Jemsi 4
4
Dé jege se dé tu dé tete Wɛ yiga ne
1Jara dedaane ni-kantɔgɔ yeini ya wora abam tei ne. Bɛ nam mo pae ya tui? Á na lage á boboŋa wonnu tei to mo tei á bochara jege daanem, pa se jara wo á wone. 2Ko na ye tei to, á fera zoore wonnu ye á nam ba na-te. Ko maa pae á lage se á go nɔɔna. Á yi tiini de su wonnu dedɛ ye á ware-te á na. Konto mo pae kantɔgɔ de jara tui á tetare ne. Á ba jege wonnu telo á na lage to kolo ŋwaane á wo lwoori Wɛ te ŋwaane se o pa abam. 3Abam nam ná maŋe á lwoori wonnu Wɛ tei ne, á yeini á ba na-te, á na mae boboŋ-lwanno mo á lwoora to ŋwaane. Á lwoori se á ta‑á ma-te á ke á tete yerane boboŋa mo.
4Á nwoŋi Wɛ kwaga ne mo na? Á nam yeiri we, á ná me de logo baŋa wonnu, á ye Wɛ dona mo na? Wolo maama na lage se o me de logo baŋa wonnu tem to wó ji Wɛ dono mo.#Matiyu 6:24; 1 Jɔn 2:15 5Á yé ta‑á boŋe we kolo na popone Wɛ tɔnɔ kom wone to ba jege kuri, de ko na we, “Jworo kolo Wɛ na ke dé bochara ne to lage se ko yerane mo taa tei debam.” 6Wɛ nam mo ke debam zaane se ko gaale. Ko ta popone we:
“Wɛ ve balo na bere ba tete kamunim to,
ye o daare o ke zaane balo na tu ba tete to yuu ne.”#Memaŋa 3:34
7Ko nam na ye konto to, kwei-na á tete á ke Wɛ jeŋa ne, se á daare á ve setaana pɛ wom, se wonto wó duri o viiri á tei ne. 8Fofɔ-na á twɛ Wɛ tei, se o de wó taa bwola de abam. Sane-na á je á yage á wo-lwanno kikia yam. Kwɛ-na á bochara se á daa yé ta‑á jege woro telei. 9Nyɔne-na á yiga á ta‑á kona ye á keera. Pa-na á mwanno tem leiri te ji keira, se á wopwolo kom leiri ko ji wo-chechɔgɔ. 10Tu-na á tete dé Teiru wom yiga ne, se o laam wó ja abam o pa á zaŋe.
11A nu-bia bam, yé ta‑á ŋɔɔne-na ta-balwaaro á pa daane. Wolo maama ná ŋɔɔne ta-balɔrɔ o pa o nu-bu, naa o yaale o yuu, konto tu ŋɔɔne o chɔge Wɛ nia yam mo ye o yaale-ya. Nmo nam ná yaale Wɛ nia yam, ko bere we n daa‑n ba tɔge-ya mo, ye n jege dam ya baŋa ne. 12Wɛ yerane mo tei o nia yam ye o tɔge-ya o ma bore nɔɔna bora. Wonto yerane mo wae o jwoŋi nɔɔna o yaga, naa o chɔge-ba. Nmo nam boŋe we n ye wɔ mo se n di n dwoŋi taane?#Izaya 33:22
13Fɔge á cheigi-na, abam balo na yeini á tɛ we, “Zem naa jwa ne dé wó vo teo kodwoŋi dé ke pipiu da bene dé na sabu” to. 14Á tɛ konto dwoŋi ye á yeiri tega na wó poore se á ŋwea taa ye tei. Á ŋwea nam nye de kunu mo. Ko wó li ye ko bá dáane ye ko jei. 15Ko ya maŋe se á ta‑á tɛ we, “Wɛ ná sɛ pa dé jwa ŋwe, dé wó ke kolo dé na boŋe to.” 16Ko nam na ye tei to, á pa á tete kamunni mo de á na wó ke wonnu telo to. Kamunni dem konto nam ba lana.
17Konto to, nɔɔno wolo ná yei kolo na lana se o ke to, ye o ná wo ke, kotu ke wɛleere mo.
Currently Selected:
Jemsi 4: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
