1 MAKORINTIYO 13
13
Uhusu uv̄endza
1Wala ukana neka nisulagua ziluha za wanadamu na za malayika, ne tsisina mahaɓa, v̄av̄o tsa garando livumao, au keme za kengele. 2Na neka tsidjaãliwa ineema ya ujudza marongozi ya shi mutrume yashukidziwa, ya ujua piya zisiri, neka tsina piya ujuzi, ata na piya uaminifu ushindrao utsengedze yimilima, ne tsisina mahaɓa, v̄av̄o tsisi shitru. 3Neka tsianisa piya nilionazo ha zimasikini, ata neka tsidzitoa fidia umwili wavudzwe, ne tsisina mahaɓa, v̄av̄o kaisunifayi na itsokao yotsi.
4Uv̄endza ukana suɓira#13:4 Uv̄endza ukana suɓira: Au: Uv̄endza, iyo ndzistahamilifu, na uwema. Uv̄endza kaina uwivu, uv̄endza kaidzirendre, kaidziono, 5kairendre kayalazimu, kaitsaha tanafu yayo, kaidzijadza hasera, kaisiki mbovu rohoni, 6wala kaijiv̄iwa na udhuluma, ɓadi ujiv̄iwa na ikweli, 7uswamihi piya, uamini piya, utumaini piya, ustahamili piya.
8Uv̄endza kaikomo. Ɓadi ujudza marongozi ya shi mutrume yashukidziwao ina mwiso, luha zishukidziwao zitsozia, na ujuzi una mwiso. 9Mana ujuzi watru wa pindri, na umujudzio watru wa marongozi ya shi mutrume yashukidziwa, tsena wa pindri. 10Ɓadi ukamilifu wamoja, itsindzikamilifu itsokoma. 11Wakati naka mwana, nakolagua shi mwana, nakofikiri shi mwana, nakofahamu shi mwana. Ata ufanyiha yangu muɓole, tsilishi shi unatsa ile. 12Leo risuona mahiɓuni hari mwa shiɗo, ɓadi meso oho, maswa ha maswa. Leo nisujua pindri, ɓadi wakati uwo oho, nitsojua ha ukamilifu, mauri ɗe inamuna najulihwana.
13Ɓasi v̄anu trongo traru ɗe zilio: uaminifu, tama, na mahaɓa. Ɓadi imahususu ɗe mahaɓa.
Currently Selected:
1 MAKORINTIYO 13: swb
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
