Jeelim 21
21
Isarele tiina bam wane Kanaan tiina bam
1Arada teo pɛ déem mo wora. O maa ye Kanaan dwi tu ye o zoore tega-kuri seeni kagoa kam ne. O ma ni we Isarele tiina bam wo Atarim chwoŋa kam ne mo ba vei ba beene o jei sem. O ma nwoŋi o jeeri-ba de jara ye o ja ba badaara o pe. 2Isarele tiina bam ma du duuri de Baŋa Wɛ ba we, “Nmo ná woli pa se dé wane nɔɔna banto dé di, debam de gwoni ni se dé yɔɔre dé chɔge ba teene dem maama dé pa nmo.” 3Baŋa Wɛ ma cheigi ba wɛ-lworo kom ye o sɛ o woli-ba pa se ba di Kanaan tiina bam. Ba ma yɔɔre ba chɔge ba teene dem de de nɔn-bia bam. Konto ŋwaane mo ba bwoŋi jei sem yere we Horama.#21:3 Horama kuri mo ye chɔgem
Channa basankwea kam
4Isarele tiina bam déem na zaŋe Hora peo kom ne to, ko jege se ba kaare ba yage Edom laŋa kam dáa ne mo. Ba ma kwei Nane-soŋo chwoŋa kam ba kɛ. Ba nam na wo chwoŋa ne ba vei to, mo nɔɔna bam daa wo wane ba ja ba tete. 5Ba maa ŋwaane Wɛ de daane Moses ye ba we, “Moses, bɛ mo ye nmo yɔɔre n ja debam n nwoŋi Ejipti wone, se dé ba dé te kagoa kanto wone? Wodi-laao tera ywo-seeni. Na de maa tera se dé nyɔ. Dé yera de laam chɛ de wodi-yɔɔ konto.”#21:5 wodi-yɔɔ ye Manna yam mo.
6 Baŋa Wɛ ma pa se basankwe selo ni na chana to to Isarele tiina bam wone, ye se done ba dedɛ se go. 7Nɔɔna bam badwonna ma vo Moses tei ba ta ba we, “Dé na ŋɔɔne dé chɔge Baŋa Wɛ de nmo to, ko ye wɛleere mo dé kea. Nam lwoori Baŋa Wɛ n pa debam, se o pa se basankwe sento viiri se daare debam.” Moses de ma lwoori Wɛ o pa nɔɔna bam.
8 Baŋa Wɛ ma ta de Moses o we, “Nam yɔɔre n mɔ basankwea, se n daare n kwei-ka n lei daa yera ne. Basankwe sem ná done wolo maama, kotu wó kwoni o nii-ka se o ma jwoŋi o ŋwea.” 9Moses ma kwei channa o ma o mɔ basankwea o daare o lei-ka daa yera ne o zege-ka deiki. Wolo maama basankwe sem na done ye o kwoni o nii channa basankwea kam to mo jwoŋi o ŋwea o yage.#Jɔn 3:14-15
Ba kwei chwoŋa ba maa vei Moaba
10Isarele tiina bam daa ma zaŋe ba vo ba yi Obofe teo ba jeini da. 11Ba ma zege Obofe ne, ba zaŋe ba vo ba yi Ye-Abarim ba jeini da. Jei sem konto maa ye Moaba wɛ-puli seeni kagoa kam ne mo. 12Ba daa ma zaŋe dáane ba vo ba jeini Zereda nabara kam ni ne. 13Ba laam ma zaŋe ba vo ba bɛ Aranon buga kam, ye ba vo ba jeini kagoa kalo na wo Amori tiina laŋa kam siseini ni ne to. Aranon buga kam déem mo ye siseini na tigi Moaba tiina bam de Amori tiina bam tetare ne to. 14Konto ŋwaane nam mo tei Baŋa Wɛ Jara-keim Tɔnɔ kom tage jei sem konto taane we:
“Waheba teo na wo Sufa laŋa ne, de ko nabare sem, de Aranon buga kam, 15de nabare sem siswooru tem konto na tigi Moaba siseini ni ne, ye te kɛ te yi Ara teo to.”
16Ba ma zege jei sem konto ne ba vo ba yi Beeri teo. Vole maa wo teo kom konto ne, ye dáane mo Baŋa Wɛ déem tage de Moses o we, “La nɔɔna bam n ke daane se a lage a pa-ba na mo se ba nyɔ.” 17Kanto maŋa ne mo Isarele tiina bam leeni leiŋa kanto ba we:
“Vole dem na buri na
de pa debam to,
debam de wó ke wopwolo
ye dé leeni lei!
18Pwa mo koge vole dem!
Naduna de ma fɔge-de!
Ba kwei ba paare nachei sem mo
ba ko-de!”
