1 MAKORINTIYO 2
2
Mujudzio wa Ɓaulusu wahusu umuri wa pawa
1Hanguju wananyangu, wakati naja hanyu, tsi v̄umoja na luha yendza faswaha au hikima ɗe naja namujudzani#2:1 namujudzani: V̄wa zio za Shigiriki zirongoao v̄anu: umujudzani yangu isiri ya [ukweli wa] Mungu. isiri yamuhusu Mungu. 2Mana tsiãzimia nasujuwe trongo yangina hanyuju neka tsi Insa-Kristi, waye alio amba aremwa mizumari hari mwa muri wa pawa. 3Wami-wami uka yangu hanyu, tsikana ulemevu na faza, tsena na mudridrimio wendza nguvu. 4Hutuɓa yangu na mujudzio wa ihaɓari wangu kazaka zaketsi hari mwa marongozi yendza hikima yaswadikishao, ɓadi hari mwa uv̄enufu wa iRoho ya Mungu v̄umoja na ushindzi, 5ile uaminifu wanyu usuketsi hari mwa ihikima ya shiuɓinadamu, ɓadi hari mwa ushindzi wa Mungu.
Hikima ya Mungu
6Na v̄av̄o, kweli amba risujudza hikima hari mwa watru waaminifu wakamiliha shiroho, ɓadi hikima ilio amba tsi ya ulemengu unu, wala tsi ya matawalizi wa lidunia lini, walio amba wahetsiwa wandre waangamidziwe; 7risujudza ihikima ya Mungu yendza siri tsena yatsitswa, ilio amba Mungu aka aiãzimia ha utukufu watru rangu kaɓula madza ina mida. 8Kav̄u ata mutawalizi moja wa ulemengu unu ajua hikima ini, mana na djeli waka waijua, kawatsomurema mizumari murijuRaɓi mwendza utukufu. 9Ɓadi mauri ɗe iheli yaangihwa moni na uMuangishio Mutwaharifu:
«Trongo zilio amba dzitso kalaziona, kio kalazikia,
wala kazangia hari mwa umo wa mwanadamu,
trongo zilio amba Mungu azitayarishia wao wamuv̄endzao.»
10Ne ɗe Mungu ariv̄enushiazo wasi ha iRoho. Mana iRoho utunda piya, ata zilio hari mwa zilindri zahe Mungu. 11Ɓasi mbani hari mwa uwanadamu ajuao zahusu mwanadamu, neka tsi ɗe iroho ilio moni hahe? Ɗe ha inamuna iyo wajau, kav̄u ajuao zahusu Mungu, neka tsi ɗe iRoho ya Mungu. 12Na wasi karapara iroho ya ulemengu, ɓadi iRoho ilawao ha Mungu, ile rijuwe izo Mungu arirehemu. 13Na wasi risuzilagua, tsi ha marongozi yasomedzewa na hikima ya shiuɓinadamu, ɓadi ha marongozi yasomedzewa na iRoho, na ha izo risueledza izo zilio za Roho#2:13 Roho: Mutru atsojua aelewe iShigiriki amba isurongoa: Ha izo wasi ueledza trongo za shi Roho ha ndzia ya marongozi ya shi Roho., ha luha ya shiRoho. 14Ɓadi mwanadamu nyama-nyama kashindri ukuɓali trongo zahusu iRoho ya Mungu. Mana haheju izo ujinga, tsena kashindri uzijua, mana izo unamulwa ha iRoho. 15Mutru wa shi Roho waye, ha kinyume ujua anamuwe piya, wala waye-waye kaji anamulwa na atsokao yotsi. Amwesa uMuangishio usurongoa:
16«Kweli amba mbani ɗe ajua iãkili ya Mola?
Mbani ɗe atsojuao amuv̄e mashauri?»#2:16 Namuangaliye Izaya 40:13.
Ɓadi wasi, wasi rina iãkili ya Kristi.
Currently Selected:
1 MAKORINTIYO 2: swb
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
