Galatia 5

Dé na wó taa tei dé tete tei to

1Yezu Krista na jwoŋi debam o yage to, ko ye se dé taa tei dé tete mo. Konto ŋwaane, á fɔge á che á tete se á daa yé sɛ á tɔge chwoŋa kalo na wó pa á jwoori á ji kabɛ.

2Nam cheigi-na amo Pɔɔl na lage a ta kolo de abam to. Á ná kwei á tete á pa Juu tiina chullu tem ye á tɔge ba na gwoni ba peina tei to, á daa ba jege nyɔɔre Yezu Krista tei ne. 3Amo lage a ta a bere abam jaja we, abam wolo maama ná sɛ se ba gwoni o peini, konto tu jege se o sɛ Wɛ nia yam maama se o daare o taa toŋe o tɔge-ya. 4Abam balo na boŋe se á na chega Wɛ tei ne o nia yam tɔgem ŋwaane to yiga nam le mo de Yezu Krista, ye o zaane dem daa tere á tei ne.

5Ko daare Wɛ Sin-laao kom nam wo debam balo na ke dé wo-dedoa dé sɛ Yezu to tei ne, ye dé jege teena lanyerane we, dé wó na chega Wɛ tei ne. 6Dé na me de Yezu Krista to, dé ná gwoni dé peina, naa ya ná wo gwoni, ko dae kolokolo. Woŋo kolo nam na ye wo-chɛɔ to mo ye se dé taa jege wo-dedoa de Yezu, se ko pa dé taa tɔge da-swono kikia lanyerane.

7Abam déem yɔɔre á tɔge Wɛ chwoŋa lanyerane. Wɔ nam mo chege á chwoŋa se á daa yé ta‑á tɔge chega kam? 8Ko bere ko bá taa ye Wɛ mo chege abam konto. Wonto nam mo bwoŋi abam se á ta‑á tɔge‑o. 9Ko nye ne dé na yeini dé tɛ dé we, “Sabɔle fenfee ná wora bworobworo mun-lɛɛre wone, ko wó pa de maama fole mo.” 10Debam maama na me de dé Teiru Yezu Krista to, a yei we dé wó taa jege boboŋa bedwe. Wolo wom na jege abam boboŋa o chɔge to nam jege se o na chɔgem de o keim-lɔŋɔ kom, o na maŋe o ye tei de.

11A nu-bia bam, amo ba bere we, nɔɔno ná tɔge Wɛ, o jege se o gwoni o peini. Amo ya ná bere konto dwoŋi, nɔɔna bá bɛɛse-ne de a berem dem, kolo ŋwaane amo na bere Yezu toone dem dagara kam yuu ne tei to ya bá taa ye ta-balɔrɔ nɔɔna tei ne. 12Amo nam na boŋe tei to, ko ya lana se balo na jege abam ba daana to tiini ba gwoni ba tete yera, ye ko dae ba peina gwonim yerane.

Wɛ Sin-laao kom na zeini debam tei to

13A nu-bia bam, Wɛ na bwoŋi abam se á ta‑á tɔge‑o to, ko ye se á laam ta‑á tei á tete mo. Á na seene á tei á tete konto to, á nam yé pa se á kikia taa tɔge wo-zɔɔna yalo maama á fera na zo to. Nam ta‑á yei-na se á ta‑á tɔge swono chwoŋa se á ta‑á ma woli daane. 14Kokuri Wɛ nia yam maama bere woŋo dedoa mo we, nɔɔno maama jege se o taa swoi o dwoŋi se ko maŋe de o na swoi o tete tei to.#Chullu 19:18 15Abam nam ná yeini á ke daane ne vara mo chiŋi ye ba done daane tei to, á ta‑á yei se á wó ba á chɔge á tete de á dwi maama.

16Nam cheigi-na kolo kom a na lage a ta to. Pa-na se Wɛ Sin-laao kom taa cho abam Wɛ chwoŋa wone, se á yé ta‑á sɛ á tɔge wo-zɔɔna yalo á fera na zoore to.#Rom 8:5-9 17Kolo ŋwaane debam nabiina boboŋa na lage kolo to ba jege fera ko pa Wɛ Sin-laao kom. Wɛ Sin-laao kom de fera na zoore kolo to de nam ba jege fera debam boboŋa wone. Ko maa bere we wonnu tem konto telei boboŋa ware ya maŋe daane. Ko ma pa se dé daa ware dé boboŋa wonnu dé ke. 18Wɛ Sin-laao kom nam ná cho abam, Wɛ ni-kaana yam daa ba jege se ya taa tei abam.

19Ko ná ye kikia yalo nabiina boboŋa na lage to, yanto wae ya lɔre jaja. Ya tɔge wo-zɔɔna keim de wo-digiru kikia yalo maama na tɔge ka-laga chwoŋa to mo. 20Ya ta tɔge jwona kaanem de liri kikia. Ya pae se nɔɔna chuli daane ye ba jaane daane. Ya maa pa-ba puseŋa, de ban-zɔŋɔ, ye ba lage kamunim ba pa ba tete. Ya maa pae se nɔɔna pɔɔre daane yera yera. 21Ya daa ta pae se nɔɔna wo gweena de ba dwonna, ba daare ba ye sa-nyɔra, ye ba ke poweeni de. Ya maa daare ya pae se ba ke wo-yɔɔro tedaara konto dwoŋi. Amo nam ta wó fɔge a kaane abam a woli da we, abam balo na yeini á ke wonnu tento dwoŋi to bá tɔge á na jeiŋa jei Wɛ paare dem wone.

22Ko daare Wɛ Sin-laao kom na pae se nɔɔna ye tei to, konto pae se nɔɔna jege swono mo, de wopwolo, de bochare-zuru, de ban-peno, de da-zula, de ka zeini daane, de wo-dedoa keim, 23de ka-taa-nege-daane, de ka-ja-n-tete. Ni-kaane nam tera de na vae keim-laaro tento dwoŋi. 24Ko ná ye debam balo na ye Yezu Krista nyem to, dé maŋe dé pa se dé tete boboŋa daa ba tei debam, se dé daa yé taa tɔge wo-zɔɔna yalo dé fera na zoore to. 25Wɛ Sin-laao kom na pɛ dé na ŋwe-doŋa to, dé pa-na se ko taa cho debam dé ŋwea wone. 26Dé nam yé bere dé tete de dé dwonna, se dé yé lwɛ-ba, naa dé ke-ba puseŋa.

Currently Selected:

Galatia 5: KBG

Highlight

Copy

Compare