Rom 11
11
Wɛ na kuri nɔɔna balo to
1Amo ta lage a bwei a nii, ko bere we Wɛ ve o tete nɔɔna bam maama o yage mo na? Kɔtaa! Nii-na, amo tete mo ye Isarele dwi tu. Abaraham mo ye a nabaaro, ye a nwoŋi Benjamin dwi dem wone. 2Wɛ seene o wo ve o nɔɔna balo o na maŋe o jege ba boboŋa boboa ne to. Abam maŋe á yei Wɛ tɔnɔ kom na bere Elija taane tei to. O déem lwoori Wɛ se o waare Isarele tiina bam, 3ye o we, “Yuu-tu Baŋa Wɛ, ba go nmo sampwori sem, ye ba daare ba chochoge nmo kaanem bimbina yam. Ko laam ta daare amo yerane mo ye ba kwaane se ba go-ne.”#1 Pwa 19:10, 14
4Wɛ nam leiri‑o o we bɛ mo? O we, “Amo nam le nɔɔna morro terepɛ (7,000) mo se ba taa ye amo tete nyem. Banto wo fɔge ba kuni dwoona ba zuli Baal jwoni dem.” 5Ko ta ye bedwe mo de zem maama. Kɔgɔ fenfee ta mo daare, Wɛ na tɔge o zaane dem ŋwaane o kuri balo to. 6Wɛ nam na dɛ o zaane dem baŋa ne o kuri-ba to, ko bere we ko dae ba kikia ŋwaane. Ko ya ná ye ba kikia ŋwaane mo o kuri-ba, ko bá taa ye o zaane dem mo o pɛ-ba zɛɛra.
7Ko bere we Isarele tiina bam wo nɛ chega kalo ba na seene ba yia se ba na Wɛ tei ne to. Kɔgɔ kolo Wɛ na kuri to nam mo nɛ-ka. Balo na daare to nam maa jege yi-dɛɛre. 8Ko ke-ba ne ko na popone tei Wɛ tɔnɔ kom ne we:
“Wɛ mo pɛ se ba tiini ba dɔ ba kɛ.
De zem maama, ba yia ta ba nae,
ye ba zwa de kwareme Wɛ chega kam seeni.”#Nia Gulim 29:4; Izaya 6:9-10; 29:10
9David de déem tage ba taane o we,
“Wɛ wó pa se ba kuri wodi-fɔrɔ kom
jwoori ko ja chɔgem ko ba ba baŋa ne,
ne kalanchogo na jaane-ba
ye ba to tega ne tei to,
10Wɛ wó pa se ba yia dwei ye ba daa ware ba nae.
Wɛ wó pa se ba yera chɛ de yaara taa wuu.”#Lei 69:22-23
11Amo ta lage a bwei a nii, Isarele tiina bam na chɔɔle ba to konto to, ko bere we ba daa bá na chwoŋa se ba jwoori ba zaŋe mo na? Kɔtaa! Banto na chɔge Wɛ chega kam tei to mo pɛ se dwi-gɛ tiina na chwoŋa se Wɛ jwoŋi-ba. Wɛ ke konto se ko pa Isarele tiina bam taa jege kazwe ba ŋwaane. 12Banto na ke ba chɔge tei to mo pɛ se nabiina maama wane ba na Wɛ zeinim lanyerane. Ba na muri Wɛ tei ne to mo pɛ se dwi-gɛ tiina na chwoŋa se ba jwoŋi Wɛ zeinim dem. Ko bere we Isarele dwi tiina kɔgɔ kolo na tɔge Wɛ to ná puli ko ti, ko wó pa se nɔɔna tiini ba na Wɛ zeinim ko ja gaale.
13Ko ye abam dwi-gɛ tiina bam mo a tɛ taane dento. Amo na ye Yezu totoŋa nakwe se a ta o taane a bere dwi-gɛ tiina bam to tiini ko ye totoŋ-kamunu amo tei ne. 14Amo kwaane a toŋe se ko wane ko pa amo dwonna Isarele tiina bam taa jege puseŋa, se a laam jwoŋi ba badwonna a ke Wɛ jeŋa ne. 15Wɛ na ve banto o yage to, ko pɛ se logo baŋa dwi tiina laam ba ba fɔge de Wɛ. Ko daare maŋa kalo Wɛ na wó jwoŋi-ba to, ko wó taa nye de twa na jwoori ba na ŋwea tei to mo.
