BIECHHOTUHPA 1
1
Ato hraoleipa sai a châ
1He he Dâvi sawchapawpa Zerusale bei, Biechhotuhpa biezy a châ:
2Biechhotuhpa ta, “Hraoleipa sai, hraoleipa sai,
Hraoleipazy hry liata hrao lei chaipa,
Ato hraoleipa sai a châ,” tah ta.
3Chyhsapa he noh ry liata a hriapasana tawhta
Khâpa athôhna ma a hmô tly?
4Chhâ kha lei ta, chhâ hropa vaw y heih ta,
Alei deikua cha chhâzaw ta a y ngâ thlâh haw.
5Noh vaw chhi ta, noh tla ta,
A vaw chhina su lâ thlai a kua heih tyh.
6Thlih cha chho lâ pathli ta,
Maw lâ khy heih ta;
Pathli chahlô lymâpa ta,
A vaw puana lâ a kua heih tyh.
7Chavah zydua tilaipi liata tla ei ta,
Châhrasala tilaipi cha bie beih vei;
Chavahzy cha ama lona tyhpa lâta,
Ama loh chanei lymâ.
8Hmo zydua riethei thachhâ chhihpa châ ei ta,
Chyhsa ta rei tiah awpa chhao châ vei.
Mokhaoh ta a hmo hmôpa liata a lôhrâ tlô leipa ta,
Nakao ta a hmo theipa liata a rih bie vei.
9A y hapa cha a y heih awpa châ ta,
Tao hapa chhao tao heih awpa a châ;
Noh ry liana heta hmo thiehpa rai y vei.
10“Moh tua u, he he a thiehpa cha a châ,”
Tah thei awpa hmo a y rai ma?
Eima y hlâ tawhta a vaw y kôzawpa sai a châ.
11Hmo parohpazy a thei ngâ thlâh hapa châ leipa ta,
Hmo a vaw y awpazy chhao,
Chhâ a vaw y awpazy ta a thei ngâ thlâh ha aw veih ei.
Sona hraoleina
12Kei, Biechhotuhpa he Izarei chô liata Zerusale liata bei châ na ta. 13Avâ ry liata hmo a ypa zydua sona ta tlua awpa ta ei palôh hmâh na ta. Khazohpa ta chyhsa sawzy tao awpa a vaw piepazy he tymâna dei a vaw châ. 14Noh ry liata hmotaopa zydua hmô khai na ta, moh tua u, ato hraoleipa sai châ ei ta, thlih a chadaipa deita a châ:
15Apako chiehpa cha patlâ thei awpa châ khao leipa ta,
A y leipa chhao rei pâ thai awpa châ vei.
16 #
1 Abei 4.29-31
Keimasasyh ta, “Sona hluhpi hnei ha na ta, keima hlâta Zerusale liata a vaw y tuapa zydua hlâta thata so viapa ta, ei palôh chhao ta sona nata pahnona hro a padi haw,” a tah na ta. 17Chatanachata sona kyh pahnopa ta, hruna nata ngâna kyh chhao pahno awpa ta ei palôh hmâh na ta. Cha chhao cha thlih a chadaipa deita a châ tahpa ei pahno haw.
18Sona hluhna liata tymâna chhao hluh ta,
Pahnona a papôhsatuhpa cha pachârôhna a papôhsatuhpa a châ.
Currently Selected:
BIECHHOTUHPA 1: MARVBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
