BIESOZY 17
17
1Atudaih ngâna o liata kyhchhi pati niepa hlâta cha,
Adyryh kawpa ta laochhohpa bawpa a pha via.
2Sei sopa cha maophyuhna a tlôkheituhpa sawchapaw chô liata ryureih aw ta,
Unawhpa pakha hawhta a zibeipa ryu a to hra aw.
3Pathaisana beih cha tâkâ châta châ ta,
Patina mei chhao ngôh châta a châ;
Abeipa deikua cha palôh a pasia tyh.
4Hmo pha leipa a taotuhpa cha moleipa hmaokah nathlie tyh ta,
Haihthaipa chhao chochhiepa paleih lâ a nah a pachôh tyh.
5Sipasapa a mohnaopa cha,
Ano Taotuhpa palôh pasasa ta;
Mohropa chhiena liata a lypa chhao,
Hriena khôkhâh aw vei.
6Samohzy cha machâpazy lakho châ ei ta,
Sawzy rônahna chhao ama pawzy a châ.
7Reih phapa cha ahrupa nata a khyh leipa ta,
Hmao haihthaipa chhochhi abeisaw nata â khyh lei pachai.
8Panaopapana cha a pietuhpa châta dyu hawhta châ ta,
 heina lâ maihta a hlaotloh lymâ.
9Kyhpachâna a tluapa cha,
Paraona a khupa châ ta;
Paraona a reih chanei ngâ thlâh hapa deikua cha,
Viasazy a pachhaih tyh.
10Ahrupa ei za kha chheipa hlâta cha,
Asopa ei kha rapa â ngia pathu via.
11Chyhsa moleipa cha chakhia nawpa sai tlua ta,
Chavâta lyuhchâpa nôchhiepa tua thlupa a châ aw.
12Ahrupa a hru nota a tyh awpa hlâta cha,
Chavyh a taw la hapa a tyh awpa ngâh â chhih via.
13Chhiena ta phana a thôtuhpa cha,
Hmo phaleipa ta a o puasai aw vei.
14Ahryuna athaona cha ti pasapa hawhta châ ta,
Chavâta ahryuna a pua hlâta a hneisai ha mah y.
15Moleipa thai a pachâsatuhpa cha,
Abeipa châta pasichhihpa châ ta;
Mosiapa thailei a pachâsatuhpa chhao,
Abeipa châta pasichhihpa a châ.
16Ahrupa cha palôh a hnei leipa châ ta,
Chavâta sona chalei nawpa ta a ku liata sôh sopa cha,
Khâpa ma a phahnai aw?
17Viasa cha khatino rai ta kyhpachâ ta,
Unawhpa deikua cha tymâna daihti châta a pihpa a châ.
18Pahnona a phahlapa cha bie a taih ta,
A vaihzy mohmô ta sôhkâ a sokhâh tyh.
19Moleina hmo taopa a pahâh kawpa cha,
A hryuchhia a khohpa châ ta;
A chhikao a pasâhpa chhao,
Raona a tluapa a châ.
20Palôh akopa chyhsa cha hmo phapa hmô leipa ta,
Paleih haihthaipa chhao chhiena â tyh tyh.
21Ahrupa a satuhpa cha anosasyh ta pachâ a parôh ta,
Ahrupa paw cha alyna hnei vei.
22Palôh thaphapa cha thohna phapa châ ta,
Palôh pasapa deikua cha ruzy a pahi tyh.
23Moleipa cha arulâta panaopapana la ta,
Adona lâpizy a parao tyh.
24Sona cha novâhna a hneipa hmiakô liata y ta,
Ahrupa mo deikua cha kaokih liata a y tyh.
25Sawchapaw hrupa cha a paw pachârôhna châ ta,
Ano a satuhpa nô palôh pasana a châ.
26Mosiapa hriepa cha pha leipa ta,
Nôpawpazy amâ dona vâta tupa chhao pha vei.
27Bierei a chadopa cha chyhsa sopa châ ta,
A reikah a sôhpa chhao chyhsa novâhpa a châ.
28Ahrupa chhao â chalih thlâh ha khiahta cha,
Asopa hawhta pachâpa châ ta;
A hmao a mo khiahta cha,
Chyhsa novâhpa hawhta a ngiahpa a châ.
Currently Selected:
BIESOZY 17: MARVBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
