ISAI 7
7
Bei Ahâza châta Isai bietapa
1 #
2 Abei 16.5; 2 Ttr 28.5,6 Uzia sawchapawpa Zôthâ sawchapawpa Zudâh bei Ahâza â beina daihti liata, Aramia bei Rezi nata Remâliah sawchapawpa Izarei bei Pekâ cha Zerusale a dyuh awpa ta khyhnao ei ta, châhrasala pahnie thei leipa ei ta. 2Aramia ta Epharai nata azaona a taopa kyh Dâvi pathlazy ama chho nahta, Ahâza nata a chyhsazy palôh cha lyurâhpa thokôzy thlih ta a chalyupa hawhta a chalyu ta.
3 Abeipa ta Isai hnohta “Na sawchapawpa Siazasubâ#7.3 “Siazasubâ” tahpa cha, “Laibâhpazy ama vaw kua aw” tahna a châ. a chhi la, machhua tipo chhâna liata Chysia Pasutuhpa Lyu lâpi liata Ahâza a kaw tyh u la, 4a hnohta, ‘Â vaih la, a thlih thlâh ha la, chi khah y. He meirei peih pachhupa khu ngâpa miano, Aramia bei Rezi nata Remâliah sawchapawpa hiehâhna ru ngaitapa vâta na palôh dua khah sy. 5Aramia nata Epharai nata Remâliah sawchapawpa ta na chô liata hmo chhiepa tao a chhuahpa ta, 6“Zudâh khyhnao sih la, kaw pachisa ei suh u. Keimo châta kaw pahnie sih la, Tâbi sawchapawpa cha, cha liata bei ta tao ei suh u,” ama tah. 7Abeipa Zehôvâh ta hetana heta a tah:
“‘Cha cha a duah leipa aw ta,
Vaw tlô hra aw vei.
8Aramia luh cha Dâmaskâ châ ta,
Dâmaskâ luh cha Rezi a châ.
Kô sycharu nata kô pangawh chhôh ta,
Epharai cha phopi a châna parao khaipa a châ aw.
9Epharai luh cha Samâri châ ta,
Samâri luh cha Remâliah sawchapawpa a châ.
Namâ ngiapâna â i vei khiahta la,
 ipa ta a duah thei aw veih ei chi,’ a tah,” tah ta.
Imanuel ngiana
10 Abeipa ta Ahâza hnohta, 11“Abeipa na Khazohpa tawhta ngiana hiah teh. Cha ngiana cha Athihkhih hawhta athupa tlyma, vârâh hawhta a sâhpa tlyma châ mawh sy,” tah heih ta. 12Châhrasala Ahâza ta, “Hiah aw va na, Abeipa pasia aw va na,” tah ta. 13Chatawhcha Isai ta, “Hy Dâvi pathlazy saih u, tahmâ thei teh u! Chyhsa rie nama pathei ha tawhta cha a daih ha bâ vei ma, khazia ei Khazopa taihta a rie nama pathei tly? 14#Mat 1.23Chavâta Abeipa tlai ta ngiana a cha pie aw ei. Pachâ teh u, laihsa kôpa ta saw phaoh aw ta, sawchapaw sa aw ta, a moh Imanuel#7.14 Hebrai reih ta “Imanu” cha “Eima hnohta” tahna châ ta, “El” cha “Khazohpa” châ ta, chavâta “Imanuel” tahpa cha “Khazohpa eima hnohta a y” tahna a châ. a bi aw. 15Hmo chhiepa dythapa ta hmo phapa atlyhna châh a pahno tita cha, sâhpiti kuapa nata kheihti a nie tyh aw. 16Hawtipa ta hmo chhiepa dythapa ta hmo phapa atlyhna châh a pahno hlâ chhao ta, na chi kawpa bei panozy râh cha siesaipa a châ aw. 17Epharai ta Zudâh a puasai noh tawhta a tlô beih leipa nohzy cha, Abeipa ta Asuria bei vaw tuah aw ta, na chô liata nata na phopi chô liata nata na paw chhôhkha chô liata a patlôsa aw,” tah ta.
18Cha noh liata, Abeipa ta Izi chavahzy chhâna lâta mathyupa a ypa nata Asuria râh liata kheih a ypa zy cha a pahipa ta a aw aw ei. 19A vy aw ei ta, saikao athupa liata zy, lôpanô keina khaoh liata zy, ahloh buh zydua chô liata nata ti yna zydua liata ama pahrâ aw.
20Cha noh liata, Ufrâti Chavah haosâ lâta Asuria bei tawhta â hlâpa chaidâh hmâpa ta, Abeipa ta nama sâ nata keih hmizy ngyu khai aw ta, nama kâhhmi chhao a ngyu khai aw.
21Chatawhcha hetana heta a vaw châ aw. Cha noh liata chyhsa pakha ta viahchao zeinô pô kha nata mietaku pô no pasa aw ta, 22sâhpiti hluhpi ama papua awpa vâta, sâhpiti kuapazy a nie tyh aw. Râh liata pahlôhpa zydua chhao sâhpiti kuapa nata kheihti ama nie tyh hra aw.
23Cha noh liata, sekel sâh kha mâpa kre zôh sâh kha y tyhna su zydua cha, diahsai nata ahloh su lâta amâ lie khai aw. 24Râh zydua cha diahsai nata ahloh ta a bie khai awpa vâta, chyhsa ta libaw nata châtaizy chabapa ta, cha su lâ cha a pangai aw. 25Tupi ta lyu thlyu tyhna tlâhthlôhzy lâ chhao, diahsai nata ahloh chipa vâta, sie khao aw veih ei chi. Viahchaozy pathliena nata mietakuzy tlaihna su lâta amâ lie ha aw.
Currently Selected:
ISAI 7: MARVBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
