Jeelim 20
20
Na nwoŋi peo wone se nɔɔna bam nyɔ
1Isarele tiina kɔ-fɔrɔ kom déem ma beeri ba vo ba yi Zin kagoa kam boboa chana kam ne. Ba ma vo ba chwi ba vwoa Kadese ne ba zoore da. Ba na wora to, Miriam déem ma te ye ba suli‑o da.
2Na déem tera se Isarele tiina bam nyɔ. Ba maama ma la daane ba vo ba yi Moses de Aron tei se ba dwoni de-ba. 3Ba ma bwɛ Moses ye ba we, “Debam de déem ya ná tɔge dedaane dé chorro tem dé te Baŋa Wɛ wara-jei sem yiga ne, ko ya gare tento. 4Nmo nam yɔɔre n ja debam na ye Baŋa Wɛ kɔgɔ kom to mo n ba n dole n yage kagoa kanto ne, se debam dedaane dé vara maama te. 5Bɛ mo ye n ja debam n nwoŋi Ejipti teo wone se dé ba dé zege kasol-gwiu konto ne? Wodiiru ware se te ke ywo-seeni, kaporro nam tera, Vini teeni de tera, Pomegara teeni de maa tera. Na de nam tera se dé nyɔ!”
6Moses de Aron ma tutwoni ba kɛ ba daare nɔn-kɔgɔ kom ba vo ba zege wara-vwei dem ni ne. Ba ma vwi ba yibia tega ne, ye Baŋa Wɛ pɔpɔ o chu o veere o tete ko tɔge de o nenɔŋ-fɔrɔ kom o bere-ba. 7Baŋa Wɛ ma ta de Moses o we, 8“Zaŋe n kwei n nacheiga kam se nmo de n zembaaro Aron vo á la kɔ-fɔrɔ kom maama á ke daane. Laam zege ba yiga ne n ŋɔɔne de peo kolo na zege tento to. Na wó ta ba nwoŋi ko yera ne. Chega to, nmo wó pa na taa nwoŋi peo kom wone ba pae nɔn-kɔgɔ kom de ba vara bam se ba taa nyɔa.”
9Moses ma seene o vo o zo Baŋa Wɛ wara-vwei dem wone o kwei o nacheiga kam ne Baŋa Wɛ na pɛ ni se o ke tei to. 10O de Aron ma ja nɔn-kɔgɔ kom maama ba vo ba zege peo kom yiga ne. Moses laam ma ta de nɔɔna bam o we, “Abam zwabani-nyena banto, cheigi-na! Debam mo jege se dé pa se na ta ba nwoŋi peo konto ne se á nyɔ na?” 11O laam ma zeiŋi o jeŋa wɛɛne ye o kwei o nacheiga kam o ma mage peo kom kuni belei. Na-fɔrɔ ma pɔpɔ ba wuura ye ba chuura, pa se nɔɔna bam de ba vara nyɔ.#Nwoŋim 17:6
12Ko daare Baŋa Wɛ ma ta de Moses de Aron o we, “Abam nam wo ke á wo-dedoa de amo se ko pa Isarele tiina bam lɔre we, amo yɔɔre a ye wose. Á wo-dedoa kam na muri to ŋwaane, a daa bá pa abam chwoŋa se á ja amo nɔn-kɔgɔ kom á vo á zo tega kalo a na lage a pa-ba to wone.”#Jeelim 27:13-14; Nia Gulim 31:2; 32:51-52
13Ba déem jege jei sem konto ba bwoi we ‘Meriba’#20:13 Meriba kuri mo ye kantɔgɔ mo. Dáane mo Isarele tiina bam mage kantɔgɔ dedaane Baŋa Wɛ. O de ma bere-ba o wo-pwoŋo kom na ye tei to.
