BIESOZY 19
19
1Chyhsa hrupa hmao haihthaipa châpa hlâta cha,
Sipasapa ngâchhihpa châpa a pha via.
2Pahnona a phahlapa hro cha pha leipa ta,
A phei a parapa chhao a sumiesumâ tyh.
3Chyhsa ta ano hruna vâta a lâpi a raopa tlai cha,
Abeipa chô liata palôh ruchhôna a hnei tyh.
4Sôh ta viasa hluhpi pahneisa ta,
Sipasapa deikua cha a viasapa taihta a pathlua.
5Pahnokheituh pakheipa cha hrie leipa ta y leipa aw ta,
Haipa hu a sopa chhao pua aw vei.
6Chyhsa hluhpi ta riaphapa khokheina tlua ei ta,
Hmosaipa a pietuhpa cha chyhsa to viasa a châ.
7A unawhzy hmahta sipasapa cha amâ hao khiahta cha,
A viasazy chhochhi ta cha khatlu ta ma amâ hla aw tly!
Bie ta âmo cha a chadai ta,
Châhrasala ama siesai syulyu haw.
8Sona a hneipa cha a hro pasô ta,
Novâhna a vaotuhpa chhao hmo phapa a hmô aw.
9Pahnokheituh pakheipa cha hrie leipa ta y leipa aw ta,
Haipa bie a reihpa cha a leidia aw.
10Ahrupa nata phasana hro a khyh leipa ta,
Sei ta abeisawzy chô liata ryu a reipa awpa chhochhi â khyh lei pachai.
11Sona ta chyhsa palôh pasisa ta,
Pasasana mopakhôpa cha a rônahna a châ.
12Abei hiehâna cha chakeibarôhneipa a rôhpa hawhta châ ta,
A khokheina deikua cha sibiepa chôta diati a tlapa hawhta a châ.
13Sawchapaw hrupa cha,
A paw châta chhiena châ ta;
Lapinô paphôh thaipa chhao,
Ti di a thlaoh ngâ thlâh hapa hawhta a châ.
14O nata sôh zy cha pawzy tawhta ryuto châ ta,
Lapinô sopa deikua cha Abeipa tawhta a châ.
15Thathina ta mokuhthuna liata pangiasa ta,
Chyhsa a ychakhyhpa cha nodi a tao aw.
16Biepiepa a vaopa cha a hro a vaopa châ ta,
A lâpizy a uasa leipa deikua cha a thi aw.
17Dyhchhiepa chô liata a ria a phapa cha,
A sôh Abeipa dyu a pacheisapa châ ta;
Abeipa ta a dyuchei cha a thô aw.
18Na sawchapawpa cha chhorei teh,
Hnabeiseihna a y lah y;
A leidia thlâh ha awpa ta pachâ khah y.
19Pathi chhie ngaitapa chyhsa cha hriena â tyh aw,
Na pachhapa chhao ta pachha chanei ngâ thlâh ha awpa a byuh aw.
20Pasopakâna bie nathlie la pachuna a pyh mah y,
Achhâna liata sona na hmô aw.
21Chyhsapa palôh liata achhuahna hluhpi y ta,
Châhrasala a duah awpa cha Abeipa ryhraopa a châ tyh.
22Chyhsapa khochhihna cha kyhpachâna a hneipa he châ ta,
Haihthaipa hlâta cha sipasapa kho â chhih via.
23 Abeipa china cha hrona tlôkhei ta,
A hneipa maih palôh pahâ kawpa ta a pahâ ei ta,
Chhiena ta âmo cha tly aw vei.
24Thathipa cha beikoh liata a ku ny ta,
A pakah lâ chalo heih awpa dâhdei chhao hoh vei.
25Chyhsa a pasipasawhpa cha tu la,
Sona a phahlapa ta sona a chu aw ta;
Chyhsa sovâhpa cha chhorei la,
A pahnona a pôh aw.
26A paw chô liata kupathla ta a nô a papuapa sawchapaw cha,
Nozana nata nohzaona a tlôkheituhpa a châ.
27Ei sawchapawpa y, pachuna nathliepa na bâsai khiahta cha,
Novâhna biezy na paviasai aw.
28Pahnokheituhpa leilôpa ta adona pahneisao ta,
Moleipa pakah ta moleina a palâ tyh.
29Chyhsa pasipasawh a hmâhpazy châta hriena a mâ chiehpa ta y ta,
Ahrupazy hnôhky chhao tu awpa ta a mâ chiehpa ta a y.
Currently Selected:
BIESOZY 19: MARVBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
