ISAI 16
16
1Râh ryureituhpa châta mietakutaw paphao u la,
Selâ tawhta râhchawhpa lâpi a chhihpa ta,
Zaio sawchanô tlâh lâ paphao muh vy.
2Pavaw a bu tawhta phopa viavipa hawhta,
Môabâ zuahzy cha Anaw chavah chakanazy liata viavipa ta ama y.
3Môabâ ta Izarei hnohta hetana heta a tah:
“Ryh miah raopa la,
Ryu miah reipa teh;
Nohchhô locho no chhao ta zâ hawhta na nohdi paysa la,
Râh tawhta papuapazy cha nyu la,
A râpazy patusa khah y.
4Môabâ tawhta papuapazy na hnohta pahrâ ei sala,
Paraotuhpa tawhta amâ chhaina châ mah y.
Tlybaituhpa y khao leipa ta,
Paraona chhâ ta,
Phei ry liata tlypâtuhpa a leidia tita,
5Dâvi poh o liata kyhpachâna ta beidyuchhai paduapa châ aw ta,
Cha liata ryureituhpa a tyuhpa cha,
Adona ta ryu a reihpa châ aw ta,
A chatliepa ta siana hmo a taopa a châ aw.”
6Môabâ apalaina thâtih thei pi ta,
 khotlâhna, â palaina, a sâlâna,
Âh, â vaw palai kaw tlai na!
Châhrasala â reithainazy cha aruapa a châ.
7Chavâta Môabâ cha Môabâ châta cha sala,
Mo to ta cha mawh ei sy.
Kiaherese kre chawhpa viahchhâzy châta,
Mâchhiesapa ta y u la,
Pachârôh ngaitapa ta y muh vy.
8Hesbaw lyuzy cha pachih khai ha ei ta,
Sibmâ kre a lo haw;
Râh beizy ta a chiahzy thlâ ei ta,
Zaze khihpi taihta a zawh hôlô ta,
Râhchawhpa taihta â zawh.
A chhyhzy hiepatlapa ta y ta,
Tilaipi khô lâ taihta hiepatlapa ta a y.
9Chavâta Sibmâ kre zôh châta,
Zaze chana liata kei chhao cha na ta,
Hy Hesbaw nata Elialeh,
Ei mothlihzy ta ei cha padâ kanieh ei;
Na nopi theilâpa nata na sâh hria vâta,
Thapha ta a awh tyhpa pyu â chalih haw.
10Lyu kôvei pha kaw tyhpa tawhta,
Alyna nata thaphana zy pai ha ta;
Kre sadôzy liata hla sa khao leipa ei ta,
Rahao khao hra leipa ei ta,
Kre saohtuhpazy ta kre saohna liata saoh khao veih ei;
Thaphana pyuzy ei chalihsa khai haw.
11Chavâta ei chhôh nata rih zydua cha,
Môabâ vâta totâ hawhta paro ta;
Kiharese vâta ei chhôhso â rôh.
12Chatawhcha hetana heta vaw châ aw ta, Môabâ cha su sâhpazy lâ â luah tita, anosasyh ta a tha a pachhâ ta, thlahchhâ awpa ta a achhyna o lâ a pangaipa chhao ta, phahnai aw vei.
13Khazy kha Abeipa ta Môabâ kyh liata kha hlâta a vaw reipazy a châ. 14Tahmâ deikua cha, Abeipa ta hetana heta a tah: “Ahlaopa kô reizie ta reipa ta, kô thôh chhôh ta Môabâ rônahna cha panawhpa a châ aw. Râhsaw maluh hluhpi a hneina chôta, cha hmo cha a chô liata tlô aw ta, laibâhpazy cha a chyhta dei châ aw ei ta, ama chyh hleikhô ta ama dadieh kaw aw.”
Currently Selected:
ISAI 16: MARVBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