Edom teo pɛ ve se o pa Isarele tiina bam chwoŋa se ba kɛ
14Moses déem ma zege Kadese ne o toŋe kwora o pa Edom teo pɛ o we:
“Debam ye nmo tete chorro Isarele dwi tiina bam mo.#Pulim 36:43 Nmo maŋe n yei yaara yalo maama na yi debam to ni ne. 15Dé nabaara déem vei ba zo Ejipti teo wone ba maŋe da bena dedɛ. Ko kwaga ne mo Ejipti tiina bam bɛɛse dé kwoa bam de debam de. 16Dé na keeri dé jare Baŋa Wɛ to, mo o nigi dé wɛ-lworo kom. O ma tɔge o maleka baŋa ne o ja debam o nwoŋi teo kom konto ne. Dé laam nam tu dé jei Kadese ne mo, ko na wo abam teo kom siseini ni ne to. 17Dé maa lwoori nmo mo se n pa debam chwoŋa se dé tɔge n tega kam baŋa dé kɛ. Dé bá tɔge á kare de á kadwi seeni. Dé maŋe dé bá mɔ na á vola yam ne dé nyɔ. Dé nam wó yɔɔre dé tole chwo-fara kam yerane mo taa se dé vo dé bɛ abam laŋa kam. Dé bere dé bá ywori chwoŋa kam ne.”
18Edom pɛ wom ma leiri o we, “Aawo! Debam bá pa abam chwoŋa se á tɔge dé laŋa kam á kɛ. Abam nam ná fe se á tɔge da á kɛ, dé wó nwoŋi dé jeeri abam de jara.”
19Isarele tiina bam ma jwoori ba leiri ba we, “Dé nam wó maŋe chwo-fara kam ni ne mo dé taa via. Debam de dé vara ná nyɔge á na, dé wó ŋwe dé pa abam. Dé na lwoori kolo yerane to mo ye se dé tɔge á laŋa kam ne dé kɛ.”
20Edom pɛ wom ma yɔɔre o ve ye o we, “Dé bá sɛ se á tɔge ywo-seeni á kɛ.”
O ma pa se o jar-keira kɔ-fɔrɔ kom nwoŋi de dam se ba jeeri Isarele tiina bam de jara. 21Konto to, Edom tiina bam wo pɛ Isarele tiina bam chwoŋa se ba tɔge ba laŋa kam ba kɛ. Ko déem pɛ se Isarele tiina bam pipiri mo ba jwoori kwaga se ba kwei chwo-gaa.
Aron toone
22Isarele kɔ-fɔrɔ kom maama déem ma zege Kadese ne ba vo ba yi Hora peo kom 23na wo Edom laŋa kam siseini ne to. Ba na wora to mo Baŋa Wɛ tage de Moses de Aron o we, 24“Aron lage o maŋe ywo-seeni mo o te. O bá zo tega kalo a na lage a pa Isarele tiina bam to wone, abam balei na nwoŋi amo ni dem kwaga ne Meriba jei sem ne to ŋwaane. 25Moses, nam ja Aron de o bu Eleaza se á maama di Hora peo kom yuu. 26Pa se Aron lɔɔre o kaanem gare-laaro tem, se n kwei-te n zo o bu Eleaza. Kokuri to, Aron lage o te peo kom yuu ne mo.”
27Moses maa seene o ke tei Baŋa Wɛ na pɛ ni se o ke to. Isarele kɔ-fɔrɔ kom maama déem zege ba nia mo ye wonto, de Aron, dedaane Eleaza di Hora peo kom yuu. 28Moses ma lɔɔre Aron kaanem gwaaro tem, ye o daare o kwei-te o zo Eleaza. Aron ma maŋe peo kom yuu ne o te.#Jeelim 33:38-39
Moses de Eleaza ma zege peo kom yuu ne ba maa tu tega. 29Nɔɔna bam na yɔɔre ba lɔre we Aron tege to, mo ba maama keeri o lua kam da fintɔ.
Currently Selected:
Jeelim 20: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
