RAWMA 8
8
Thlahpa hro
1Chavâta tahmâ la Krista Zisu liata a ypa, sapa ta hroh leipa ta, Thlahpa ta a hrohpazy châta cha thailei pachâsana rai y khao vei. 2Krista Zisu liata hrona Thlahpa ryhpa chata moleina nata thina ryhpa tawhta a cha papua ha ei.#8.2 “A cha papua ha ei” tahpa he hlâno kuropa Biehrai thokha liata cha, “Eina papua haw” tahpa a châ. 3Sapa chiehleina vâta ryhpa ta a tao thei leipa cha, Khazohpa ta a tao haw. Ano Sawchapawpa tlai cha, molei theipa sapa pôhpa paphaosapa ta, molei atheihna châta vaw tuah ta, sapa liata moleina a ypa cha thailei a pachâsa haw. 4Chatanachata keimo, sapa ta hroh khao leipa ta, Thlahpa ta a hroh hapazy liana heta, ryhpa ta â hnawpa siana cha pakipa ta a y aw. 5Sapa ta a hrohpazy cha, sapa hmozy liata ama pachâna soh ei ta, Thlahpa ta a hrohpazy deikua cha, Thlahpa hmozy liata ama pachâna ama soh tyh. 6Sapa hmo pachâna cha thina châ ta, Thlahpa hmo pachâna deikua cha, hrona nata thlalôhna a châ. 7Sapa hmo pachâna cha, Khazohpa ryhpa ry liata a y leipa vâta, Khazohpa a dyuhpa a châ. Hmeiseihta ta, sapa hmo a pachâpa châta cha, Khazohpa ryhpa ry liata y hmeiseih thei awpa châ vei. 8Sapa ta a hrohpazy cha Khazohpa palysa thei veih ei.
9Châhrasala Khazohpa Thlahpa nâmo liata a y khiahta cha, sapa ta a ypa châ leipa ei chi ta, Thlahpa ta a ypa tlao nama châ. Ahy rai Krista Thlahpa a hnei leipa cha ano chyhsa châ vei. 10Châhrasala Krista cha nâmo liata a y khiahta cha, moleina vâta nama pôhpa cha thi hra sala, nama thlahpa deikua cha siana vâta a hroh. 11#1 Kaw 3.16Athihpa hry tawhta Zisu a pathyutuhpa Thlahpa nâmo liata a y khiahta cha, athihpa hry tawhta Krista Zisu a pathyutuhpa chata, nâmo liata a ypa a Thlahpa zawhzi ta, nama pôhpa thi theipazy cha a pahro aw.
Krista ryutolâhpazy
12Chavâta unawh saih u, a bâhpa eima hnei. Sapa liata leibâh deikua châ vei, sapa khozie hawhta hrona liata leibâh châ hra vei. 13Sapa khozie hawhta nama hroh khiahta cha, thi aw ei chi ta, nama pôhpa hmotaopazy Thlahpa ta nama thie lymâ khiahta deikua cha, nama hroh aw. 14Khazohpa Thlahpa chhihthapa ta a ypa maih Khazohpa sawzy ama châ. 15#Kal 4.5-7#Mka 14.36; Kal 4.6Chipa ta y heih awpa ta seichâna thlahpa nama topa châ leipa ta, saw châna Thlahpa tlao to ei chi ta, cha Thlahpa vâna chata “Âbâ! Ei paw!” tahpa ta eima aw theipa a châ. 16Cha Thlahpa tlai chata keimo thlahpa nata a kaopa ta, Khazohpa sawzy eima châ tahpa miah a pahnokhei. 17Sawzy eima châ khiahta cha, ryutotuhpazy eima châ. Khazohpa ryu totuhpazy châ pi ta, Krista ryutolâhpazy eima châ. A hnohta riethei eima tao khiahta cha, a hnohta palyupalihpa ta eima y hra aw.
