ISAI 15
15
Môabâ kyh chhochhieliena
1 #
Isai 25.10-12; Zer 48.1-47; Ezk 25.8-11; Ams 2.1-3; Zep 2.8-11 He he Môabâ kyh chhochhieliena bie a châ:
Môabâ râh Ari khihpi cha,
Zâ kha ta parao khaipa a châpa vâta,
Môabâ cha lei ha ta;
Môabâ râh Kiri khihpi chhao,
Zâ kha ta parao khaipa a châpa vâta,
Môabâ cha a lei haw.
2Dibô#15.2 Dibô he Môabâ khihpi peimawh chaipa a châ. cha achhyna o lâ pangaipa ta,
Cha awpa ta a su sâhpazy lâ khy ta;
Môabâ ta Nebô nata Medebâ khihpizy a chakhei ei.
Luh zydua pôlô khai ha ta,
Kâhhmi zydua a tlyh khai haw.
3Lâlaizy liata latho poh a bupa ta,
Vâphuh nata tlyliahzy liata,
Chyhsa to sâh ei ta ama cha.
4Hesbaw nata Elialeh cha ei ta,
Ama chapa pyu cha Zahâ taihta â thei;
Chavâta Môabâ pheisaihzy cha,
Ao paro ngaitapa ta awh ei ta,
Ama palôh a dua khai haw.
5Môabâ vâta ei chhôhso â rôh;
A chyhsazy Zawâ lâ a râ ei ta,
Ekalâselisia lâ amâ râ khai haw.
Chana chôta Luhi chakhâ kiah ei ta,
Raona kyh awh laihpa ta Hôrônai lâpi lâ ama sie.
6Niri tizy kua khai ha ta,
Sibiepazy raohpa ta,
Thoti hrohpazy thi khai ha ta,
Râh hrohpa a lei khai haw.
7Chavâta sôh ama hmôpa nata ama pachôpazy cha,
Râbuh Chavah#15.7 He liata “Râbuh Chavah” he, râbuh ta a khu khai hapa chavah reina a châ. lâ ama siekhei haw.
8Môabâ râhrizy liata awhsâhpa pyu pathâh ta,
A chapa pyu cha Ekalai taih tlô ta,
A chaphôhtupa pyu Bereli taihta a daih.
9Dibô tizy cha thisaih ta bie ta,
Dibô chô liata hmo rarôh y viapa ei patlôsa aw.
Môabâ tawhta a râpaipazy lâ chakeibarôhneipa tuah aw na ta,
Râh liata a nguapazy hnohta chhao chakeibarôhneipa ei tua thlu aw ei.
Currently Selected:
ISAI 15: MARVBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
