BIESOZY 27
27
1 #
Zâm 4.13-16
Mylâ ta hmo a vaw y awpa a palaikhei khah y,
Cha noh chata khâpa ma a vaw tlôkhei aw tahpa pahno tlôh chi va.
2Nâma pakah ta a reithai leipa la,
Mohropa ta tlao cha reithai sala;
Nâma hmao ta châ leipa sala,
Khichhaipa hmao ta tlao cha reithai mawh sy.
3Alô cha a hri ta,
Sadi chhao â hri;
Châhrasala ahrupa ta chyhsa a patypamâpa cha,
Cha miano hlâta â hri via.
4Hiehâhna cha a nôchhie ta, pathiiana chhao â tlao,
Châhrasala ahy ma hiatliana hmiakô liata a duah thei aw?
5Kyhpachâna â nyupa hlâta cha,
A lâhâh ta rapa a pha via.
6Viasa ta hmah paphaopa cha ngâ lei nawpa y leipa ta,
Chariahpa apahnâna deikua cha a pakheipa a châ.
7Rihbiepa châta cha kheihti chhao pasi a chhih ta,
Nodipa châta deikua cha hmo khapa zydua chhao a thlôh khai.
8A o a viavisaipa chyhsa cha,
A bu a zaw saipa pavaw hawhta a châ.
9Sathaw nata ropahâhpa ta palôh palysa ta,
Viasa ryhraokheina bie phapa chhao a thlôh ngaita.
10Nâma viasa nata na paw viasa a paphasai leipa la,
Chhiena nâ tyhna noh ta na unawhpa o pangai khah y.
Lâhlapi liata unawhpa hlâta cha,
Lâhnia liata a y pa na opa phapa a pha via.
11Ei sawchapawpa y, so la, ei palôh palysa mah y,
Chatanachata nâ reipachhietuhpazy ei chhy thei aw ei.
12Asopa cha chichhihpa hmô thaipa ta a nyusai ta,
Sona a phahlapa deikua cha chatôh ta pasa a tao tyh.
13Khichhaipa châta sôhkâ a sohpa cha,
A chysia lapa la;
Chihropa#27.13 He liata “Chihropa” he paliezie thokha liata cha “Apheinô” tahpa ta sopa a châ. châta sôhkâ a sohpa chhao,
A bietai châta a chysia lapa mah y.
14Mydi kari ta thyu ta,
A paro ngaitapa ta a vaih byhnâ a awpatuhpa cha,
Ano châta chhie a sapa hawhta pachâpa a châ aw.
15A hryu a pahâh kawpa lapinô cha,
Avâ neih nota avâ di a tla ngâ thlâhpa nata miakha a châ.
16Cha hawhpa lapinô pakhâ a chhuahpa cha,
Thlih pakhâpa nata miakha châ ta;
Ku chachâh lâta sathaw patupa nata miakha a châ.
17Thua cha thua ta chatapa châ ta,
Chyhsapa chhao chyhsa hropa ta a chata tyh.
18Theiku kô a mohôhpa ta a thei nie aw ta,
A zibeipa a chakaopa chhao palyupalihpa a châ aw.
19Ti liata hmia tyhpa â lapa hawhta,
Chyhsapa palôh cha chyhsapa châna a palâsa tyh.
20Athihkhih nata Chhokhih zy ta â daih tahpa ama hnei leipa hawhta,
Chyhsapa mo ta â dai tahna rai hnei vei.
21Pathaisana beih cha tâkâ châta châ ta,
Patina mei chhao ngôh châta a châ;
Chyhsapa deikua cha,
Reithai a hlaona daihti liata pasiana â tyh tyh.
22Ahrupa sôkhaoh liata sâh chhaota
Sôkhaih ta daih hra la,
Ahruna ta ano cha siesai hlei aw vei.
23Na mietaku zawzy duahmo pahno pasia la,
Na sahroh zawzy a phapa ta vaih mah y.
24Hneirônazy cha chhâzaw châta châ leipa ta,
Bei lakho chhao chhâ zydua châta châ vei.
25Sibiepa raoh ta si panyupa kaw thaopa ta,
Tlâhpizy liata âhnalasi pakhypa a châ tita,
26Mietakutawzy ta na chysia châ tôh aw ei ta,
Miezy ta lyu ty ama châ tôh aw.
27Na pati châta mie sâhpiti â daihpa ta hnei aw chi ta,
Na chhôhkha châta nie awpa y aw ta,
Na sawchanôzy mohôhna châta chhao â khi aw.
Currently Selected:
BIESOZY 27: MARVBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
