BIESOZY 28
28
Moleipa nata mosiapa
1Ahy ta hmah ama chadai leipa chhao ta,
Moleipazy cha a râpai ei ta;
Mosiapazy deikua cha,
Chakeibarôhneipa hawhta ama riah a pha.
2Râh ta hmo a parao nahta,
Ryureituhpa hluhpi vaw pua tyh ei ta;
Pahnona nata novâhna a hneipa ryureituhpa ry liata deikua cha,
Râh â ipa ta bohpi â duah tyh.
3Dyhchhiepa ta dyhchhie hropa a tlybai pachhuah heihpa cha,
Vâsua ta nie awpa rai pahlôh leipa ta,
Chichei a phy pathlah khai hapa hawhta a châ.
4Ryhpa a heihsaituhpazy cha moleipazy reithai tyh ei ta,
Ryhpa a zyhtuhpazy deikua ta cha moleipazy amâ dyuh tyh.
5Chyhsa chhiepazy cha adona kyh ama novâh leipa ta,
Abeipa a tluatuhpazy deikua cha adona kyh liata tlokhuh ama no a vâh.
6Hrozie doleipa hneirôhpa hlâta cha,
 dona a hrokheipa dyhchhiepa a pha via.
7Ryhpa a zyhpa cha sawchapaw sopa châ ta,
Azohpazy viasa deikua cha a paw no a paza tyh.
8A pôhna chadaipa ta a sôh a papôhsatuhpa cha,
Dyhchhiepazy chô liata riaphapa châta a sôh cha a pachô.
9Ryhpa nathlie khoh leipa ta a nah su hro lâ a paheipa cha,
A thlahchhâna chhao pasichhihpa a châ.
10Lâpi doleipa liata chyhsa dopa a pasiesatuhpa cha,
Ano khaohtlô chaopa lia tlai ta tla aw ta;
Chyhsa phapakipazy deikua cha,
Ryu phapa ama to aw.
11Hneirôhpa cha ano mokhaoh liata a pasosa kaw ta,
Châhrasala novâhna a hneipa dyhchhiepa ta
Hneirôhpa châna dopa a hmô pasia aw.
12Mosiapazy ta pahniena ama to nahta,
Palyupalihna rônahpa y ta;
Moleipazy ama thyu nahta deikua cha,
Chyhsazy amâ nyu tyh.
13A moleinazy a phihtuhpa cha vânoh to leipa aw ta,
A moleinazy palâhâh ta a siesaipa deikua cha zawngiahna a hmô aw.
14 Abeipa khâ a chipa chyhsa cha vânoh to aw ta,
A palôh kuh khâ a pachhapa deikua cha chhiena lâ a tla aw.
15Phopi dyhchhiepa chô liata ryureihtuh chhiepa cha,
Chakeibarôhneipa a rôhpa hawhta châ ta,
Chavyh a thyupa hawhta a châ.
16Novâhna a phahlapa ryureituhpa cha,
Tlybaituhpa nôchhiepa châ ta;
Adoleipa ta athôhna hmôpa a haotuhpa deikua cha,
A hro chhôh kôzy a pasisa aw.
17Chyhsa thisaih maoh a phaohpa cha,
Khaohtlô lâ a râ aw ta,
Ahy ta hmah bao khah sy.
18Adona ta a hrohpa cha pachhapa châ aw ta,
A hroziezy adoleipa deikua cha eikhapi ta a pao aw.
19A chhaohlei a palietuhpa cha,
Nie awpa hluhpi hnei aw ta;
Hraoleipa a chadaituhpa deikua cha,
A phahlapa hluhpi a hnei aw.
20Chyhsa ngâchhihpa cha byhnâ hluhpi to aw ta,
Hneirôh patoh a chhuahpa deikua cha hrie leipa ta pua aw vei.
21Khokhei viapa hneipa pha leipa ta,
Châhrasala viahchhâ tlâ kha vâta,
Chyhsa ta hmo a parao thei.
22Chyhsa riakhiehpa cha hneirôh awpa ta a para ta,
Leina ta a vaw tlô thlu aw tahpa pahno vei.
23A paleih ta a reithai pakheipa hlâta cha,
Chyhsa a chhoreituhpa ta hnôhlâ ta khokheina a hlao via aw.
24A paw tlyma a nô tlyma hrao ta,
“Paraona châ vei,” a tahtuhpa cha,
Paraotuhpa viasa a châ.
25Karâypa chyhsa cha ahryuna pathyu ta,
Abeipa a ngâtuhpa deikua cha pathawhsapa#28.25 He liata “pathawhsa” tahpa he dyhphana â nua. a châ aw.
26Ano palôh a ngâtuhpa cha ahrupa châ ta,
So thai kawpa ta a ypa deikua cha pachhapa a châ aw.
27Dyhchhiepa a pietuhpa cha a phahla leipa aw ta,
A mo a pasopa deikua cha chhiesana thata â tyh aw.
28Moleipazy ama thyu nahta,
Chyhsazy a nyu ei ta;
Moleipazy ama leidia nahta,
Mosiapazy ama pôh tyh.
Currently Selected:
BIESOZY 28: MARVBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
