ROMMI 11
11
Israelmi Ghükulumi
1Tishi aye, I no hi ighiju ani, Alhou ye Paw timi kileqhive akea? Kiu gholau nomu kumoe! Kughengu ni ampi ghi Israelmi, Abraham polo kughuko, Benjamin laghami ke. 2Alhou ye Paw timi khunoqo Pa no azünatha ghi ithi akeno tipaqo kileve mphi. Nongu ye Kuchoyesü lo Elijah ghili kiu pi püani, kishi pa no Israelmi lachile Alhou lau muchho keno mtha keshea? 3“Ampeu, panoqo no Ow tungkupmi pithive tsüa, akümlla khacheqo hephove tsüa, eno ni ye I likhive no itehi ye panoqo no I küxü phucheae.”#1Kük 19:10,14 4Ikemu Alhou ye pa lau kiu khochile kea? “Ni ye timi qhethonhe tsüni khunoqo Baal zülo qhoqhünhe jumphi keno I sala qhi püaphie.”#1Kük 19:18 5Ikehu ishi ningu ghuloki lou ghi Alhouw küpükini vecheo kishelu keu ghükulumi ani. 6Ikemu tino küpükini vecheo shi püaghi aye, ti ye akümla shou bepe movae; tikumo aye küpükini huye küpükini kumo niae.
7Tishi aye kiu kea? Israelmi ye panongu no kiu phuche keno ithumlave. Alhouw kishekiphemi no ithuluve no kütami ye amlo shikümkave tsü, 8ti ye ishi yepüake toive,
“Alhou no mamaike ghungu pesü
panoqo tsüve kehu ishi kutolo
panongu ye ithukulupu nhethi
eno chikulupu kini puchemoe.”#Isa 29:10
9David ghi hitoi pi,
“Pano ghulhu lüpa huno alichhe ilhouve pelo,
tino pano ghenguno aqo shive no aghimepu shipelo;
10panongu nhethi züve no ithulupe kevilo,
eno alholo pano ghütsü qaqhi tsülo.”#Lesh 69:22,23
Jewkumomi Sawo Abolo Kime
11Ikehu I no ighiju ani, Jewmi no küpxalu keu ye ithughi kümlapushi veqhive keshea? Kiu lonomu kumoe! Ikemu panongu kipimi vecheo Jewkumomi lau xakulupu ighivae, tishi keu lono Jewmi pelo anheshu peniye ke. 12Imaye pano kipimi no ayeghiqha kümghapu shilu, eno pano kutokumo no Jewkumomi kümghapu shilu aye, Israelmi kümtsü kihisü luveni keloye tinguno alau khije ta akümghapu shinani kelae!
13Itehi ni ye nongu Jewkumomi pütsa ani. I no Jewkumomi lau apostol shi ake tivilo ni ye I kümlapu lo akijivile anani 14tishianguno kishikela shimu niw timi Jewmi nhekushupu shino tipau lono khami likhimu xalu niye ke. 15Kughengu panongu kileqhive keu huno ayeghiqha no külashilu aye, panongu ikhiluveni keloye akithi lono aküxü shive keu kumo aye kiu no kimghini kea? 16Asho kümllagho lo amsüu ikhiphetsü chekeu no akimthe shi aghi aye, amqo kuchopu akimthe ake, eno akuhu no akimthe shi aghi aye, alokaqo ghi akimthe ke.
17Ikemu aki lo pighiu olive sübo lo aloka hami no icheve kehu nongu no aghalo olive toi anamu pewo kütami gholo kime kelo itehi ye asübo kuhu gholo thoni-tsanyi küsajelu ani kehu, 18aloka kütauqo jukünatha kevilo. Nongu no titoi shi aye, akuhu no nongu püxüpe ani kethono nonguu no kumo kepi kümsülu lo. 19Tishi aye nongu no pi nani, “Alokaqo icheve keu ye I pelo asübo gholo kimelu peniye ke.” 20Itsae. Tipaqo ye pano küpülükumo ghenguno icheve, ikemu nou ye aküpülü lono puthugholue. Ikehu qhezauve kevi, ikemu msaqhiyi lo. 21Kughengu alholo loka Jewmi thotsü Alhou no ghümove ke Pa ye nongu ghümo nani pütsae. 22Tighenguno tsükhüi shino Alhouw kimiyekini eno Pa yiküsa ithilo: axine lo ikiqive kemi lau ye ayiküsa, ikemu nongu no Paw kimiyekini qholo ake tivilo Pa ye nongu lau kimiyeqhiyi anani. Tikumo aye, nongu ghi micheve nani. 23Eno panoqo ghi, panongu no pülükümla lono ipeghive aye, Alhou ye kimekulupu küka ani keke panongu sawo kime kitheve tsü nani. 24Kughengu nongu ye aghalo olive sübo lono michepe alhoaye veche ghi chiphe luve keu sübo gholo kime püaghi aye, alho lono acheghi keu loka hipaqo ye tinguno alau kishi inahuu-alo kimevetsü nani kelae!
Israel Xakulupu Küsü püakeu
25Athiküzümiqo, mthamini nongu lotsüu papeve nosa kehu ni ye nongu pelo küsü püakeu tuqhou hipau ithi mono apenishi amoe: itehi Israelmi mlo shikümka püakeu ye Jewkumomi kümtsü no ighi kuloqu lumoke dolo ghengu likhino ke. 26Eno hipa ghola lono Israelmi kümtsü xaluve nani, ti ye ishi yepüake toi,
“Xaphekuluu ye Zion lono ighi nani,
Pa no Jacob lagha launo küsakügha ikhive tsü nani”#Isa 59:20;
27“I no panoqo xine pevetsü kelono
hitoi panoqo sasü Iw puloshoqhi shi nani.”#Isa 27:9
28Itehi panoqo ye nongu Jewkumomi ghenguno Atsakiviu ghümi shi ani. Ikemu Alhou no kishephelu keu tsa loye pano puasüqo ghenguno panongu ye Alhou mlokuchuu ke. 29Kughengu Alhou no tsükeu gho ngo Pa no kuluve keu huye ikhichilelu mlae. 30Ghuthu lakhi lo nongu ye Alhou gholumo no ache kemu itehi ye Jewmi hekibide ghenguno nongu no kimiyekini ithuluve ketoi, 31panoqo ghi itehi hekibide lo akeu ye nongu tsükeu kimiyekini atho ithulu niye ke. 32Kughengu Alhou no timi kümtsü lau kimiyekini piye niye panoqo pesü aghokulu kumo kughumi shive tsüe.
33O, Alhouw küakini eno Pa lokütsü ngo akighithi ye kishi kuthoküzü kela! Paw xaküthaqo eno Pa kümlaqo ye kiu toi lheilo tokümlapu kelae!
34“Kughengu khuu no Ampeu kükümsü ithiju,
momu Pa mijekütsüu shiju kea?”#Job 36:22,23
35“Momu khuu no pa lochile
peniye agho Pa tsüju kea?”#Job 41:11
36Kughengu thokha kümtsü Pa launo eno Pa vecheo ighi, eno Pa lau anie. Pülhapuju Pa lau akimthe jekipi apelo, Amen.
Currently Selected:
ROMMI 11: SUMRVBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
