ISAI 8
8
Asuria ta Izarei a siehnao
1 Abeipa ta ei hnohta, “Châ rona phiapa la la, mo to rei thai awpa ta, ‘Mahe-salâ-has-bâza#8.1 “Mahe-salâ-has-bâza” tahpa cha, “Hraona chatlie ta, paruna â para,” tahna a châ. châta,’ tahpa ta roh teh. 2Pahnokheituh ngâchhihpazy tlua aw ei na ta, theihthaipa Uria nata Zeberekiah sawchapawpa Zekaria ta eina pahnokhei aw ei,” tah ta.
3Chatawhcha hrohsonô lâ a ngia na ta, saw phaoh ta, sawchapawpa sa ta. Abeipa ta ei hnohta, “A moh Mahe-salâ-has-bâza bi teh. 4Hawti ta, ‘Ei pâ,’ ‘Ei nâ,’ a tah thai hlâta, Dâmaskâ hneirôna nata Samâri hraona hmozy cha Asuria bei hmiakô liata siekheipa a châ aw,” tah ta.
5 Abeipa ta ei hnohta reih via heih ta, 6“He phopi heta nai zualua ta a lohpa Silôah#8.6 Silôah tizy he Kihaw chavah ti pa-opa Zerusale liata tipo a châ. tizy dytha ei ta, Rezi nata Remâliah sawchapawpa chô liata amâ lypa vâta, 7pachâ teh u, Abeipa ta Ufrâti Chavah hawhta a laipa nata thatlôpa Asuria bei nata a rônahna zydua ama chô liata a palo thlu aw. A kao zydua bie aw ta, a ngiahkâ zydua taihta a bie khai aw. 8Zudâh chhao tisaih ta tlô thlu aw ta, a rao taih tlai ta a vao aw,” a tah.
Châhrasala Khazohpa eima hnohta y ta,
Na râh doh nata hâ zydua
A mathlaw ta a khu khai aw.
9Phopizy saih u, paraopa ta y u la,
Pakeichheihpa ta y teh u.
Râh hlapa zydua saih u,
Nama nah pachôh teh u;
Chariah chhaichhi a tao u la,
Pakeichheih khaipa ta y teh u;
Chariah chhaichhi a tao u la,
Pakeichheih khaipa ta y teh u.
10Pachânazy cha reih pahmaoh teh u,
Châhrasala khâpa hmah châ aw vei;
Bie cha reih teh u,
Châhrasala a duah aw vei,
Khazohpa eima hnohta a ypa vâta.
Khazohpa china
11 Abeipa ta a ku thatlôpa ta ei hnohta bie reih ta, he phopi lâpi a chhih lei awpa ta hetana heta zikyu einâ râ:
12 #
1 Pit 3.14,15 “He phopi ta teiparuna a tahpa cha,
Teiparuna ta rao hra leipa u la;
Ama chipa chhao chi hra leipa u la,
Ama chihuhpa chihuh hra khuh vy.
13Pheisaihzy Abeipa deita cha,
Pathaihpa ta rao aw ei chi ta;
Ano deita cha nama chipa châ sala,
Ano cha nama chihuhpa châ mawh sy.
14 #
1 Pit 2.8
Ano cha supathaihpa châ aw ta,
Izarei phopi mianopazy châta deikua cha,
Moleina lô châ aw ta,
Achapiana lôpanô a châ aw.
Zerusale khihsawzy châta chhao,
Aphyh nata khoheih a châ aw.
15Chyhsa hluhpi a chapiapa ta,
Pao aw ei ta ama keichheih aw;
Khoheih chôkhâhpa châ aw ei ta,
Patupa ama châ aw.
16Bietapa he chaty la,
Pachuna bie he,
Ei pachupazy hry liata chahnao pa-i mah y.”
17 #
Heb 2.13
Chavâta Zakaw pathlazy tawhta a hmia a nyu hapa Abeipa cha hâ aw na ta, ei mokhâh aw. 18#Heb 2.13Moh teh u, kei nata Abeipa ta eina piepa sawzy he, Izarei liata ngiana nata pamosanazy châta Zaio Tlâh liata a pahrâpa Pheisaihzy Abeipa ta a hmâpazy eima châ hih. 19Chyhsazy ta, “Pavaw tieta hawhta sâh ei ta, chaeichamypa ta bie a reihpa peihthaipa nata dyuthaipa zy a saohiah teh u,” ama cha tah tita, hetana heta a chhy teh u. Phopi miakha châ hra tlôhpa khiahta cha, ama Khazohpa amâ saohiah awpa châ hri vei ma? Ahrohpazy châta ma athipa tlao amâ saohiah aw? 20Ryhpa nata bieraopa hawhta bie a reih leipazy cha, âmo châta khih a deih mâh leipazy ama châ. 21Nôpopa nata nodipa ta râh ama chahryh aw. Ama no a di tita, ama bei nata ama Khazohpa reipachhie aw ei ta, ruchhôpa ta avâ lâ ama ua aw. 22Alei lâ moh aw ei ta, nôpona nata zohna nata pachârôhna zohmyhna ta a biepa hmô aw ei ta, zohna chha kaluhpa liata thypa ama châ aw.
Currently Selected:
ISAI 8: MARVBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