Rônahna a vaw y awpa
18Tahmâ nota pasa taonazy he, noh hro ta eima chô liata rônahna palâsa awpa nata pakho khi ta rao va na. 19Hmotaopazy ta Khazohpa sawzy aluahna daihti vâpa ta, ngiatiah leipa ta ama hâ thlâh haw. 20#Âtn 3.17-19Hmotaopazy cha hraoleipa ta y awpa ta raopa châ ha ta, âmo khopa vâta châ leipa ta, a paysatuhpa vâta tlao a châ. Châhrasala hnabeiseihna a y. 21Hmotaopazy tlai chhao cha thu theina sei tawhta papuapa châ aw ei ta, Khazohpa sawzy khotalaina rônahpa liata amâ ngia hra aw. 22Hmotaopa zydua cha sawzeih pasa taopa ta, tahmâ taihta amâ rôh ngâ thlâh ha tahpa eima pahno. 23#2 Kaw 5.2-4Hmotaopazy dei châ vei, keimo, Thlahpa thei hmiatuapa a hneituhpazy tlai chhao heta, saw châ awpa ta eima pôhpa chatlaina cha ngiatiah leipa ta hâpa ta, palôh ta eimâ rôh ngâ kaw hra. 24Cha hnabeiseihna vâna chata pachhapa eima châ. Hmô theipa hnabeiseihpa cha, hnabeiseihna châ vei. Hmô hapa cha, ahy ma hnabeiseihpa ta a hâ khao aw? 25Eima hmô leipa eima hnabei a seih khiahta deikua cha, palôh pasi kawpa ta eima hâ lylia tyh.
26Cha hawhna chata, Thlahpa ta eima chiehleinazy liata miah a bao tyh. Thlahchhâ nawpa chybia chhao eima pahno lei nota, Thlahpa ta ahrôna rei hlei thei leipa ta thlah miah a chhâpa tyh. 27Thlahpa cha Khazohpa khozie hawhta mopathaihpazy châta thlah a chhâ tyhpa a châpa vâta, palôh mohtuhpa Khazohpa ta Thlahpa pachâna cha a pahno.
Pahnietuhpa hlâta rônah viana
28Khazohpa kyh a pachâtuhpa, ano achhuahna hawhta a awpazy châta, Khazohpa ta ato liata ama pha nawpa ta a hriapa tyh ei tahpa eima pahno. 29A pahno chhieliepazy cha, a Sawchapawpa hawhta y awpa ta a rao chhielie ei. Chatanachata a Sawchapawpa cha unawh hluhpi hry liata sawchapaw uhtheipa a châ aw. 30A rao chhieliepazy cha aw ta, a awpazy thai pachâsa ta, thai a pachâsapazy cha a palyupalih ei.
31Cha kyhzy liana chata khâpa eima reih khao aw? Khazohpa eima chhâh â châ khiahta cha, ahy miah a dyuh thei aw? 32A Sawchapawpa tlai chhao pahlôh leipa ta, eima zydua châta a pietuhpa chata, ato a saipa ta miah pie hra aw vei mâ? 33Khazohpa a tlyhpazy cha ahy a leih aw? Thai pachâsatuhpa cha Khazohpa châ tlôh ta. 34Ahy ma thailei a pachâsa aw? A thipa cha Krista Zisu châ tlôh ta. Cha dei châ vei, ano cha pathyupa ta y ta, Khazohpa chachâh lâta ypa ta, miah reikheituhpa a châ. 35Krista kyhpachâna tawhta ahy miah pachhaih thei aw? Rietheina ta tlyma, pachârôhna ta tlyma, taolana ta tlyma, chakâhna ta tlyma, thluahruana ta tlyma, chichhihna ta tlyma, zaozi ta tlyma miah a pachhaih aw ma?
36 #
Hla 44.22
“Nâma vâta noh y ta thiepa ta y pi ta,
Mietaku thie awpazy hawhta pachâpa eima châ,”
tahpa ta ropa a châ. 37Pachhaih bao va! Cha zydua liana chata kyh miah pachâtuhpa vâta, pahnietuhpazy#8.37 He liata pahnietuhpazy he adyuhna liata pahnietuhpa pheisaih hyutuhpa nata a pheisaihzy reina a châ. hlâta rônah viapa eima châ. 38Thina nata hrona tlyma, vâlyuhchâpazy nata ahripazy tlyma, hmo y haipa nata a vaw y awpazy tlyma, hmotaotheina tlyma, 39asâhna nata athuna tlyma, hmotaopa zydua liata hmo hropa khâpa ta hmah eima Beipa Krista Zisu liata a ypa Khazohpa kyhpachâna tawhta miah pachhaih thei aw vei tahpa a sia ngaitapa ta ei pahno.
Currently Selected:
RAWMA 8: MARVBSI
Highlight
Share
Compare
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
