RAWMA 9
9
Khazoh photlyh Izarei phopi
1Krista liata biehmeiseihpa ei reih, haih va na. Ei chhie nata pha pahnona ta Thlahpa Pathaihpa liata eina pahnokhei. 2Ei palôh liata rietheina ru ngaitapa nata pachârôhna lei thei leipa ei vao thlâh haw. 3Ei unawhzy, sapa lâta ei chiheihzy châna heta, kei he chhiesapa ta ypa ta, Krista tawhta chhawh pathlahpa ta y aw sah la ei tah tyh. 4#Pua 4.22Izarei chyhsa châ ei ta, saw châna, rônahna, biehrai, ryhpa piena, achhyna nata bietai zy âmo eih a châ. 5Pathlatuhzy kha ama mapawzy châ ei ta, sapa kyh lâta cha Krista tlai chhao cha, âmo chi tawhta a vaw puapa a châ. Ano cha ato zydua chô liata Khazohpa châ ta, chhâzaw ta reithaipa ta y mawh sy. Amen.
6Châhrasala Khazohpa bie cha hraoleipa ta a y tahna châ vei. Izarei pathla zydua Izarei châ khai hlei veih ei. 7#Âtn 21.12Abarahâ pathlazy ama châpa vâta, ama zydua ta a sawzy châ khai hra veih ei. “Aisika liana heta na pathlazy a laichadaipa a châ aw,” tahpa tlao a châ. 8Cha yzie cha, sapa sawzy cha Khazohpa sawzy châ leipa ei ta, bietai sawzy cha Abarahâ pathla ta raopa tlao ama châ. 9#Âtn 18.10“Tahmâ daihti hawhpa liana heta vaw tlô heih aw na ta, Sârâ ta sawchapaw a sa aw,” tahpa ta bietai piepa a châ. 10Cha dei châ vei, Rebekâ chhao kha chyhsa pakha liata, miah pathlatuhpa Aisika liata maphieh a phao no kha, 11#Âtn 25.23hawsaihzy ama pi hlâta, hmo phapa tlyma, hmo chhiepa tlyma ama tao hlâta, hmotaopa vâta châ leipa ta, atlyhna kyh liata Khazohpa hmochhuahpa cha a sie pazao lymâ thei nawpa ta, 12a hnohta, “Uhthei viapa ta seihnai viapa a chakao aw,” tahpa ta chhopa a châpa kha. 13#Mal 1.2,3“Zakaw kyh pachâ na ta, Esaw deikua ei hao,” tahpa ropa a châ hra.
14Cha khiahta cha, khâpa eima reih khao aw? Khazohpa liata sialeina a y ma? Y bao va! 15#Pua 33.19Khazohpa ta Mawsi hnohta, “Ei ngiachhie awpa chyhsa cha ngiachhie aw na ta, zawh ei ngiah awpa chyhsa cha zawh ei ngiah aw,” tahpa ta a vaw reih ha khawh. 16Chavâta chyhsapa khotlyna vâta châ leipa ta, hriapasana vâta châ hra vei, a ngiachhietuhpa Khazohpa vâta tlao a châ. 17#Pua 9.16Chavâta Biehrai ta Phiraoh hnohta, “He hmo châta ei cha padua, ei hmotaotheina nâma liata paluahsa ta, khizaw zydua liata ei moh pathâhsapa ta a y thei nawpa ta,” a tahpa a châ. 18Chatanachata Khazohpa ta a khopa maih ngiachhie tyh ta, a khopa maih chhorupa ta a tao tyh.
19Nâ ta ei hnohta, “Khazohpa ta khazia miah a maochhie thlâh ha chy? Ahy ma a khopa a dyuh thei?” na tah ualua aw. 20#Isai 29.16; 45.9Châhrasala chyhsapa y, Khazohpa a chakhia hrapa chi cha, ahy ma na châ? Hmotaopa ta a taotuhpa hnohta, “Khazia he hawhta eina tao chi?” a tah aw mâ? 21Beihlei tlo kha tawhta, zachhihpa ta hmâ awpa beih sôh viapa nata hmâ chakhyh awpa beih sôh lei viapa zy tao awpa ta, beihvituhpa cha beihlei chô liata bie hnei vei mâ? 22Khazohpa ta a hiehâhna palâsa ta, a hmotaotheina pahnosa awpa khoh hra sala, hiehâhna beih a leidia tlâhpazy chô liata palôh pasi ngaitapa ta a dao lylia khiahta cha, khâpa a pei aw? 23Ngiachhiena beihzy chô liata a rônahna palâsa nawpa ta, cha hmo cha Khazohpa ta a rônahna châta â chhuanoh chhielie hapa châ sala, khâpa a pei aw? 24Cha ngiachhiena beihzy cha, keimo, Zuzy hry tawhta a awpazy dei châ leipa pi ta, Zenitaizy hry tawhta a awpazy chhao eima châ hra. 25#Hôs 2.23Khazohpa ta Hôsia châbu liata hetana heta a reipa kha:
“Ei phopi a châ beih leipa cha,
‘Ei phopi,’ tah aw na ta;
Kyhpachâ beih leipa cha,
‘Kyhpachâpa,’ ei tah aw.”
26 #
Hôs 1.10
“‘Ei phopi châ veih ei chi,’ a tahna su liata,
‘Khazohpa hroh sawzy,’ bipa ama châ aw.”
27 #
Isai 10.22,23 Isai chhao ta Izarei kyh liata, “Izarei sawzy cha tilaipi sadi zie ta hluh hra ei sala, laibâhpa deita pachhapa ama châ aw. 28Abeipa ta hawh leipa ta a lei he tlokhuh a hrie aw,” a tahpa kha. 29#Isai 1.9Isai pyly ta,
“Pheisaihzy Abeipa ta
Chi pathla miah pahlôhpa vei mawh sala,
Sawdawmâ hawhna khata châ aw pi ta,
Kawmawrâ hawhna khata eima y aw,”
tahpa ta a vaw rei chhielie haw.
Izarei ngiapâleina
30Khâpa eima reih khao aw? Siana a chadai leipa Zenitaizy ta ngiapâna ta siana tlao to ei ta, 31siana ryhpa a chadaituhpa Izarei ta siana to thei vei. 32Khâpa vâta maw? Ngiapâna ta a chadai leipa ei ta, hmotaopa ta to thei awpa hawhta amâ chadaipa vâta a châ. Achapiana lô liata amâ chapia haw,
33 #
Isai 28.16
“Pachâ teh, Zaio liata achapiana lô soh na ta,
Moleina lôpanô ei soh;
Ahy rai ano a ngiapâpa cha,
Maophyuh aw vei,”
tahpa ta ropa hawhta.
Currently Selected:
RAWMA 9: MARVBSI
Highlight
Share
Compare
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
