Jeelim 35

Levi dwi tiina bam teene dem

1Isarele tiina bam déem ta wo Moaba laŋa kam te-kampare ne mo. Jei sem konto wo Jɔdan buga kam ni ne mo ye Jeriko de wo bubɛ dedwoŋi dem seeni. Ba na wora to, Baŋa Wɛ ma ta de Moses o we, 2“Ta de Isarele tiina bam we ba ná jwoŋi ba tega kam, se ba le teene ka wone ba pa Levi tiina bam se ba taa zoore de wone. Ta pa-ba pwoli selo na gilimi teene dem konto maama to se ba taa kɔne ba vara. 3Konto mo wó pa se ba de taa jege teene ba zoore da, ye ba jege pwoli se ba taa kɔne ba vara dwi maama.#Josua 14:3-4; Josua 21:3

4Ba ná lɔge ba teene dem ba pe, se ba zege teo maama kabiri sem teiŋa ne ba jeeli naba-laara bia yanu (500) dɛ sena sem maama ne se ko taa ye ba vara pwola. 5Daa ta jeeli-na naba-laara moro (1,000) teo kom daa maama seeni, se pwoli sem siseina taa tigi konto ye teo kom zege se tetare ne. Levi tiina bam teo maama wó taa jege vara pwoli selo na gilimi-ko to se ba taa kɔne ba vara.

Ka-duri-ka-zo-ka-seigi teene dem

Josua 20:1-9

6Nam le-na teene deredo Levi tiina teene dem wone se de taa wora ka-duri-ka-zo-ka-seigi ŋwaane. Nɔɔno ná go o dwoŋi ye o wo paale o ke, se konto tu duri o zo teene dem konto dedoa wone o seigi. Abam ta jege se á kwei teene finna-delei á pa Levi dwi tiina bam á woli da, 7se ba teene dem maama laam taa ye finna-nana, dedaane de vara pwoli selo na kaare-de to. 8Á wó kuri teene dem konto á le Isarele dwi maama tega kam wone se Levi dwi tiina taa zoore de wone. Konto ŋwaane á jege se á le teene se ko maŋe de dwi maama tega kam na mae tei to, ne ba ná ye kɔ-kamunu naa kɔ-balaŋa mo de.”

9 Baŋa Wɛ ta ma ta de Moses o we:

10“Nam ta de Isarele tiina bam we: Abam ná bɛ Jɔdan buga kam ye á zo Kanaan tega kam wone, 11se á kuri teene dedwonna á zege ka-duri-ka-zo-ka-seigi ŋwaane.#Nwoŋim 21:13 Nɔɔno ná go o dwoŋi ye o wo paale o ke, se konto tu duri o zo teene dem konto dedoa wone o seigi. 12Konto mo wó pa se o wane o duri o vo o lu wolo na beeri o gom to jeŋa ne. Ba bá na chwoŋa se ba go kotu ye teo kom nakwa bam wo nigi o ni taane se ba lɔre kolo na ke to. 13Le-na teene deredo ka-duri-ka-zo-ka-seigi ŋwaane. 14Teene detɔ wó taa wo Jɔdan buga kam wɛ-puli seeni. Detɔ de wó taa wo Kanaan tega kam wone. 15Teene deredo dem konto wó taa wora Isarele tiina, de veira, de balo maama na zoore de-ba to ŋwaane mo, se wolo maama ná go o dwoŋi ye o wo paale o ke, se konto tu duri o zo de dedoa wone o jwoŋi o tete.

16Nɔɔno nam ná kwei luu o mage o dwoŋi pa se kotu te, ko ye nɔɔno wom paale o ke mo. O ye nɔn-goro mo ye ba jege se ba go o de mo. 17-18Nɔɔno ta ná zei kandwɛ-kamunu, naa da-lɔŋɔ o jeŋa ne, ye o ná kwei-ko o mage o dwoŋi pa se kotu te, ko bere we o paale o ke mo. O ye nɔn-goro mo ye ba jege se ba go o de mo. 19Ba na go wolo to yera nɔɔno mo jege se o beeri nɔn-goro wom. O maa ná nɛ‑o, se o yɔɔre o go‑o.

20Ko ta woli da, nɔɔno ná chuli o dwoŋi, ye o yigi kotu o de tega ne, naa o ná paale o dole‑o de woŋo, 21naa o ná mage‑o de o jagula, pa se o dwoŋi wom te, o ye nɔn-goro mo ye o maŋe se ba go o de mo. Ba na go wolo to yera nɔɔno jege se o beeri nɔn-goro wom jei mo se o go‑o.

22Ko nam ná dae we o ya chuli o dwoŋi mo, ye o ná yigi‑o o de tega ne, naa o dole‑o de woŋo, ko bere we o wo paale o ke. 23O ta ná zei kandwɛ-kamunu ye o dole yɔɔ pa se ko vo ko mage o dwoŋi, ko bere we o wo paale o ke konto, o na ba chuli o dwoŋi wom to ŋwaane. O dwoŋi wom ná tega o keim dem konto baŋa ne, 24se teo kom nakwa di nɔɔno wom de wolo o na go to yera nɔɔno taane dem se ba tɔge bera yam konto ba bore chega kam. 25Nakwa bam nam ná di taane dem ye ba pa wolo bora, se ba jwoŋi‑o too wom yera nɔɔno jeŋa ne. Ba laam maa wó pa o jwoori ka-duri-ka-zo-ka-seigi teo kolo wone o ya na duri o vo o seigi da to. O wó taa zoore teo kom konto wone mo se ko taa nii kaanem yiga tu wom ná tega.

26Nɔɔno wom nam ná nwoŋi ka-duri-ka-zo-ka-seigi teo kom wone, 27ye too wom yera nɔɔno ná nɛ‑o o ja o go, o toone dem bá taa wo kotu yuu ne. Kotu jege chwoŋa se o go‑o. 28Wolo na wo paale o go o dwoŋi wom to jege se o yeini o taa wo ka-duri-ka-zo-ka-seigi teo kom wone mo, se kaanem yiga tu wom ná tega, se o laam jwoori o viiri o tete teo.

29Á ná zoore mɛ maama, abam de á kwaga kam maama jege se á ta‑á tɔge nia yanto mo se ko taa vei wuu.

30Nɔɔno ná zaŋe o go o dwoŋi, á ba jege chwoŋa se á go kotu, ko ná dae we nɔɔna mo pɛ maana we o seene o ye nɔn-goro. Nɔn-doa yerane ni taane nam bá wane de pa nɔɔno te.

31Nɔn-goro ye se ba go‑o mo. Konto tu bá wane o ŋwe sabu se o ma jwoŋi o ŋwea.

32Ko ta woli da, wolo ná zo ka-duri-ka-zo-ka-seigi teo kodwoŋi wone o na wo paale o go nɔɔno to ŋwaane, konto tu bá wane o ŋwe sabu se o ma o jwoori o tete sɔŋɔ lela, ye kaanem yiga tu wom ta wo tege.

33Nɔn-gora chɔge tega kam mo. Nam yé pa-na se tega kalo á na zoore ka wone to taa chɔga keim dem konto ŋwaane. Nɔɔno ná yɔɔre o go o dwoŋi, ye á wo go nɔn-goro wom, too wom jana bam chɔge tega kam mo. 34Amo Baŋa Wɛ mo zoore Isarele tiina bam tetare ne. Konto ŋwaane, yé pa-na se tega kalo amo de abam na jei ka wone to chɔge.”

Currently Selected:

Jeelim 35: KBG

Highlight

Copy

Compare