BIESOZY 10
10
Mosiapa nata moleipa pakhona
1He he Sawlawmaw biesozy a châ:
Sawchapaw sopa ta a paw palysa ta,
Sawchapaw hrupa deikua cha a nô pachârôhna a tlôkhei tyh.
2Moleina ta sôh hmôpa cha athôhna y leipa ta,
Siana deikua cha thina tawhta a pachha tyh.
3Mosiapa nodi awpa cha Abeipa ta pasaih leipa ta,
Moleipa aohkhopa deikua cha a pakhâ ha tyh.
4Ku thathipa ta dyhchhiena tlôkhei ta,
Ku tiamapa deikua cha hneirôna a tlôkhei ty.
5Nopi daihti liata a pachô pakhypa cha sawchapaw sopa châ ta,
Sâh hria nota a mô thlâh hapa sawchapawpa deikua cha nozana a tlôkhei tyh.
6Mosiapa luh liata vânoh y ta,
Moleipa pakah deikua cha nôchhiena ta a pahly.
7Mosiapa atheithlâhna cha vânoh tona châ ta,
Moleipa moh deikua cha a thuzao aw.
8Palôh sopa cha biepiepazy a pyh ta,
Ahrupa reikah hluhpa deikua cha a pao aw.
9Â dopa ta a siepa cha â bohpa ta sie ta,
A lâpi a pakosapa deikua cha â lâ thlyu tyh.
10Chyhsa a mopasihpa cha nôpona tlôkhei ta,
Ahrupa reikah hluhpa chhao a pao aw.
11Mosiapa pakah cha hrona tihnawh châ ta,
Moleipa pakah deikua cha nôchhiena ta a pahly.
12 #
Zâm 5.20; 1 Pit 4.8 Ahaona ta ahryuna papua ta,
Kyhpachâna deikua cha paraona zydua a khu tyh.
13Novâhna a hneipa hmaozy liata sona hmôpa châ ta,
Pahnona a phahlapa châta deikua cha a ky châta sôsi a y.
14Asopa cha pahnona pachô ta,
Ahrupa pakah deikua cha raona a pahniasa tyh.
15Chyhsa hneirôhpa sôh cha â bohna khihpi thokhy châ ta,
Sipasapazy dyhchhiena cha ama raona a châ.
16Mosiapa hriapasana cha hrona tlôkhei ta,
Moleipa athôhna deikua cha paraona a tlôkhei tyh.
17Pachuna a pyhtuhpa cha hrona lâpi liata sie ta,
Rana a dythapa deikua cha mohropazy â chhi chhei tyh.
18Ahaona a phihtuhpa cha hmao haihthaipa hnei ta,
Kyh reina bie a papuapa cha ahrupa a châ.
19Bie hluhpi a reihpa cha paraona a phahla leipa ta,
A hmao a sohsi theipa deikua cha chyhsa sopa a châ.
20Mosiapa paleih cha tâkâ suapa châ ta,
Moleipa palôh deikua cha khâpa hmah a phuh vei.
21Mosiapa hmao ta chyhsa hluhpi pasa ta,
Ahrupa deikua cha pahnona a phahlapa ta a thi tyh.
22 Abeipa byhnâ cha chyhsa pahneirôhsa ta,
Pachârôhna baichha tyh vei.
23Ahrupa châta hmo doleipa taopa cha saisopa hawh châ ta,
Novâhpa châta deikua sona cha hmo sôhpa a châ.
24Moleipa cha a chipa hawh tlai ta a chô liata vaw tlô aw ta,
Mosiapa khopa deikua cha piepa a châ aw.
25Khisô vaw pathli ta,
Moleipa y khao leipa ta,
Mosiapa deikua cha chhâzaw lôbô a châ.
26Hâh châta kresawhti thaopa nata mo châta meikhuh hawhta,
Thathipa chhao ano a tuahtuhpa châta a châ.
27 Abeipa china cha hro pareihna châ ta,
Moleipa kôzy deikua cha pachhohsapa a châ aw.
28Mosiapa hnabeiseihna ta alyna tlôkhei ta,
Moleipa saduthliena deikua cha a leidia aw.
29 Abeipa china cha seina hnei leipa châta a thokhy châ ta,
Moleina hmo a taotuhpazy châta deikua cha raona a châ.
30Mosiapa cha râh tawhta papuapa châ leipa aw ta,
Moleipa deikua cha râh liata pahrâ aw vei.
31Mosiapa pakah ta sona papua ta,
Nôchhiepa paleih deikua cha taipa a châ aw.
32Mosiapa hmaozy ta a pyh tlâhpa pahno ta,
Moleipa pakah deikua cha nôchhiena bie a reih tyh.
Currently Selected:
BIESOZY 10: MARVBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
