ISAI 33
33
Ngiachhie ahawna
1Nâ, a pahleipadiatuhpa y,
Pahleipadiapa châ mâh vei hra la,
Na hu a po na!
Nâ, a paphasaituhpa y,
A paphasaipa châ mâh vei hra la,
Na hu a po na!
Chyhsa na pahleipadiapa tawhta nâ chalih tita,
Pahleipadiapa châ hra aw chi ta;
Nâ paphasaipa na patlô tita,
Ama châ paphasai hra aw.
2Hy Abeipa, eima cha hâ thlâh haw,
Miah ngiachhie mah y.
My tato ta eima bâh châ la,
Nôpona daihti liata eima pachhana châ mah y.
3Tyhreihna pyu vâta phopizy a râ ei ta,
Hy Abeipa, na thyu tita râhzy ama pai lymâ.
4Hy phopizy saih u, nama hraona sôhzy cha,
Chângyu chhohna pakhypa hawhta pakhypa châ aw ta,
Khawsuzy a zawpa hawhta a zawhnaopa a châ aw.
5Vâ chô sâhpa liata a pahrâpa a châpa vâta,
Abeipa cha cheihchalopa ta y ta,
Zaio cha adona nata siana ta a pabie aw.
6Ano cha na hro chhôh ta nâ ichana a châ aw;
Na pachhana sôhpa châ aw ta,
Na sona nata na pahnona a châ aw;
Abeipa china cha Zaio ryusôhpa a châ.
7Nathlie tua u, ama pasaiphazy khôtho liata awh ei ta,
Adyhna lyuhchâpazy thata ama cha.
8Lâlaizy pathaih parohpa ta y ta,
Khitlyhpa y khao veih ei.
Biehrai parao ei ta,
Khihpizy khâpasaw ta reih leipa ei ta,
Chyhsa hrona chhao pachâ khao veih ei.
9Râh cha mâchhiesapa ta panao ta,
Lebanaw cha nohzaopa ta a uah lymâ.
Saraw bypi cha râhchawhpa lyu ta,
Bâsanâ nata Kâmel chhao ama hnazy a zô khai haw.
10 Abeipa ta hetana heta a tah:
“Tahmâ cha thyu aw na ta,
Tahmâ cha keimasasyh a chalo aw na ta,
Tahmâ cha cheihchalopa ta ei y ha aw.
11Saviah saw phaoh ei chi ta,
Sawphao saw nama sa;
Nama hu cha nâmo châ kâ awpa mei a châ.
12Chinaih lô raopa hawhta,
Phopizy cha mei ta raopa châ aw ei ta;
Ahlohzy chhawh ta mei ta raopa hawhta,
Âmo chhao taopa ama châ aw.
13Nâmo, lâhlapi liata a ypazy saih u,
Ei hmo taopa thâtih thei u la;
Nâmo, lâhnia liata a ypazy saih u,
Ei hmotaotheizie pahno teh u.”
14Zaio liata moleipazy cha chipa ta y ei ta,
Khazohpa a pachâ leipazy amâ chalyu;
“Eima hry liata ahy ma
Mei kâ haipa hnohta a pahrâ thei aw?
Eima hry liata ahy ma
Tlyzaw ta a kâpa hnohta a pahrâ thei aw?” ama tah.
15Siana ta chareipa ta bie dopa a reihpa,
Avyuhna taopa ta athôhna hmôpa a dythapa,
Panaopapana la lei awpa ta a ku a phaihpa,
Thisaih palona bie a thei lei nawpa ta a nah a chahupa,
Moleina lâ mo lei awpa ta a mo a pasopa,
16Cha chyhsa tlai cha su sâhpa liata a pahrâ aw.
 chhaina su cha lôpanô thokhyzy châ aw ta,
A nie awpa piepa a châ aw;
Ti a do awpa chhao chie aw vei.
17Na mozy ta abei angiana hmô aw ta,
Râh kawh ngaitapa a sai aw.
18Chichhihpa nâ tyhpa kha,
Na palôh ta pachâ sualuah aw ta,
“Maluh reihtuhpa kha khataih liata a y haw?
Râhpaw pathliahtuhpa kha khataih liata a y haw?
Riahvaina o sâhpazy a pakituhpa kha
Khataih liata a y haw?” a tah aw.
19Na thei leipa reih hropa a cheihpa phopi kha,
Hmô khao leipa aw chi ta;
A paleih a pahluapahlypa vâta,
A bie reipa na no a vâh leipa
Phopi a hrâh ngaitapa kha,
Hmô khao aw va chi.
20Zaio cha moh tua u,
Kyh eima chhi nawpa khihpi cha!
Na mozy ta Zerusale khihpi cha a hmô aw.
Cha khihpi cha nôpona y leina khihpi châ aw ta,
Pasie thei leipa poh o a châ aw.
A tôhzy phiapa châ beih leipa aw ta,
Paraina ri kheihawhpa hmahta chhiepa châ aw vei.
21Cha liata Abeipa cha a rônahna chhaota,
Eima châta chavah kawhpa hawhta châ aw ta,
Vahtiepazy hawhta a châ aw;
Cha liata balyh hiana chhaopazy sie leipa aw ei ta,
Balyh laipazy ta siepahlie aw veih ei.
22 Abeipa cha miah pachiatuhpa châ ta,
Abeipa cha ryhpa miah pietuhpa a châ.
Abeipa cha eima bei châ ta,
Ano ta miah a pachha aw.
23Na chaorizy padaopa châ ta,
Poh zawna tôh pa-i thei leipa ei ta,
Balyh poh pakai thei vei.
Hraona sôh hluhpizy raipa châ aw ta,
Pheisypazy chhao ta amâ phao hra aw.
24Khihsaw ahy hmahta,
“Tlâh va na,” tah khao leipa aw ei ta;
Cha liata a pahrâpa phopi cha,
Ama moleina a ngiahthaipa a châ aw.
Currently Selected:
ISAI 33: MARVBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
