BIESOZY 12
12
1Chhoreina a pasôpa cha pahnona a pasôpa châ ta,
Rana a haopa deikua cha râhsa hawhpa a châ.
2Chyhsa phapa cha Abeipa khokheina hmô aw ta,
Moleina palôh a phaohpa deikua cha thailei a pachâ aw.
3Moleina hmo taona tawhta ahy hmah a duah leipa ei ta,
Mosiapa thari deikua cha phiapa châ aw vei.
4Chanô phapa cha a vahpa châta lakho châ ta,
Nozana a vaw tlôkheipa chanô deikua cha,
A vahpa ru a pahmytuhpa a châ.
5Mosiapa pachânazy cha a do ta,
Moleipa ryhraona deikua cha dôveina a châ.
6Moleipa biezy cha thisaih palo awpa ta a byh ta,
Adopa pakah deikua cha âmo a pachha tyh.
7Moleipazy cha thypa châ ei ta, y khao veih ei;
Mosiapa pathlazy deikua cha amâ duah lymâ aw.
8Pahnona phapa a hneipa chyhsa cha reithaina hlao ta,
Palôh chhiepa chyhsa deikua cha mohnaona a hlao tyh.
9Chyhsa pipawpa hawhta â tao ta nie a phahla thlâh hapa hlâta cha,
Chyhsa nawhpa châ ta chakaotuhpa hneipa a pha via.
10Mosiapa cha a sahroh hrona pachâ peimawh ta,
Moleipa zawngiahna deikua cha nôchhiena a châ.
11A chhaohlei a palietuhpa cha,
Nie awpa hluhpi hnei aw ta;
Hraoleipa a chadaituhpa deikua cha,
Pahnona â phahla.
12Moleipa cha hmoparaopa hraona sôh uahva ta,
Mosiapa thari deikua cha a pathei aw.
13Moleipa cha ano hmao paraona liata a ao ta,
Mosiapa deikua cha tymâna a khôkhâh tyh.
14Chyhsa cha a reikah thei tawhta hmo phapa ta a lôhrâ patlô ta,
Ano ku hmotaopa tlai ta ano lâ a vaw lie thlu heih tyh.
15Ahrupa cha ano mokhaoh liata a lâpi a do ta,
Asopa deikua cha chhosina a nathlie tyh.
16Ahrupa cha a ruchhôna thlai a lâ tyh ta,
Asopa deikua cha hmia pachhiena pahno lei â pachâ tyh.
17Pahnokheituh ngâchhihpa cha biedopa reih ta,
Pahnokheituh pakheipa deikua cha haipa bie a reih tyh.
18Zaozi chhôpa hawhta pasapa ta bie a reihpa y ei ta,
Asopa paleih deikua cha tlâhna a châ tyh.
19Biedopa hmao cha chhâzaw a daih ta,
Haipa paleih deikua cha buakha dei â daih.
20Hmo chhiepa tao a chhuahpazy palôh liata dôveina y ta,
Adyhna a taotuhpazy deikua cha alyna ama hnei.
21Mosiapazy chô liata hmo chhiepa tlô leipa ta,
Moleipazy deikua cha tymâna ta ama bie.
22Paleih haihthaipa cha Abeipa châta pasichhihpa châ ta,
Âdopa ta a taotuhpazy deikua cha â ly ei.
23Asopa cha a pahnopazy nyu ta,
Ahrupa deikua cha hruna bie a phuah tyh.
24Tiamapa ku ta ryureina chaba aw ta,
Thathipa deikua cha ku rai hriatuhpa a châ aw.
25Palôh rietheina ta chyhsa tha pachhâ ta,
Bie phapa deikua ta a palysa tyh.
26Mosiapa cha a vaih châta chhituhpa châ ta,
Moleipa lâpi deikua cha ama paviana a châ.
27Thathipa cha a sa kapa rao awpa hnei leipa aw ta,
Tiamapa deikua cha dyhphana ryusôhpa a hnei aw.
28Siana lâpi liata hrona y ta,
Cha lâthlôh liata cha thina y vei.
Currently Selected:
BIESOZY 12: MARVBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
