ISAI 32
32
Bei siapa
1Pachâ teh u, siana ta ryu a reih awpa bei vaw pua aw ta,
Beimachâzy ta adona ta ryu ama reih aw.
2Thlih tawhta anyuna su châ chyu aw ei ta,
Chothyu tawhta anyuna su ama châ aw.
Su chawhpa liata vahtie tizy hawhta châ aw ei ta,
Râh rietheipa liata lôpanô nohpahli hawhta ama châ aw.
3Mo pavâpazy mo cha paso khao leipa aw ta,
Nah theipazy nah ta a nathlie bâ aw.
4Palôh charâpa palôh cha,
Novâhpa ta pahno thai bâ aw ta;
Reih chaawpa paleih chhao,
A siapa ta bie a reih thei bâ aw.
5Ahrupa cha zachhihpa tah khao leipa aw ei ta,
Moleipa chhao ngâchhihpa tah khao aw veih ei.
6Ahrupa cha hruna bie reih ta,
Hmo moleipa tao awpa sai a pachâ tyh.
Khazohpa kho leipa hmozy tao ta,
Abeipa kyh liata bie doleipa a reih tyh.
Nodipazy nie paky ta,
Dâhphipazy ti pado vei.
7Moleipa châta la,
A hmobaohzy taihta pathaih leipa a châ.
Haipa biezy hmâpa ta dyhchhiepazy parao a chhuah ta,
Amâ do thlâh hana chôta phahlapazy parao a chhuahpa ta,
Hmo pha leipazy a pachhuapanoh tyh.
8Zachhihpa deikua cha,
Zachhihpa hmozy pachhuahpanoh ta,
Zachhihpa hmozy liata â duah tyh.
Chanô chhôhmohpazy zikyurâna
9Nâmo, pachâ pha kawpa ta a ypa chanôzy saih u,
Thyu u la, ei ao nathlie teh u;
Nâmo, chhôhmoh kawpa ta a ypa sawchanôzy saih u,
Ei bie lâ nama nah pachôh teh u.
10Nâmo, chhôhmoh kawpa ta a ypazy saih u,
Kô kha hleipata liata nama nô a po aw;
Kre kô veih leipa aw ta,
Theilâpa kô chhao veih aw vei.
11Nâmo, pachâ pha kawpa ta a ypa chanôzy saih u,
A chalyu u la;
Nâmo, chhôhmoh kawpa ta a ypazy saih u,
Nôpopa ta y teh u.
Nama chysia pahluhpa ta thluahruapa ta y u la,
Nama chai liata latho poh a saih teh u.
12Lyu pha kawpazy ta
Kôvei papua khao leipa ei ta;
Kre zôh pathei pha kaw tyhpazy ta
Ama pathei khao leipa vâta,
Nama chachôhna a chô u la,
Chaphôhtu teh u.
13Ei phopi chhaohlei chô liata
Ahloh nata diahsai zy pyuh ta;
Khihpi haosai phapa liata a ly kaw tyhpazy o liata
Alyna y khao vei;
Chavâta nama chachôhna a chô u la,
Chaphôhtu teh u.
14Abei o cha siesaipa châ aw ta,
Chyhsa hluhpi pahrâna khihpi chhao puasaipa a châ aw.
Tlâhthlôh nata riahvaina o sâhpa zy chhao,
Lôpuzy lâta chhâzaw ta amâ lie aw.
Lyurâhpa alâzy alyna châ aw ei ta,
Mietakuzy tlaihna ama châ aw.
15Chô lâ tawhta Thlahpa hrypa eima châ tita,
Râhchawhpa cha lei phapa lyu lâta a lie aw ta,
Lei phapa lyu cha râhmâhpa a lyu hlâlei cha,
Cha hawhta a châ aw.
16Cha tina cha râhchawhpa liata adona charei aw ta,
Lei phapa lyu cha siana ta a ypâ aw.
17Siana ta thlalôhna sa aw ta,
Siana theilâpa cha,
Chhâzaw sidiana nata hnangâhna a châ aw.
18Ei phopi cha,
Thlalôhna râh liata pahrâ aw ei ta;
Abohna su liata pahrâpa ta,
Apahâna sidiapa zy liata ama pahrâ aw.
19Pareih ta râhmâhpa chanaoh ta,
Khihpi paby khai ha hra sala,
20Chavah kiah to liata chi cheih aw ei chi ta,
Viahchao nata alâ zy kho ta patlaihsapa ta,
Thaphapa ta nama y aw.
Currently Selected:
ISAI 32: MARVBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
