HLAZY HLA 8
8
Vâia vâna
1Aw, ei rilâhpa hawhta châ la,
Ei nô sâhpi a pazypa châ la ei tah kaw dia!
Khôtho liata cha hmô aw sah la,
Cha pahnâ aw na ta,
Ahy hmahta eina reipachhie lei awpa ei tlai.
2Châ chhi aw na ta,
Nâ pachu tyhpa
Ei nô o liata ei châ ngiakhei ha awpa tlai.
Kresawhti ropahâhpa cha padosa aw na ta,
Ei pawmikarânâ thei ti ei cha padosa awpa tlai.
3A ku chavei lâta bâh lô na pahua ta,
A ku chachâh lâta einâ pyhpahly.
4Hy Zerusale zuahzy saih u,
Bie ei cha pataihsa ei;
Ano tlai ta a khoh hlâlei la,
Kyhpachâna cha a tha pathyu leipa u la,
Pahra hra khuh vy.
5A lôhdupaw a vaw hnieh laihpa ta,
Râhchawhpa tawhta â vypa hao ahy ma a châ tly?
Epuh kô ry liata cha pahra na ta,
Cha liata na nô cha na hnohta sawzeihpa ta y ta,
Cha liata châ satuhpa cha sawzeihpa ta a y.
6Na chachôhna liata chahnaona hawhta na soh la,
Na ku liata chahnaona hawhta nâ ky mah y;
Kyhpachâna cha thina tlu ta a thatlô ta,
Hiatliana cha Athihkhih tlu ta â hrâh.
Kyhpachâna cha meipaleih hawhta a duah ta,
Meipaleih thatlô ngaitapa hawhta a duahpa a châ.
7Kyhpachâna mei cha,
Ti hluhpi ta pachhai thei leipa ta,
Tisaih chhao ta pamôh thei vei.
A o liata a hneina zydua pie khaipa ta,
Chyhsa ta kyhpachâna chalei â chhuah khiahta cha,
Thata mohnaopa a châ aw.
Viasazy
8Sietanô seihnainô hnei pi ta,
A sâhpizy hra cha pabyuh mâh leipa ta.
Ano miah ama vaw hia noh liata,
Eima sietanô châta khâpa ma eima taopa aw tly?
9Thokhy a châ khiahta cha,
A chô liata tâkâ o sâhpa sa aw pi ta;
Ochhi a châ khiahta cha,
Sidy thophia ta eima dôh aw.
Myuh
10Thokhy châ na ta,
Ei sâhpizy chhao o sâhpazy ama lyu hih.
Chavâta ano mo liata la,
Thlalôhna a hneipa hawhta na ei vaw châ haw.
11Sawlawmaw cha Bâlâhamaw liata kre sadô hnei ta,
Mokhâhtuhpazy hnohta hria hlao hneipa ta pahriasa ta,
Chyhsa to ta a theilâpa ty châta,
Tâkâ tlaw sâh kha ama vaw chei chyu awpa a châ.
12Ei kre sadô, keima kre sadô tlai cha ei hmiakô liata a y hih;
Hy nâ Sawlawmaw, nâ ta sâh kha hnei la,
Theilâpa mokhâhtuhpazy ta za no hnei mawh ei sy.
Myuhneituhpa
13Hy nâ sadôzy liata a pahrâpa y,
Viasazy ta na ao ama cha nathlie,
Kei chhao na ao thei hraw sah y.
Myuh
14Hy ei lôhdupaw, a para teh,
Sakhih hawhta châ la;
Ropahâhpa tlâhpizy liata,
Zuneih tôh lochopa lyu mah y.
Currently Selected:
HLAZY HLA 8: MARVBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