Isarele tiina bam déem ma zaŋe kagoa kam ne ba vo ba jeini Matana ne. 19Ba maa zaŋe Matana ne ba vo Nahaleli. Ba daa zege da ba vo ba yi Bamofe. 20Ba ma zege Bamofe ne ba vo ba yi bwolo kodwoŋi na wo Moaba laŋa kam ne to. Ba ma jeini mɛ na twɛ de Pisiga peo kom to. Peo kom yuu maa yɔɔre ko jeeri kagoa kam seeni.
Ba na di Pɛ Sihon de Pɛ Oga tei to
21Isarele tiina bam déem ma toŋe kwora ba pa Amori tiina Pɛ Sihon, ye ba we:
22“Dé lwoori nmo mo se n pa debam chwoŋa se dé tɔge n tega kam baŋa dé kɛ. Dé bá ywori chwoŋa kam ne dé tɔge á kare de á kadwi seeni. Dé maŋe dé bá mɔ na á vola yam ne dé nyɔ. Dé nam wó yɔɔre dé tole chwo-fara kam yerane mo taa se dé vo dé bɛ abam laŋa kam.”
23Pɛ Sihon ma ve se Isarele tiina bam tɔge o laŋa kam ne ba kɛ. O ma bwoŋi o jar-keira bam maama o ke daane, ye ba nwoŋi ba vo kagoa kam wone se ba jeeri Isarele tiina bam. Ba na yi Jahaza seeni to, mo ba déem kwaare jara de-ba. 24Isarele tiina bam déem ma di-ba. Ba ma vere ba tega kam ba tei, ko zege Aranon buga kam ni ne, se ko yi Jaboke buga kam. Ba nam wo bɛ Jaboke buga kam ba kɛ, ko na ye Amon tiina bam siseini dem ye de fɔge de che de dam to ŋwaane. 25Isarele tiina bam déem vere Amori tiina teene dem maama, de ba te-fɔrɔ Hesebon de ko nawuura yam mo. Ba maa lɛɛre ba zoore de wone. 26Hesebon ye teo kolo Amori tiina Pɛ Sihon na jei o di o paare ko wone to mo. O déem nam ya ke jara de Moaba tiina bam pɛ mo, pa se o vere ba tega kam maama se ko vo ko yi Aranon buga kam seeni.
27Konto ŋwaane nam mo tei lein-leena bam yeini ba seini Hesebon teo kom ba we:
“Ba-na á zo Hesebon teo kom wone,
se á jwoori á fɔge á lɔ-ko.
Pa-na se Pɛ Sihon te-fɔrɔ kom
zege de dam!
28Min-fɔrɔ déem nwoŋi Pɛ Sihon teo Hesebon wone
ko jage ko di Moaba teo Ara,
de naduna balo na zoore
Aranon peero tem wone to.
29Moaba tiina bam, lɛɛro yi abam!
Abam balo na zuli á jwoni Chemosi to,
chɔgem to abam baŋa ne!
Á jwoni dem ve abam mo
pa se Amori tiina Pɛ Sihon chwooli abam.
Á baara ma duri ba jage jei maama sae!
O ma zi á bukwa o ja o viiri.
30Debam laam nam yɔɔre
dé wane-ba dé di mo,
ko zege Hesebon ne
se ko yi Dibon seeni.
Dé chɔge-ba mo se ko vo ko yi Nofa,
se ko ta yi Medeba seeni.”
31Isarele tiina bam déem na jeini Amori tiina tega kam ne to, 32mo Moses toŋe nɔɔna se ba vo ba ŋɔ ba nii Jazera teo kom. Ba na nii-ko to, Isarele tiina bam ma vo ba di teo kom konto de ko nawuura yam. Ba ma zeili Amori tiina bam na zoore jei sem konto ne to.
33Ko kwaga ne mo Isarele tiina bam pipiri ba kwei Basan chwoŋa kam ba via. Basan teo Pɛ Oga ma nwoŋi de o jar-keira bam maama o vo o jeeri-ba Ederi ne se ba kwaare jara.
34 Baŋa Wɛ déem ma ta de Moses o we, “Yé ta‑n fona de Pɛ Oga. Amo lage a kwei pɛ wom de o nɔɔna bam maama a ke nmo jeŋa ne, se á jwoŋi ba tega kam á ta‑á tei mo. Abam nam jege se á chɔge pɛ wom konto dedaane o nɔɔna bam mo nenɛɛne á na ke Amori tiina Pɛ Sihon na di paare Hesebon ne tei to.”
35Isarele tiina bam ma yɔɔre ba ti Pɛ Oga, de o bia, de o jar-keira bam maama pa se nɔɔn-nɔɔno daa wo daare. Ba maa lɛɛre ba zoore o tega kam ne.
Currently Selected:
Jeelim 21: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
