Hiburu 1

Yezu Krista bere debam Wɛ chega kam chekke

1Faŋa faŋa to, Wɛ déem tɔge o sampwori sem baŋa ne mo o ŋɔɔne dedaane dé nabaara bam.#Rom 1:2 O déem yeini o da chwei dwi dwi mo o ŋɔɔne de-ba kuni dedɛ. 2Ko daare leile konto, logo baŋa kweelim da yam na daare fee maŋa kalo to, Wɛ laam ma pa se o Bu mo ba o ŋɔɔne o taane de debam. Wɛ dɛ wonto ŋwaane mo o ke logo baŋa de wɛyuu wonnu maama, ye o tiŋi‑o se o ba o taa tei wonnu telo maama na wora to. 3Wɛ Bu wom maa jege pwooni delo na bere Wɛ nenɔŋ-fɔrɔ kom na ye tei to. O maa jege o Kwo Wɛ nyenyego chekke, pa se dé lɔre Wɛ na ye tei to ja.#Kolosia 1:15 O ni taane maa jege dam ye de pae se wonnu maama taa fɔge te wora taa taa.

O ma ba o saare nɔɔna wɛleera pa ba bochara fɔge ya kwɛ, ye o laam daare o jwoori o di wɛyuu o vo o jeini Baŋa Wɛ jazem seeni. 4Konto to, o tu o dwoni Wɛ malese sem, de Wɛ na pɛ o jege yere delo na daga de dwoi sento na jege yere tei to.

5Ko ná ye malese sem, Wɛ wo fɔge o ta de se wolowolo o we:

“Nmo mo ye amo Bu,

ye zem amo de ji nmo Kwo.”

Wɛ daa ta wo tage o maleka tu wolowolo taane o we:

“Amo wó taa ye o Kwo,

se o de taa ye amo bu.”#2 Samuwel 7:14; Lei 2:7

6Ko daare maŋa kalo Wɛ na boŋe se o toŋe o Bu-doa kam se o ba logo baŋa to, o tage o we,

“Wɛ malese sem maama jege se se zuli‑o mo.”

7Ko nam ná ye malese sem tete, Wɛ tage se taane o we,

se ye omo tontoŋena mo,

ye se toŋe ne vio mo tei.

O ta pae se ji ne min-vogo mo tei,

se se taa toŋa se pa‑o.#Lei 104:4

8Ko daare ko ná ye Wɛ Bu wom, Wɛ tage o taane o we:

“Wɛ, nmo paare dem wó taa wora taa,

se ko taa vei wuu.

Nmo wó ta‑n tei n nɔɔna se ko tɔge chwoŋa chekke.

9Nmo swoi chega tɔgem, ye n daare n chuli lwarem kikia.

Konto ŋwaane mo, n Tu Wɛ wom kuri nmo,

ye o lwo o swolim nuga kam n yuu ne

pa se n di ywoni n dwoni n dwonna bam maama.”#Lei 45:6-7

10Wɛ ta tage dé Teiru wom taane o we:

“Boboa ne to, nmo déem mo chwi tega kam kuri,

ye n ta kwori n ma n jea n naane wɛyuu wonnu maama.#Izaya 48:13

11Wonnu tem konto maama wó ba te chɔge,

ko daare nmo ta wó ta‑n wora taa.

Wonnu tem konto maama wó ba te zareme

ne gɔrɔ na yeini ko zareme tei to.

12Te wó ba te leiri, ye n kukuli-te n tiŋi,

ne nmo na kukuli gare-dwoŋo n tiŋi

ye n daare n kwei gare-doŋo n zo tei to.

Nmo nam ta wó ta‑n ye ne n na maŋe n ye tei to mo.

N bena yam bá fɔge ya ti.”#Lei 102:25-27

13Wɛ déem wo fɔge o ta de o malese sem wolowolo o we:

“Ba n jeini amo jazem seeni,

se a daare a wane n dona bam

a ke n dam kuri ne se n ta‑n tei-ba.”#1:13 Baŋa Wɛ tage taane dem konto de o Bu wom mo. #Lei 110:1

14Wɛ malese sem nam na ye tei to, se maama ye balo na toŋe ba pa Wɛ to mo. Wɛ maa yeini o toŋe-se se se vo se woli balo o na tiŋi o ni we, omo wó jwoŋi-ba o yage to.

Currently Selected:

Hiburu 1: KBG

Highlight

Copy

Compare