BIECHHOTUHPA 3
3
Ato châta daihti raopa a châ
1Ato châta daihti y ta,
Avâ ry liata hmo to châta daihti raopa a châ.
2Pi daihti y ta, thi daihti a y;
Lo daihti y ta, lo chiehpa phia daihti a y;
3Thie daihti y ta, patlâh daihti a y;
Phie daihti y ta, sa daihti a y;
4Cha daihti y ta, pahnei daihti a y;
Mâchhiesa daihti y ta, lâ daihti a y;
5Alô thy daihti y ta, alô pahmaoh daihti a y;
A pyhpahly daihti y ta, a pyhpahly lei daihti a y;
6Tlua daihti y ta, pahlei daihti a y;
Paso daihti y ta, thy pathlah daihti a y;
7Hrie daihti y ta, bieh daihti a y;
A chalih daihti y ta, bierei daihti a y;
8Kyhpachâ daihti y ta, a hao daihti a y;
A dyuh daihti y ta, a dyh daihti a y.
Khazoh piepa raihria
9Raihriatuhpa ta a hriapasana tawhta khâpa athôhna ma a hmo? 10Khazohpa ta chyhsa sawzy hnohta a tymâkhei awpa ta rai a vaw piepa cha ei pahno haw. 11Ato ama daihti chyu liata â ngia ngaitapa ta taopa ta, chyhsapa palôh liata tlyzaw soh ta, châhrasala Khazohpa hmotaopa cha âthaona tawhta achhâna taihta pahno thei hlei vei. 12A ly ngaitapa ta y ta, ama hro chhôh zydua hmo phapa taopa hlâta a pha viapa y vei tahpa ei pahno haw. 13Chyhsa to ta niepa ta doh ei sala, ama hriapasana zydua liata a ly mawh ei sy. Cha cha Khazohpa kuhria a châ.
14Khazohpa ta a taopa maih cha a y kôzaw aw tahpa ei pahno. Khâpa hmahta baichha theipa châ leipa aw ta, la bâ theipa cha aw vei. Chyhsazy ta a hmiakô liata chizapa ta ama y thei nawpa ta, Khazohpa ta a taopa a châ. 15A y haipa he, a y chiehpa kha châ ta; a vaw y awpa chhao, a y chiehpa kha a châ. Khazohpa ta a lei hapa a paysa heih tyh.
Dohlei tawhta dohlei lâ
16Cha dei châ vei, adona yna su liata paraona y hra ta, siana yna su liata chhao paraona a yzie noh ry liata ei hmô. 17Hmo to nata rai to châta daihti raopa a châ khaipa vâta, Khazohpa ta mosiapa chhao moleipa chhao a pachia khai aw ei tahpa ei palôh ta pachâ na ta. 18Chyhsa sawzy cha sahrohzy deita ama châzie âmosasyh ta amâ pahno thei nawpa ta, Khazopa ta âmo cha a pasia ei tahpa chhao ei palôh ta pachâ na ta. 19Chyhsa sawzy chô liata a tlô awpa nata sahrohzy chô liata a tlô awpa cha miakhapa châ ta, pakha thi ta, ahropa chhao a thi hra. Husona miakha a hneipa châ ei ta, chyhsapa cha sahroh hlâta a duahmo pha via hlei vei. Ato zydua hraoleipa a châ khai. 20Ama pangaina su â lyu khai. Ama zydua ta dohlei tawhtapa châ ei ta, ama zydua ta dohlei lâ ama kua heih. 21Chyhsapa thlahpa chô lâ kiah ta, sahroh thlahpa alei ry lâ a zu tahpa ahy ma a pahno? 22Chyhsapa châta cha, raihria awpa he a tovyuh a châpa vâta, a raihria liata a ly awpa hlâta a pha viapa y vei tahpa ei hmô haw. A thi khô lâta hmo a ypa pamosa awpa ta, ano cha ahy ma a vaw kuakhei thei aw?
Currently Selected:
BIECHHOTUHPA 3: MARVBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