16Dé yei we, nmo ná dɛ yiga n fɔ bworobworo n tiŋi n pa Wɛ, ko chichworo kom na daare to daa ta ye o nyem. Ko woli da, tio kuu ná ye Wɛ nyem, ko nɛ sem maama de ye o nyem mo. 17Isarele tiina bam nye de Olivi tio ba na jeiri gaare wone to. Ko ye nenɛɛne Wɛ bwori tio kom konto nɛ sedaara o yage, ye o daare o kwei Olivi tio kolo na wo gaao wone to naga kadwoŋi o twoŋi o gwaane nɛ sedwonna sem wone. Nmo wolo na ye dwi-gɛ tu to nye de naga kam konto mo. Nmo laam wori ye n tɔge n nae tio kom kugu kom nyoa kam. 18Nmo nam yé ta‑n gwooni nɛ selo na bwori se yage to. Nmo ná boŋe se n bere n tete konto, se n ta‑n yei we, ko dae nmo mo pae tio kom kugu kom wori ye ko zega. Ko ye kugu kom mo jege nmo ko teila. 19Nmo nam wó wane n ta we, “Wɛ bwori nɛ sedaara sem o yage tega ne se ko pa amo mo na laŋa a twoŋi da.” 20Ko seene ko ke konto mo. Wɛ nam bwori nɛ sem konto o yage ba na wo sɛ‑o to ŋwaane. Nmo nam na nɛ jeiga to tɔge n wo-dedoa kam yerane ŋwaane mo. Nam yé ta‑n boŋe kamunim n pa n tete, se n daare n kɔre Wɛ de foone. 21Kolo ŋwaane Wɛ wo sɛ se o yage tio kom tete nɛ sem se jei ne. Nmo ná ba jege wo-dedoa ded‑o, o bá yage nmo de.
22Ko maama bere Wɛ na jege nɔɔna ŋwaŋa tei, de o na daare o vaŋe nɔɔna zwa tei to mo. Ko ná ye balo na ke ba chɔge to, o vaŋe ba zwa mo. Ko daare nmo, n ná tɔge o ŋwaŋa kam na ye tei to, o wó taa jege nmo ŋwaŋa. Nmo nam ná yage Wɛ ŋwaŋa kam, o laam wó bwori nmo de o yage tega ne. 23Isarele tiina bam nam ná jwoori ba ke ba wo-dedoa ba sɛ Wɛ, ba laam wó jwoori ba na ba jeiga. Wɛ wó wane o jwoori o twoŋi-ba da. 24Nmo wolo na ye dwi-gɛ tu to nye de naga kalo Wɛ na gwoni Olivi tio kolo na wo gaao ne to yera ne. O ma kwei nmo o twoŋi Olivi tio kolo na jeiri gaare ne to yera ne ye ko dae nmo tete kuu jei. Konto ŋwaane ko bá taa chana Wɛ tei ne se o jwoori o twoŋi nɛ selo o ya na bwori to se tete kuu kom jei ne.
25A nu-bia bam, amo lage se á lɔre Wɛ chega kalo déem na seigi to mo. Abam ná seene á lɔre konto, á daa bá ta‑á boŋe kamunim á pa á tete. Ko na ye tei to, leile konto Isarele tiina badaara jege yi-dɛɛre mo, ye ko bá taa ye konto taa taa. Ko nam wó taa ye konto se ko vo ko yi maŋa kam dwi-gɛ tiina balo na sɛ Wɛ to kɔgɔ kom ná puli ko ti. 26Ko ná ke konto dwoŋi, Isarele tiina kɔgɔ kom maama laam wó na verem, ne ko na popone Wɛ tɔnɔ kom ne we:
“Vereno wom wó zaŋe Zion ne o ba.
O maa wó pa se Jakob#11:26 Jakob ye Isarele yere dedwoŋi. dwi tiina bam yage ba wɛleera kikia yam.
27Amo Wɛ wó ke ni-gwonim dento a pa-ba we,
amo wó saare ba wɛleera yam a yage.”#Izaya 59:20-21
28Isarele tiina bam na ve Wɛ kwor-ywoŋa kam to, ba ye Wɛ dona mo, ye konto laam pa se abam dwi-gɛ tiina bam na wolim. Ko daare Wɛ na kuri nɔɔna se ba taa ye o nyem tei to seeni, o jege Isarele tiina bam swono, o déem na gwoni ni de ba nabaara bam to ŋwaane. 29Wɛ nam ba zae o boboŋa de o na kuri nɔɔna ye o ke-ba lanyerane tei to. 30Abam dwi-gɛ tiina bam déem ya ve Wɛ ye á laam ba á jwoŋi o zeinim dem, Isarele tiina bam na ve Wɛ to ŋwaane. 31Banto de laam tu ba ve Wɛ ni. Ko maa ye se ba wane ba tɔge abam na jwoŋi Wɛ zeinim dem tei to baŋa ne, ye ba de laam ba ba jwoŋi o zeinim dem. 32Wɛ nam pɛ se nɔɔna maama wo yi-dɛɛre jeŋa ne mo, se o laam wane o taa jege ba maama ŋwaŋa.
33Maane-na á nii Wɛ zaane dem na tiini de daga tei!
O boboŋa maa tiini ya lira, de o yeino kom de.
Nɔɔn-nɔɔno bá wane o lɔre o boboŋa na jaane tei to
naa o lɔre chwei selo o na tɔge to.#Lei 139:6
34“Wɔ mo yi se o wane o lɔre Baŋa Wɛ boboŋa,
naa o bere‑o o na wó ke tei?#Izaya 40:13
35Wɔ mo wó wane o kwei o woŋo o ma jene Wɛ,
se Wɛ ŋwe o pa kotu?”#Job 41:11
36Wonnu maama nwoŋi Wɛ tei mo,
ye o jege te maama o nia.
Te maama maa jege kuri te pa‑o.#1 Korinti 8:6
Wɛ maŋe de zula se ko taa vei wuu. Ameena.
Currently Selected:
Rom 11: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
