BIESOZY 31
31
Bei Lemua biesozy
1Hezy he Bei Lemua hnohta a nô ta a pachupa biesozy a châ.
2Hy ei sawchapawpa, khâpa ma na tao?
Ei chhi tawhta a puapa y, khâpa ma na tao?
Ei bietai sawchapawpa, khâpa ma na tao?
3Na thatlôna cha chanôzy pie leipa la,
Na hroziezy chhao beizy a paraotuhpazy pie khah y.
4Hy Lemua y, kresawhti he beizy châta châ leipa ta,
Beizy cha kresawhti ama do awpa châ vei;
Ryureituhpazy chhao sahma ama do awpa châ vei.
5Ama do khiahta cha ryhpa my aw ei ta,
Pasataopazy adona ama pahleipa pathlei aw.
6Leidia haipazy hnohta sahma pie u la,
Palôh pasapazy hnohta kresawhti pie teh u.
7Doh ei sala ama dyhchhiena my ei sala,
Ama pachârôhna amâ thei khao leina hâh ta.
8Reihpathlie thei leipazy châta na pakah â la,
Vâchhiepazy a duakheipa ta na pakah â mah y.
9Na pakah âpa ta siana ta ryureih la,
Dyhchhiepa nata phahlapazy adona a duakhei mah y.
Lapinô phapa palyupalihna
10Lapinô phapa ahy ma a hmô thei aw?
Lapinô phapa cha lôsôhpazy hlâta a sôh via syulyu.
11A vahpa palôh ta ano cha ngâ ta,
Athôhna hmô leipa ta y aw vei.
12A hro chhôh noh zydua liata a vahpa châta
Chhiena lâ châ leipa ta phana lâ sai ta hmo a taopa tyh.
13Mietaku hmi nata pala rih dipa tlua ta,
A ku ta palôhtlâhpa ta a hria tyh.
14Sôhryhpa balyhzy hawhta châ ta,
Lâhlapi tawhta niedozy a vaw tlôkhei tyh.
15Azo ta thyu ta,
A chhôhkha nie awpa patohpatia ta,
A chakaotuhpa laihsazy chhao ama nie awpa tovyuhzy a pie tyh ei.
16Lyu hnei thei nawpa ta saduthliepa ta chalei ta,
A hriapasana ta a hmôpa sôh hmâpa ta kre sadô a tao.
17Thatlôna ta a chai a saih ta,
A bâh thazy a patlô tyh.
18A sôhpaliepa â thôh tahpa pahno ta,
Zâ ta chhao a meiôh thi beih vei.
19Raha ku liata a ku soh ta,
A ku ta lahmi a patu.
20Dyhchhiepazy lâta a ku pazawh ta,
Phahlapazy lâta a ku a paza tyh.
21A chhôhkha châta dâhaw chi leipa ta,
A chhôhkha zydua poh saihlawpa a pabu ei.
22Ano châta chhao rakhô pohzy tao ta,
A chysia cha pala rih dipa nata sainohpa a châ.
23Thokhy chhikaozy liata râh machâzy hnohta a vahpa â tyu nota,
A vahpa cha zawpi pahnopa a châ.
24Pala rih dipa chysiazy taopa ta zuah ta,
Chaisaihzy sôhdaohpa lâ a paphao tyh.
25A chysia cha thatlôna nata rônahna châ ta,
A ly kawpa ta daihti a vaw tlô awpa a mokhâh tyh.
26Sona ta a pakah â ta,
A paleih liata nôphana pachuna bie a y.
27A chhôhkha khihsatôhtuna a phapa ta mohôh ta,
Thathina viahchhâ nie vei.
28A sawzy thyu ei ta, “Nohlaonô” tah ei ta,
A vahpa chhao thyu ta a lapinô cha reithaipa ta,
29“Chanô hluhpi tao pha kaw sai ei ta,
Châhrasala na ly khai ha ei,” a tah.
30Khoiah hneina cha dôveina châ ta,
Chhithaina chhao hraoleipa a châ;
Abeipa a chituhpa chanô deikua cha reithaipa a châ aw.
31A hriapasana theilâpazy vâta lapinô cha palyupalih la,
A hmotaopazy ta thokhy chhikaozy liata ano cha reithai mawh sy.
Currently Selected:
BIESOZY 31: MARVBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
