Judi 1

1Amo Judi wolo na ye Yezu Krista kabaa ye a kwori a ye Jemsi nyaane to mo popone tɔnɔ konto se a pa abam balo Wɛ na bwoŋi se á ta‑á ye o nɔɔna to.#Maake 6:3 Abam mo ye balo dé Kwo Wɛ na swoi ye Yezu Krista jege abam o jeŋa ne to.

2Wɛ wó taa jege abam ŋwaŋa, ye o pa abam yazura de swono se ko gaale.

Vwa berena taane

3Amo badwoŋ-swonnu bam, amo ya maŋe a kwaane a lage se a popone tɔnɔ a pa abam, se ko pa á lɔre Wɛ na ke tei o jwoŋi debam balo maama na ye o nɔɔna to. Amo laam nam nɛ we ko ye fefeo mo se a popone tɔnɔ a ma kwoori abam se á chichei á zege Wɛ chega kam ŋwaane. Ko ye chega kam konto mo Wɛ maŋe o ke o nɔɔna bam jeŋa ne, ye ka bá fɔge ka leiri. 4Kokuri to, a lɔre we Wɛ-lwɛɛna mo ŋɔge ba zo ba gwaane abam kɔgɔ kom wone. Ba maa ba kɔre Wɛ ye ba yeini ba pipiri o chega kam, se ko pa ba na chwoŋa ba taa tɔge wo-digiru kikia, ye ba ta boŋe we Wɛ wó duri ba ŋwaŋa, o na ye ŋwaŋa tu to ŋwaane. Ba kikia maa bere we, ba ve Yezu Krista wolo yerane na ye debam Yuu-tu de dé Teiru to. Faŋa faŋa to Wɛ tɔnɔ kom maŋe ko bere we, nɔɔna banto dwi wó na ba lɛɛro.

5Amo lage a guli abam de wonnu tedwonna á na maŋe á yei te ni ne to. Á yei we dé Teiru Wɛ déem vere o nɔɔna Isarele tiina bam o pa ba nwoŋi Ejipti teo kom wone. Ko kwaga ne to, o laam ma yɔɔre o chɔge balo na wo sɛ‑o to.#Jeelim 14:28-30 6Á maŋe á yei Wɛ na ke tei de malese sedwonna na lage se se dam taa dwoi Wɛ ya na pɛ-se tei to, ye se daare se yage se kugu jei Wɛ telaao ne to. Wɛ ma vɔ-se de chaponno o de jei selo na ye lim yerane to wone o yage da, se se taa wora taa wuu, se o dɛ-kamunu kom ná yia, se o laam pa se na waarem. 7Ko ta ye bedwe mo de Wɛ na ke tei o waare nɔɔna balo déem na zoore Sodom de Gomora ne, de teene delo na bwola da to. Banto de déem tɔge bwoorim wo-zɔɔna kikia, ne ko na wo maŋe se nabiina taa ke tei to. Wɛ ma pa ba na waarem de mini delo na ba ti to, se ko taa ye maana ko pae nɔɔna maama.#Pulim 19:1-26

8Vwa-nyena bam konto na gwaane abam wone to, ba de tɔge kikia yanto dwoŋi mo. Ba maa pae se ba tete dendwa mo gane-ba, ye ba tɔge wo-zɔɔna kikia de ba yera. Ba maa ba kɔre nɔɔn-nɔɔno dam, ye ba yaale malese selo na jege paare Wɛ tei ne to. 9Wɛ malese dedɛɛro Mikayeli tete nam wo sɛ se o ke konto dwoŋi. Wonto na mage kantɔgɔ de setaana pɛ wom Moses yera yam keim ŋwaane to, o kɔre se o ŋɔɔne o yaale o yuu.#Danyeli 10:13; Gurim 12:7 O nam na tage kolo to mo ye we, “Wɛ wó vaŋe n zwa.” 10Ko daare vwa-nyena bam nam ŋɔɔne ba yaale woŋo kolo maama ba na yeiri ko kuri to. Ba nam na pae se ba yei wonnu telo to, ba tɔge-te ne ga-vara na ke tei ye ba ba jege boboŋa to. Ba kikia yam konto mo wó pa ba na chɔgem.

11Lɛɛro taa wo ba yuu ne! Ba tɔge Kain nɛ-bwora déem na ye tei to mo. Ba yi maa sui nyɔɔre delo ba na wó na ba keim-balwaaro tem baŋa ne, ne Balaam déem na ke tei ye o tusi to. Ba ma ve Wɛ ni, ne Kora déem na ve-de ye Wɛ go‑o to.#Pulim 4:1-12; Jeelim 16:1-2; 31:16 Banto de wó ba ba na chɔgem konto dwoŋi.

