HLAZY 147
147
Palôh keichheihpazy patlâhtuhpa Abeipa reithaina
1 Abeipa cha reithai teh u!
Eima Khazohpa reithaipa ta hla sapa cha pha ta,
Kho â chhih ngaita;
Reithaina hla hlâ awpa cha,
Tao awpa tlai a châ.
2 Abeipa ta Zerusale padua ta,
Izarei phopi hiepatlapazy a pahmaohpakhy heih ei.
3Palôh keichheihpazy patlâh ta,
Ama hmahzy a chahrypa ei.
4Awhsi ziepa pahno ta,
Ama moh a bi khai ei.
5Eima Beipa cha rônah ta,
Hmotaotheina lai ngaitapa a hnei;
A novâhna thlie thei awpa châ vei.
6 Abeipa cha areisipazy cheihchalo ta,
Hmoparaopazy deikua cha alei lâ a pazaw lymâ.
7Alyna bie hlâpa ta Abeipa lâ hla sa u la,
Totâ chhaota eima Khazohpa cha reithai teh u!
8Ano ta avâzy khi meihdozy ta khu ta,
Alei châta vâsua a chhuanohpa ta,
Tlâhzy liata sibiepa a papyusa.
9Râhsazy nie awpa pie ta,
Raawh taw a sâh ngâpazy nie awpa a pie ei.
10Â lyna cha arâ thatlôna vâta châ leipa ta,
A palôh tlâhna chhao pheisaihzy phei vâta châ vei.
11 Abeipa cha ano a chituhpazy vâta a palôh tlâh ta,
A kyhpachâna hnabeiseihtuhpazy vâta a palôh a tlâh tyh.
12Hy Zerusale, Abeipa cha reithai la,
Hy Zaio, na Khazohpa cha reithai mah y!
13Ano ta na thokhy chhikao lâhreizy pa-isa ta,
Na chhôh liata na sawzy byhnâ a awpa tyh ei.
14Na râhri chhôh liata adyhna tao ta,
Sâh pha chaipa ta na rih a cha pabie tyh.
15Alei lâ biepiepa paphao ta,
A bie cha a chatliepa ta a sie.
16Mietaku hmi hawhta dâhaw patlasa ta,
Buchâh hawhta dâhaw a hiepatla.
17Viahchhâ tlawhzy hawhta dâhaw tlozy za thy ta,
Chasipa a vaw patlôsapa hmia liata,
Ahy a duah thei aw?
18A bie paphao ta,
A bie ta dâhaw tlozy cha pazao ta;
Thlih pathlisa ta,
Tizy a palosa.
19Zakaw hnohta a bie phuah ta,
Izarei hnohta a bieraopazy nata a ryhpazy a phuah.
20Kheihawhpa phopi chô liata hmahta cha hawhta tao beih vei;
Chavâta a ryhpazy pahno veih ei.
Abeipa cha reithai teh u!
Currently Selected:
HLAZY 147: MARVBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
