̄o uwo atsopara thawaɓu. 15Ɓadi neka ihazi ya mutru aifanya ivuwu ata ikomo, monyewe atsoparwa na hasara; waye kweli atsohuyiwa, ɓadi mauri ha uv̄ira moni na jenge la moro.

16Hali kamusujua amba wanyu nyumba ndzitwaharifu ya Mungu, na iRoho ya Mungu isuẽshi moni hanyu? 17Neka mutru asuangamidza inyumba ndzitwaharifu ya Mungu, Mungu atsomuangamidza. Mana inyumba ndzitwaharifu ya Mungu, iyo twahara, na inyumba ndzitwaharifu iyo, ɗe wanyu.

18V̄wasuke ata mutru adzilaɓa: neka mutru mengoni mwanyu asudziona mauri mwendza hikima, hikima ya shi duniani, nafanyihe mujinga, ile afanyihe mwendza hikima. 19Mana hikima ya ulemengu unu, iyo ujinga mbeli za Mungu. Mauri ɗe iheli yaangihwa moni na uMuangishio Mutwaharifu: «Waye usika wendza hikima hari mwa udjandja wawo.» 20Na tsena: «Mola ujua fikira za wendza hikima, amba kazina mana.»#3:20 Namuangaliye Utende 94:11. 21Ɓasi v̄av̄o v̄usuke mutru adziparia sifa ulawana na wanadamu; mana piya zanyu, 22neka Ɓaulusu, au Aɓulusu, au Sefasi#3:22 Sefasi: Yaãni, ɗe Monye., au ulemengu, au uhayati, au ufa, au trongo za leo, au izo zijao. Piya zanyu, 23ɓadi wanyu wa Kristi, na Kristi wa Mungu.

Currently Selected:

1 MAKORINTIYO 3: swb

Highlight

Copy