12Abam na yeini á la daane se á di wodiu da-swono ŋwaane to, vwa-nyena bam konto boŋe se ba chɔge abam lam de ba kachaare kikia yam. Ba ba kɔre chaveera de ba na tiini ba di tei to, ye ba yiga tera de nɔɔn-nɔɔno ko ná dae ba tete yerane. Ba nam ba jege nyɔɔre, ne doa na tene ye ka da vio ka saare to. Ba ta nye de teeni delo na ba leiri bia, ko ya ze ná maŋe ko yi de leirim maŋa mo de. Ba maŋe ba ba jege ŋwea, ne teeni delo ba na gɔge de de kura maama ba daare kafɛ yerane to mo. 13Ba na tɔge ba chaveera kikia yam tei to nye de vio na dole buga na, pa ba pɔgele ye ba zaŋe puŋa tei to mo. Ba ba jege jeiŋa jei, ne chalechwe na kare se beeri tei to. Wɛ nam pɔɔre jeiga kalo na tiini ka ye lim yerane to se o ke-ba da taa wuu.

14Enoki déem ya wuuri o ta nɔɔna bam konto taane faŋa faŋa.#Pulim 5:18, 21-24 Wonto déem ke Adam dwi tiina kuri berepɛ tu mo, ye o we, “Nii-na! Baŋa Wɛ wó seene o ba de o malese-laaro tem morro kuni morro, 15se o di nabiina maama taane. O laam wó pa se Wɛ-lwɛɛna na ba chaveera, de ba na paale ba tusi ba tɔge wɛleera yerane, ye ba ŋɔɔne ba chɔge o yuu tei to.”

16Vwa-nyena bam konto yeini ba poona mo ye ba gwooni ba dwonna. Ba maa tɔge wo-zɔɔna yalo maama ba fera na zoore to. Ba maa ŋɔɔne kamunni ba pa ba tete, ye ba ŋɔɔne ni-sone ŋɔŋa de nɔɔna se ba na nyɔɔre ba baŋa ne.

Wɛ chwoŋa tɔgem taane

17Amo badwoŋ-swonnu bam, abam nam jege se á guli dé Teiru Yezu Krista totoŋa nakwa bam déem na maŋe ba ta kolo de abam to mo. 18Ba déem we, “Logo baŋa kweelim da yam ne nɔɔna badwonna wó taa wora ba na yaale Wɛ chega kam ye ba tɔge wo-lwanno telo ba tete fera na zoore to.”#2 Piita 3:3 19Nɔɔna bam konto dwi mo yeini ba pae abam pɔɔre daane. Ba boboŋa tɔge logo baŋa wo-yɔɔro mo ye Wɛ Sin-laao kom tere ba bochara ne.

20A badwoŋ-swonnu bam, ko nam ná ye abam, á kwaane á ta‑á woli daane se ko pa á bochara fɔge lanyerane de chega kalo á na sɛ de wo-dedoa ye ka ye Wɛ nyem chekke to. Á ta‑á ware Wɛ de o Sin-laao kom dam. 21Á ta‑á jege á ŋwea de Wɛ swono kom o na pɛ abam to, ye á jege teena we dé Teiru Yezu Krista wó ba o pa á na Wɛ ŋwe-doŋa kalo na ba jege kweelim to, o na jege abam ŋwaŋa to ŋwaane.

22Ko ná ye balo na jege bobwea to, se á duri ba ŋwaŋa de á na woli-ba tei to. 23Badaara nam wora á na jege se á vere-ba mini delo na lage de chɔge-ba to wone pa ba wori. Ko daare balo wo-zɔɔna kikia na pɛ se ba jege digiru to, se á ta‑á jege ba ŋwaŋa, ye á nam ta‑á yei á tete de ba wo-digiru tem se te yé lɔgese abam.

24Dé ke Wɛ lei, de o na jege dam se o taa cho abam se á yé to tusim wone to. O laam wó pa abam ba á zege o yiga ne de bora, se á wane á zo o paare dem wo de wopwolo dedɛ. 25O yerane mo ye Wɛ ye o dwoŋi tera. O maa ye dé Vereno. Dé Teiru Yezu Krista ŋwaane mo o maŋe de zula, de paare, de yere-zɔŋɔ, de dam, ko na zege faŋa faŋa ye logo baŋa ta tera to, de zem maama de, se ko taa vei wuu. Dé ke Wɛ lei. Ameena.#Rom 16:25-27; Efesia 3:20-21

Currently Selected:

Judi 1: KBG

Highlight

Copy

Compare