ROMMI 10
10
1Athiküzümiqo, I mlo no laju eno I kighini Alhou lau akeu ye niw timi Israelmi pelo xaluve penishie. 2Kughengu I no panongu shepe shilu anike panongu no Alhou lau amlo tsükeu ye thonhei, ikemu ti ye kuchou kighithi kiqi lono kumoe. 3Alhou no timi pelo achipikalupe chekeu kighithi ye kühano pano lotsü lou no shiniye kelono panongu ye Alhou chipiu zülo qhoqhü mlave. 4Kughengu Ayezah kimji ashekhau ye Khristo ke, tishianguno khukhumu pülü keu pelo achipikalu peniye ke.
Xakulupu Tsape
5Ayezah pelu keu lono achipikaluni keu tsalo Moses no ishi yekeu no, timi khuu no Azakütsü peluni keno tipau lono xülu nani.#Achi 18:5 6Ikemu aküpülü vecheo achipikaluni keu tsalo ye ishi ani, “O mlo lono ishi pi kevilo, ‘Khuu no atsütsü lo ikuni kea?’”#Zak 30:12,13 (ti ye Khristo saiqighi niye) 7“momu ‘Khuu no kithigha lo iqini kea?’” (ti ye akithi lono Khristo saikughi niye ke). 8Ikemu hi ye kiu piani kea? “Atsa huye o phivilo ani, o kichi lo eno o mlo lo ani”#Zak 30:14 (ti ye ningu no sheshu chekeu aküpülü tsa piani ke); 9kughengu nono Jisü ye Ampeu kepi o kichi lono piphelu eno Alhou no akithi lono Pa xüputhu kepi o mlo lono pülülu aye, no ye xaluve nani. 10Kughengu amlo no pülü lupe eno Alhou lau achipikalupe cheni, eno akichi no piphetsü no xaluvepe cheni. 11Ti ye Kuchoyesü no piani, “Khuu no Pa pülüni keno shikujove monani.”#Isa 28:16 12Ikehu Jewmi ngo Greekmi dolo kiyeqü keu kühae; kughengu Ampeu atho no kümtsü Mpeu, eno Pa phuighi kemi kümtsü shou kupukuno shi kümghatsü cheni. 13Kughengu “khunono Ampeu je kuluveni keno kümtsü xaluve nani.”#Joel 2:32
14Imaye panongu ye kishino pano no pülü chemo keu lau kuphu peniye wuni kea? Eno panongu ye kishino Pa ghili khilemu chilu mphi keghi pülüni kea? Khuana no asheshumo keloye kishino panongu ye chiluni kea? 15Atsapemi puwumo keloye kishino panongu ye asheshuni kea? Ti ye ishi yepüake toi, “Atsakiviu sheshu chekemi pukhu ye kiu toi jukivi kelae!”#Isa 52:7 16Ikemu Israelmi ye kümtsü no Atsakiviu gholu kekumoe. Kughengu Isaiah no pi, “Ampeu, ningu no sheshu kelo khuu no pülü kea?”#Isa 53:1 17Ikehu aküpülü ye chikulu lono ipeghi cheni, eno chikulu ye Khristo tsa vecheo ighi cheni.
18Ikemu I no hi ighiju ani, panongu ye chilu mphi kea? Itsa, chiluva thono, kughengu
“Panongu sütsa ye ayeghiqha kümtsü lo külhavae,
pano tsa ye ayeghi shekha tovae.”#Lesh 19:4
19Ikemu I no itaghi ighiju ani, Israelmi ye vethamlave keshea? Moses no atüghüshi pi,
“I no nongu pelo ameküküha shiye jupe anheshu peni;
mbomzü shiye lakhi pesü nongu gha shikighide tsüni.”#Zak 32:21
20Tishino Isaiah no mtotoi pitsü,
“Khunono I phujumo keno tipaqo no I phuluvae;
Ni ampi no ni avehupu shimo kemi lau pephe piyevae.”#Isa 65:1
21Ikemu Israel vehulo Alhou no pi, “Atsala kupuju Ni ye aghokulu kumomi ngo hekibidemi lau I u sükhope khe ighivae.” #Isa 65:2
Currently Selected:
ROMMI 10: SUMRVBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
