BIECHHOTUHPA 10
10
Hruna theizy
1Mathyu thipa thu roh ta ropahâhpa roh a pahleipa hawhta,
Bâhta hruna ta sona nata zachhihna a pahlei thei.
2Asopa palôh cha chachâh lâ a heih ta,
Ahrupa palôh deikua cha chavei lâ â heih tyh.
3Ahrupa cha lâpi liata a sie no taihta sona a phahla ta,
Ahrupa a châzie chyhsa to hnohta a phuah laih.
4Ryureituhpa ta na chô liata a hie a hâh khiahta cha,
Na yna su puasai khah y;
Hiehâhna a pai tita cha,
Taopasina lai ngaitapa chhao a ngiahthaipa a châ tyh.
5Noh ry liata hmo chhiepa miakha hmô na ta, ryureituhpa tao chheipa lai ngaitapa a châ: 6Ahrupazy cha su sâhpazy liata sopa châ ei ta, hneirôhpazy su nawhpa liata amâ tyupa ei hmô. 7Arâ chô liata seizy hmô na ta, seizy hawhta alei liata abeizy ama siepa ei hmô.
8 #
Hla 7.15; Bies 26.27 Khaohtlô a chaopa cha a khaohtlô chaopa liata tla aw ta,
Dôhna a chatôhpa chhao parih ta a pachu aw.
9Alô chaotuhpa cha,
Alô ta hmah paphao ta;
Tho patlawtuhpa chhao,
Thozy ta a hrona ama pahlei tyh.
10Thua chhaichhi tiah leipa sala,
Chyhsa ta a chata vei khiahta cha,
Tha hmâ via awpa byuh ta;
Sona deikua cha,
Hlaotlohna a pietuhpa a châ.
11Parih ta pamaohpa a châ hlâta,
A pamaohtuhpa a pachu ha khiahta cha,
Pari pamaohtuhpa châta phahnaina y vei.
12Asopa cha a pakah biezy ta ngiachhiena pahlaosa ta,
Ahrupa hmao deikua cha ano a palâtuhpa a châ.
13A pakah tawhta bie a puapata nahta,
Hruna bie sai pua tyh ta;
A bie chhâna lâ cha,
Pei a hriapa hrungâna bie a châ tyh.
14Hmialâ daihti a pahnopa y leipa ei ta,
Thi hnôhlâ ta hmo a y awpa a reih theipa ama y leipa chhao ta,
Ahrupa cha bie hluhpi reih ta, a reih via lymâ.
15Ahrupa cha a hriapasana ta a tha pachhâ ta,
Khihpi lâpi chhao pahno khao vei.
16Hy râh, na bei châta sei#10.16 He liata “Sei” he hlâno kuropa Biehrai thokha liata cha “Hawtipa” tah ta, a kaw pazipa châh sarina yzie tawhta mopa ta nata Hebrai reikah liata sei cha “hawtipa” ama tah tyh hrazie tawhta mopa ta, “Sei” tahpa ta reih thokha liata sopa zipa ta, he liata chhao “Sei” tahpa ta sopa a châ. hnei chi ta,
Na beimachâzy my ta kyh a chhi tyhpa râh y,
Na hu a po na!
17Hy râh, na bei châta bei pathla hnei chi ta,
Na beimachâzy a daihti liata kyh a chhi tyhpa y,
Na nohlao na!
Kyhchhina liata pari awpa ta doh leipa ei ta,
Thatlôna châta ama doh tyh.
18Thathina vâta vâphuh tla ta,
Diathlâna vâta o a zu.
19Pahnei awpa ta kyhchhi taopa châ ta,
Kresawhti ta hro palysa ta,
Tâkâ cha khopa to hneina a châ.
20Abei cha chhiesapa leipa la,
Na palôhrupa liata chhao chhiesapa leipa la,
Na rakhô liata hneirôhpa chhiesapa hra khah y.
Vâ pavawzy ta na ao a zawkhei aw ei ta,
Mathlaw a hneipa hmohrohneipazy ta ama chho pathlei aw na.
Currently Selected:
BIECHHOTUHPA 10: MARVBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
