Hiburu 2

Dé wó taa seene dé yia se Wɛ jwoŋi debam

1Konto ŋwaane mo ko fe se dé kwaane dé taa jege Wɛ kwora kalo dé na nigi to se ko gaale, se dé yé tutwoni dé nwoŋi o chega kam wone. 2Kokuri Wɛ déem ya pɛ se o kwora kam tɔge o malese jeŋa mo ka ba dé nabaara bam tei, ye o taane dem konto maŋe de jege kuri lanyerane. Nɔɔno ná wo sɛ-de ye o ná chɔge de nia yam, konto tu jege se o na waarem ne ko na maŋe se o na tei to. 3Ko nam ná ye debam balo Wɛ na dɛ o Bu wom ŋwaane o pa dé lɔre o kwora kam to, dé yiga ná tera o verem dem wone, dé wó wane dé lu na? Dé Teiru Yezu mo dɛ yiga o ŋɔɔne Wɛ verem dem konto taane o bere nɔɔna. Balo na nigi-de to laam ma daare ba ta ba bere debam we ko ye chega mo. 4Ko woli da, Wɛ tete mo zege ba kwaga ne de o na pɛ ba ke maana de wo-kenkagela dwi dwi na bere o dam to. O ma daare o woli ba maama de o Sin-laao kom dam, nenɛɛne o na boŋe se o ke o pa ba dedoa dedoa tei to.

Yezu tu o ji nabiinu se o jwoŋi debam

5Wɛ wo pɛ o malese sem di dam logo kolo na lage ko ba ko taa wora to baŋa ne. Ko ye lo-doŋo kom konto taane mo dé tɛa. 6Wɛ tɔnɔ kom nam bere David na ŋɔɔne de Wɛ o we:

“Amo Tu Wɛ, ko ná ye nabiina,

bɛ mo ye n jege ba boboŋa?

Bɛ mo ke ye n yiga wo nabiin-bia wone konto?

7Nmo nam pɛ se nabiina tiini ba jege paare,

ye n ta pa-ba zula,

ye ba laam daare fee se ba taa mae de malese sem.

8N ma‑n daare n ke wonnu maama

ba dam kuri ne.”#Lei 8:4-6

Ko bere debam we, Wɛ ke wonnu maama nabiina dam kuri ne mo. Kokuri mo kolokolo tera Wɛ na wo ke-ko ba dam kuri ne. Ko nam ye chega mo we, leile konto dé ta wo nɛ we, wonnu maama wo nabiina dam kuri ne. 9Dé na nɛ kolo to mo ye Yezu de o dam-fɔrɔ kom. Wonto déem jigi nabiinu mo ye o daare fee se o taa mae de malese sem. O ma tu o tete ye o yaare o te. Konto ŋwaane Wɛ laam ma pa se o tiini o na paare de zula telaao ne. Konto baŋa ne mo Wɛ tɔge o zaane dem ŋwaane o pa se Yezu wane o leiri nabiina maama yuu ne o te ba zeinim ŋwaane.

10Wɛ mo ye wolo na tɔge o tete ŋwaane o ke wonnu maama to. O boboŋa déem ma ja se o pa nabiina dedɛ ji o bia, se ba daare ba taa jege paare o tei ne. Mo kokuri ko maŋe se Wɛ pa o Bu Yezu tɔge yaara ŋwaane o vo o yi o jeiŋa jei o ti. Wonto mo jwoŋi Wɛ bia bam ba wɛleera wone, ye o tɔge ba yiga o jaane-ba o vei Wɛ tei.

11Yezu mo ye wolo na pae nabiina ye wose Wɛ yiga ne to. Wonto de balo o na pɛ ba ji wose to ye nɔn-doa bia mo. Konto ŋwaane mo o bwoi-ba we o nu-bia, ye ko ba jege chaveera o tei ne. 12Mo kokuri o tage de Wɛ o we:

“Amo wó pa nmo yere zaŋe a nu-bia bam yiga ne.

A maa wó zege ba nɔn-kɔgɔ kom tetare ne

a leeni a seini nmo yere dem.”#Lei 22:22

13O daa ta maa we:

“Amo tete wó kwei a teena maama a pa Wɛ.”

O daa ta we:

“Nii-na amo de bia balo Wɛ na ke amo jeŋa ne to mo tento dé zega.”#Izaya 8:17-18

14Chega ŋwaane to, balo na ye Wɛ bia to ye nabiina mo, ye ba jege yera de jana. Konto ŋwaane mo Yezu de déem tɔge o ji nabiinu, se o wane o tɔge o toone dem ŋwaane o chɔge wolo na jege toone dam to. Wonto mo ye setaana pɛ. 15Yezu na wane toone konto to, ko pɛ se o wane o jwoŋi balo na fona de toone to o yage. Banto de ba ŋwea maama ya fona ba pa toone ne kabɛ tei, ye Yezu laam jwoŋi-ba. 16Dé lɔre we, ko dae malese sem mo o tu se o zeini. O nam tu se o zeini Abaraham dwi tiina mo. 17Mo kokuri ko maŋe se o ji nabiinu pa se o seene o nye de o nu-bia bam chekke. Konto mo pɛ‑o chwoŋa se o taa ye Wɛ kaanem nakwe tu wolo na jege o nu-bia bam ŋwaŋa lanyerane, ye o toŋe Wɛ yiga ne de jawala o pa-ba.#Hiburu 4:15 O keim dem konto mo pɛ o wae o saare ba wɛleera ye o pa ba fɔge de Wɛ. 18Kokuri Yezu na nɛ yaara ye o wo sɛ se ya soge‑o to, o laam wae o zeini balo yaara na wora ya faŋe-ba to se ba de taa jege pu-dɛa.#Matiyu 4:1

Currently Selected:

Hiburu 2: KBG

Highlight

Copy

Compare